The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋ​ទុក​ពេល​ដល់​ម្ចាស់​អាជីវកម្ម​តាមអនឡាញ ធ្វើការ​ចុះ​បញ្ជី​ឱ្យ​បាន​មុន​ថ្ងៃ​ទី១ កក្កដា

រដ្ឋ​ទុក​ពេល​ដល់​ម្ចាស់​អាជីវកម្ម​តាមអនឡាញ ធ្វើការ​ចុះ​បញ្ជី​ឱ្យ​បាន​មុន​ថ្ងៃ​ទី១ កក្កដា

Content image - Phnom Penh Post
អតិថិជនស្វែងរកផលិតផលនៅលើគេហទំព័រទិញទំនិញអនឡាញ។ ហុង មិនា

រដ្ឋ​ទុក​ពេល​ដល់​ម្ចាស់​អាជីវកម្ម​តាមអនឡាញ ធ្វើការ​ចុះ​បញ្ជី​ឱ្យ​បាន​មុន​ថ្ងៃ​ទី១ កក្កដា

ភ្នំពេញ៖ រដ្ឋាភិបាល​កម្ពុជា​បាន​ទុក​ឱសានវាទ​ម្ចាស់​អាជីវកម្ម​តាម​អនឡាញ​ឱ្យ​បាន​មុន​ថ្ងៃ​ទី​ ១​ កក្កដា ឆ្នាំ ២០២២ នេះ ​ដើម្បី​ធ្វើការ​ចុះ​បញ្ជី​ពាណិជ្ជកម្ម​ឱ្យ​បាន​ត្រឹមត្រូវ ដើម្បី​ចៀសវាង​ការផាក​ពិន័យ ខណៈ​ដែល​ប្រភេទ​អាជីវកម្ម​តាម​អនឡាញ​ចំនួន ៦ ប្រភេទ​ត្រូវ​បាន​លើកលែង ដោយ​មិន​ចាំបាច់​ទៅ​ចុះបញ្ជី​ឡើយ។

លោក ប៉ែន សុវិជាតិ អនុរដ្ឋ​លេខាធិការ និង​ជា​អ្នកនាំពាក្យ​ក្រសួង​ពាណិជ្ជកម្ម បាន​ប្រាប់​ឱ្យដឹងថា ក្រសួង​ពាណិជ្ជកម្ម​នឹង​ចាប់ផ្ដើម​ផាកពិន័យ​អាជីវកម្ម​អនឡាញ​ដែល​មិនមាន​ការអនុញ្ញាត​ពី​ក្រសួង​ពាណិជ្ជកម្ម អាជីវកម្ម​នោះ​នឹងត្រូវ​ទទួល​ការផាក​ពិន័យ​ជា​ប្រាក់ និង​អាចមាន​ការផ្ដន្ទាទោស ដូច​មាន​ចែង​ក្នុង​ច្បាប់ ស្តីពី​ពាណិជ្ជកម្ម​តាម​ប្រព័ន្ធ​អេឡិចត្រូនិក​។

លោក សុវិជាតិ បានបញ្ជាក់​យ៉ាង​ដូច្នេះ​ថា​៖ «​យើង​ចង់​ឱ្យ​ធុរជន​ទាំងអស់​មានការ​យល់ដឹង​ថា ការចុះ​បញ្ជី​ពាណិជ្ជកម្ម​នេះ គឺ​កាតព្វកិច្ច​ដែល​ត្រូវតែ​បំពេញ​ សម្រាប់​សង្គម​យើង​ពាក់ព័ន្ធ​នឹង​ការអនុវត្ត​ច្បាប់ និង​កាតព្វកិច្ច​របស់​ពលរដ្ឋ​ចំពោះ​ការបង់ពន្ធ​»​។

លោក​បាន​បន្ថែមថា ក្រសួង​បាន​ពន្យារ​ពេល ២ ដង​រួចទៅ​ហើយ ហើយ​ទល់នឹង​ពេលនេះ​មិនទាន់​មាន​ការណែនាំ​ពី​ថ្នាក់ដឹកនាំ​ថា ឱ្យ​បន្ត​ពន្យារពេល​ទៀត​នោះទេ ដូចនេះ​ការអនុវត្ត​ការផាក​ពិន័យ ចំពោះ​អ្នក​ដែល​មិនទាន់​បាន​ចុះបញ្ជី នឹង​ត្រូវ​ធ្វើឡើង​ចាប់ពី​ថ្ងៃទី ០១ ខែ​កក្កដា ឆ្នាំ ២០២២ នេះហើយ​។

លោក​ថា​៖ «​ក្រសួង​ពាណិជ្ជកម្ម​មាន​កិច្ចសហការ​យ៉ាង​ជិតស្និទ្ធ​ជាមួយ​នឹង​ក្រសួង​ប្រៃសណីយ៍ និង​ទូរគមនាគមន៍​ក្នុង​ការ​ពិនិត្យ​ឃ្លាំមើល​សកម្មភាព​នៃ​ការលក់ ឬក៏​ប្រើប្រាស់​បណ្ដាញ​អនឡាញ ដើម្បី​ធ្វើ​អាជីវកម្ម ដោយ​មកដល់​ពេលនេះ​ក្រសួង​ទើបតែ​ទទួល​បាន​ការដាក់​ពាក្យ​ស្នើសុំ​អាជ្ញា​បណ្ណ​ប្រមាណ​ជាង ៣០០ ពាក្យ​ស្នើសុំ​ដោយ​មុននឹង​អាច​ស្នើសុំ​អាជ្ញា​បណ្ណ​នេះ​បាន ធុរជន​ទាំងអស់​ត្រូវ​ចុះបញ្ជី​ពាណិជ្ជកម្ម​ជាមុនសិន​»​។

