ក្រចេះ: ផែនការមេដើម្បីអភិវឌ្ឍសហគមន៍អេកូទេសចរណ៍កោះសាមសិប (២០២២-២០២៦) ប្រកាសដាក់ឱ្យប្រើប្រាស់ ដើម្បីជំរុញកំណើនទេសចរណ៍ទៅកាន់ខេត្តនេះ ក៏ដូចជាលើកកម្ពស់វប្បធម៌ជនជាតិដើមភាគតិច និងចូលរួមពង្រឹងការអភិរក្សធនធានធម្មជាតិឱ្យកាន់តែប្រសើរឡើង។
ក្រោមកិច្ចសហការជាមួយអង្គការ NTFP-EP និងរដ្ឋបាលខេត្តក្រចេះ មន្ទីរទេសចរណ៍ខេត្តក្រចេះបានសិក្សា និងរៀបចំផែនការមេ ដើម្បីអភិវឌ្ឍសហគមន៍អេកូទេសចរណ៍កោះនេះ ដែលមានទីតាំងស្ថិតនៅក្នុងស្រុកសំបូរ ខេត្តក្រចេះ។
លោក ប៉ែន លីណាត អភិបាលរងខេត្តក្រចេះបានប្រាប់ ភ្នំពេញ ប៉ុស្តិ៍ថា ផែនការមេនេះនឹងមិនត្រឹមតែជំរុញការអភិវឌ្ឍតំបន់នេះនោះទេ ប៉ុន្តែផែនការនេះធ្វើឱ្យវិស័យទេសចរណ៍ក្នុងខេត្តទាំងមូលរីកចម្រើនផងដែរ។
លោកបានថ្លែងថា៖ «តំបន់នេះ យើងទើបតែរកឃើញ ដែលជាតំបន់អាងទឹកដ៏ធំមួយ និងត្រូវបានបង្កើតជាសហគមន៍ឡើង ដើម្បីបង្កើនប្រាក់ចំណូលរបស់ពលរដ្ឋ ជាពិសេសលើកកម្ពស់ជនជាតិដើមភាគតិចព្នង និងកួយ»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងថា តំបន់អេកូទេសចរណ៍ គឺជាសសរស្តម្ភមួយដ៏សំខាន់ក្នុងចំណោមសសរស្តម្ភទាំង ៤ ក្នុងវិស័យទេសចរណ៍។
លោកស្រីបានបញ្ជាក់ថា៖ «តំបន់អេកូទេសចរណ៍បានដើរតួនាទីសំខាន់ណាស់ក្នុងការទាក់ទាញទេសចរ ជាពិសេសទេសចរអន្តរជាតិ។ តំបន់អេកូទេសចរណ៍ គឺជានិរន្តរភាពទេសចរ ដែលអាចជួយដល់សហគមន៍ទេសចរណ៍ តាមរយៈការបង្កើតការងារ ដើម្បីលើកកម្ពស់ជីវភាពពលរដ្ឋក្នុងតំបន់»។
សហគមន៍អេកូទេសចរណ៍កោះសាមសិបជាតំបន់ទាក់ទាញទេសចរណ៍ធម្មជាតិមួយកន្លែង ដែលស្ថិតនៅតាមបណ្តោយដងទន្លេមេគង្គលើស្ថិតនៅក្នុងភូមិខ្សាច់ឡាវ ឃុំអូរគ្រៀង ស្រុកសំបូរ ខេត្តក្រចេះ។ ថ្វីដ្បិតតែមានឈ្មោះថា កោះសាមសិប តែតាមការពិតតំបន់នេះមានកោះរាប់រយគ្របដណ្តប់ដោយព្រៃឈើបៃតង ជីវចម្រុះសម្បូរបែប ដូចជា ព្រៃលិចទឹក អន្លង់ត្រីមេពូជដ៏កម្ររួមទាំងសត្វស្លាបជាង ២០០ ប្រភេទ។ ផែនការនេះរំពឹងថា នឹងជំរុញកំណើនភ្ញៀវទេសចរ ១០ ភាគរយក្នុង ១ ឆ្នាំ, ចំណូល ១០ ភាគរយក្នុង ១ ឆ្នាំ សម្រាប់សហគមន៍៕