.jpg)
បង្គោលចែកចាយថាមពលអគ្គិសនីជាច្រើន ក្នុងរាជធានីភ្នំពេញ។ ហេង ជីវ័ន
ភ្នំពេញៈ កម្ពុជាគ្រោងដាក់ឱ្យអនុវត្តគោលនយោបាយជាតិស្តីពីប្រសិទ្ធភាពថាមពលនៅចុងឆ្នាំ ២០២២ នេះ ដោយរំពឹងថា នឹងអាចកាត់បន្ថយការប្រើប្រាស់ថាមពលឱ្យបានក្នុងកម្រិត ២០ ភាគរយ នៅឆ្នាំ ២០៣៥។
លោក ហេង គុណលាង អគ្គនាយកនៃអគ្គនាយកដ្ឋានថាមពល ក្រសួងរ៉ែ និងថាមពល បានប្រាប់ ភ្នំពេញ ប៉ុស្តិ៍ថា ក្រសួងបានរៀបចំសេចក្តីព្រាងគោលនយោបាយជាតិស្តីពីប្រសិទ្ធភាពថាមពលរួចរាល់ហើយ ដោយបានបញ្ជូនសេចក្តីព្រាងនេះទៅគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុដើម្បីពិនិត្យបន្ត មុននឹងដាក់ជូនរាជរដ្ឋាភិបាលអនុម័ត។
លោកបន្ថែមថា ខ្លឹមសារសំខាន់នៃសេចក្តីព្រាងគោលនយោបាយជាតិនេះ សំដៅដល់ការជំរុញឱ្យមានការប្រើប្រាស់ថាមពលឱ្យមានប្រសិទ្ធភាព និងសន្សំសំចៃ ពិសេសសម្រាប់វិស័យអគារ ឧស្សាហកម្ម ពាណិជ្ជកម្ម និងវិស័យដឹកជញ្ជូន។
លោកបញ្ជាក់ថា៖ «តាមការសិក្សាកន្លងមក ទីតាំងអាជីវកម្មខ្លះនៅក្នុងវិស័យទាំងនេះ យើងសង្កេតឃើញថា ការប្រើប្រាស់ថាមពលរបស់ពួកគេមិនទាន់ទទួលបានប្រសិទ្ធភាពនៅឡើយទេ។ ការប្រើប្រាស់ថាមពលប្រកបដោយប្រសិទ្ធភាពនេះ យើងផ្តោតសំខាន់លើការបំពាក់គ្រឿងបរិក្ខារនានា ដោយគោលនយោបាយនេះនឹងធ្វើឱ្យការប្រើប្រាស់ថាមពលថយចុះ»។
លោកបានបន្ថែមថា ក្រសួងនឹងបន្តជំរុញដល់ពលរដ្ឋ ជាពិសេសអ្នកនៅក្នុងវិស័យដែលពាក់ព័ន្ធឱ្យមានការប្រើប្រាស់ឧបករណ៍ ឬគ្រឿងបរិក្ខារនានា នាំចូលពីប្រទេសជិតខាង ដែលមានសញ្ញាបញ្ជាក់ពីប្រសិទ្ធភាពថាមពល និងការសន្សំសំចៃថាមពលជាដើម។
លោក លន់ យ៉េង អគ្គលេខាធិការនៃសហព័ន្ធស្រូវអង្ករកម្ពុជាបានប្រាប់ថា បច្ចុប្បន្នថាមពលដែលប្រើប្រាស់សម្រាប់វិស័យស្រូវអង្ករមិនទាន់មានគ្រប់គ្រាន់ទេ ពិសេសនៅអំឡុងពេលសម្ងួតស្រូវនៅតាមរោងម៉ាស៊ីនកិនស្រូវមួយចំនួនមានថាមពលមិនគ្រប់ ដែលនាំឱ្យខូចគុណភាពស្រូវ និងខូចខាតគ្រឿងបរិក្ខារសម្រាប់ប្រើប្រាស់ក្នុងចង្វាក់ផលិតកម្មស្រូវនេះដែរ។