លោក ម៉ាក ចំរើន អនុប្រធាន និង​ក្រុមប្រឹក្សាភិបាល​របស់​ក្រុមហ៊ុន​ស្មាលយ៍សប (Smile Shop e-commerce ) បាន​ឱ្យ​ដឹងថា ការចុះបញ្ជី​ពាណិជ្ជកម្ម និង​ការស្នើសុំ​អាជ្ញាបណ្ណ​សម្រាប់​អាជីវកម្ម​អនឡាញ​ប្រៀប​ដូចជា​តម្រង់ទិស​ដល់​ធុរជន​តាម​អនឡាញ​ទាំងអស់ ដើម្បី​ឱ្យ​គាត់​ចាប់​យក​វិជ្ជាជីវៈ​ស្តង់ដា​មួយ ដោយ​អាច​ពង្រីក​សក្តានុពល​ទៅ​កាន់​ទីផ្សារ​ផ្សេងទៀត ក្រៅពី​កម្ពុជា​។

បែបនេះ​ក្តី លោក​យល់​ថា ក្រសួង​គួរតែ​ទុក​ពេលវេលា​សមស្រប​មួយ​ សម្រាប់​អាជីវកម្ម​អនឡាញ​ថ្មីៗ ដែល​ទើប​ចាប់ផ្តើម​ដំណើរការ ដើម្បី​ឱ្យ​ម្ចាស់​អាជីវកម្ម​អនឡាញ​ទាំងនោះ​មាន​ភាពរឹងមាំ​សិន និង​ជួយ​គាំទ្រ​បន្ថែមទៀត ដើម្បី​អាជីវកម្ម​ទាំងនោះ​មាន​ដំណើរការ​ល្អ​។

លោក​បាន​បញ្ជាក់​ថា​៖ «​សម្រាប់​អ្នករកស៊ី​ថ្មីថ្មោង រដ្ឋ​គួរតែ​មាន​ការលើកលែង​សិន ដោយ​គួរតែ​ទុកពេល​សមរម្យ​ណាមួយ ដើម្បី​ឱ្យ​គាត់​អាច​អភិវឌ្ឍន៍​ស្ថាប័ន​មុខរបរ​របស់​គាត់​ឱ្យបាន​ប្រសើរ​សិន ចាំ​ជំរុញ​ឱ្យ​គាត់​ចុះបញ្ជី​ក៏បាន​។ នៅពេល​ដែល​ដល់​ដំណាក់កាល​មួយ​ដែល​ធុរកិច្ច​អនឡាញ​របស់​ពួកគាត់​បាន​ប្រសើរ​ជា​ការចុះបញ្ជី​អាជីវកម្ម និង​ស្នើសុំ​អាជ្ញាបណ្ណ គឺជា​រឿង​ចាំបាច់​ណាស់​សម្រាប់​ពួកគាត់​»​។

ទោះជា​យ៉ាងណា​ក៏ដោយ មិនមែន​សុទ្ធតែ​អាជីវកម្ម​តាម​ប្រព័ន្ធ​អេឡិចត្រូនិក សុទ្ធតែ​ត្រូវ​ចុះបញ្ជី​ពាណិជ្ជកម្ម​នោះទេ​។ ​នៅក្នុង​នោះ​ក៏មាន​ប្រភេទ​អាជីវកម្ម តាម​អនឡាញ​ចំនួន ៦ ប្រភេទ ដែល​ត្រូវ​លើកលែង ដោយ​មិនចាំបាច់​ទៅ​ចុះបញ្ជី​នោះទេ ដែល​សកម្មភាព​អាជីវកម្ម​ទាំងនោះ​រួមមាន​៖ ផ្សព្វផ្សាយ​ពាណិជ្ជកម្ម​អំពី​ទំនិញ ឬ​សេវា​របស់ខ្លួន ដែល​មិនបាន​ផ្ដល់​សេវា​ពាណិជ្ជកម្ម​ទិញ​-​លក់​ទេ​,​ការ​កក់​បម្រុង​ទុក​នូវ​សេវា ដែល​មិនមាន​ការ​កក់​ប្រាក់​,​ទី ៣៖ ការលក់​ទំនិញ ឬ​សេវា​របស់​រូបវន្ត​បុគ្គល ដែលមាន​ផល​របប​ក្រោម​កម្រិត​ផល​របប​ជា​អ្នក​ជាប់ពន្ធ​តូច (​ក្រោម ២៥០ លាន​រៀល​ក្នុង ១ ឆ្នាំ​), ការលក់​ទំនិញ ឬ​ផ្ដល់​សេវា ដែល​មាន​លក្ខណៈ​គ្រួសារ​តាម​រដូវកាល​, ការលក់​ទំនិញ​ជា​ស្នាដៃ​សិល្បៈ និង​,​ការបង្ហាត់​បង្រៀន​សិស្ស​តាម​ប្រព័ន្ធ​អនឡាញ​ជា​ឯកជន ឬ​ការបង្ហាត់បង្រៀន​ជា​សិក្ខាសាលា​៕

អត្ថបទគួរចាប់អារម្មណ៍