លោកបន្តថា សម្រាប់គ្រឿងបរិក្ខារ និងប្រព័ន្ធផ្សេងៗដែលប្រើប្រាស់ក្នុងរោងម៉ាស៊ីនកិនស្រូវភាគច្រើន សុទ្ធតែមានគុណភាពខ្ពស់។
លោកបញ្ជាក់ថា៖ «វិស័យឯកជន ចង់បំពាក់ថាមពលសូឡាសម្រាប់ប្រើក្នុងចង្វាក់ផលិតកម្មដែរ ប៉ុន្តែមានតម្លៃថ្លៃពេក ដែលបានធ្វើឱ្យរោងម៉ាស៊ីនកិនស្រូវមួយចំនួនប្រឈមនឹងបញ្ហាកង្វះថាមពល។ បើមានគោលនយោបាយនេះ យើងរំពឹងថា ការប្រើថាមពលនឹងកាន់តែមានប្រសិទ្ធភាព»។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជានិយាយថា វិស័យថាមពលដើរតួនាទីយ៉ាងសំខាន់សម្រាប់វិស័យឧស្សាហកម្ម គឺមិនសម្រាប់តែវិស័យកាត់ដេរប៉ុណ្ណោះទេ ប៉ុន្តែសម្រាប់ការជំរុញឧត្តមភាពនៃវិស័យផលិតកម្ម។ ទោះជាយ៉ាងណា បញ្ហាតម្លៃថាមពលនៅកម្ពុជានៅតែខ្ពស់។
លោកប្រាប់ថា៖ «វិស័យថាមពល គឺជាកត្តាសំខាន់សម្រាប់ការអភិវឌ្ឍសេដ្ឋកិច្ច ដោយមិនសម្រាប់តែវិស័យរោងចក្រកាត់ដេរនោះទេ។ មែនទែនទៅយើងមានថាមពលគ្រប់គ្រាន់ ប៉ុន្តែបញ្ហាតម្លៃគឺនៅតែធ្វើឱ្យយើងមិនអាចប្រកួតប្រជែងជាមួយប្រទេសនានានៅក្នុងតំបន់និយាយជារួម គឺដៃគូប្រកួតប្រជែងសំខាន់របស់យើងតែម្តង»។
រដ្ឋាភិបាលកម្ពុជាបានរៀបចំសេចក្តីព្រាងគោលនយោបាយប្រសិទ្ធភាពថាមពលនេះ ក្នុងឆ្នាំ ២០២១ ក្រោមការគាំទ្រពីធនាគារអភិវឌ្ឍអាស៊ី ADB ដែលជាសសរស្តម្ភដ៏សំខាន់នៃអនាគតថាមពលរបស់កម្ពុជា ដោយជំរុញឱ្យប្រើថាមពលតិចជាងមុន។
សក្តានុពលនៃការសន្សំសំចៃថាមពលសម្រាប់កម្ពុជា គឺការជំរុញការផ្ទេរ និងការប្រើប្រាស់បច្ចេកវិទ្យាថាមពលដែលមានប្រសិទ្ធភាពខ្ពស់ ដើម្បីកាត់បន្ថយការប្រើប្រាស់ថាមពលឱ្យស្ថិតក្នុងកម្រិត ២០ ភាគរយ នៅឆ្នាំ ២០៣៥ ដោយធៀបមូលដ្ឋានគោលឆ្នាំ ២០១៤ ដែលក្នុងនោះ ២៥ ភាគរយ សម្រាប់វិស័យអគារ និង ២៥ ភាគរយ សម្រាប់វិស័យឧស្សាហកម្ម ព្រមទាំង ១៥ ភាគរយ សម្រាប់វិស័យដឹកជញ្ជូន៕
