.jpg)
លោក កាំង ម៉ូនីកា អគ្គលេខាធិការរង GMAC នាពេលកន្លងទៅ។ រូបថត GMAC
ភ្នំពេញ: មន្ត្រីជាន់ខ្ពស់សមាគមរោងចក្រកាត់ដេរនៅកម្ពុជា (GMAC) និងវិស័យឯកជនបានឱ្យដឹងថា វិនិយោគិនរោងចក្រកាត់ដេរ និងសហគមន៍ធុរកិច្ចភាគច្រើនមិនបានប្រើប្រាស់ និងយល់ច្បាស់ពីអត្ថប្រយោជន៍នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលបានចូលជាធរមានតាំងពីដើមខែមករា ឆ្នាំ ២០២២ នោះទេ។ ផ្ទុយទៅវិញ ពួកគេនៅតែប្រើប្រាស់កិច្ចព្រមព្រៀងស្រាប់ និងប្រព័ន្ធអនុគ្រោះពាណិជ្ជកម្មផ្សេងទៀត ដើម្បីជំរុញការនាំចេញដដែល។
ថ្លែងនៅក្នុងកិច្ចប្រជុំអនឡាញ ដែលធ្វើឡើងដោយលេខាធិការដ្ឋានអាស៊ានកាលពីថ្ងៃទី ២៨ ខែមិថុនា លោក កាំង ម៉ូនីកា អគ្គលេខាធិការរង GMAC បានឱ្យដឹងថា រហូតមកដល់ពេលនេះ នៅពុំទាន់មានការយកចិត្តទុកដាក់ច្រើនចំពោះកិច្ចព្រមព្រៀងនេះ ដោយសារមានកត្តាមួយចំនួនដូចជា៖ ការនាំចេញរបស់កម្ពុជាភាគច្រើនជាគោលដៅសម្រាប់ទីផ្សារប្រទេសលោកខាងលិច។ ទី២ ក្រុមហ៊ុនផលិតនៅទីនេះហាក់ដូចជាពុំទាន់ដឹងច្បាស់ពី RCEP និងទី៣ ពួកគេភាគច្រើនមិនបានយកចិត្តទុកដាក់គ្រប់គ្រាន់ ចំពោះកំណើនប្រកបដោយសក្តានុពលនៅក្នុងទីផ្សារដែលមានកិច្ចព្រមព្រៀង RCEP ដែលមានប្រជាជនជិត ២,៣ ពាន់លាននាក់ នៅពេលអនាគតដ៏ខ្លីខាងមុខនេះទេ។
លោកថ្លែងថា៖ «រោងចក្រកាត់ដេរភាគច្រើននៅក្នុងប្រទេសជាសមាជិករបស់ RCEP អាចទទួលបានអត្ថប្រយោជន៍ភ្លាមៗពីកិច្ចព្រមព្រៀង RCEP ដោយមិនចាំបាច់កែតម្រូវខ្សែចង្វាក់ផ្គត់ផ្គង់បច្ចុប្បន្នរបស់ពួកគេឡើយ»។
លោក សុង សារ៉ន ជានាយកប្រតិបត្តិនៃក្រុមហ៊ុន Amru Rice (Cambodia) និងជាប្រធានសហព័ន្ធស្រូវអង្ករកម្ពុជា បានសរសេរមកកាន់ ភ្នំពេញ ប៉ុស្តិ៍ កាលពីខែមេសាថា ការយល់ដឹង RCEP ប្រកបដោយប្រសិទ្ធភាពនឹងជួយពង្រីក និងធ្វើឱ្យកាន់តែស៊ីជម្រៅនូវទំនាក់ទំនងសេដ្ឋកិច្ចជាមួយនឹងភាពអនុគ្រោះបន្ថែម លទ្ធភាពចូលទីផ្សារពាណិជ្ជកម្មទំនិញ ដែលភាគច្រើននាំចូលទីផ្សារប្រទេសចិន ជប៉ុន និងកូរ៉េខាងត្បូង ដែលលុបចោលពន្ធនាំចូល និងការរៀបចំឯកសារបញ្ចេញទំនិញពីគយឆាប់រហ័ស ហើយសម្បទាននេះ អាចកាត់បន្ថយការចំណាយសម្រាប់វិស័យផ្គត់ផ្គង់ដល់ទីផ្សារទាំងនេះ។
លោកបានគូសបញ្ជាក់ថា៖ «នៅពេលផ្តល់សច្ចាប័នដោយបណ្ដាប្រទេសដែលចូលរួមក្នុងកិច្ចព្រមព្រៀង RCEP ឱកាសមួយនឹងត្រូវបានដាក់ឱ្យដំណើរការ សម្រាប់ការចរចារវាងអាជីវកម្ម និងអាជីវកម្មនានា។ ហើយសម្រាប់ប្រទេសកម្ពុជា កិច្ចព្រមព្រៀង RCEP នេះនឹងជួយផ្តល់មូលដ្ឋានគ្រឹះដ៏រឹងមាំសម្រាប់ប្រទេសមួយនេះ ក្នុងការជំរុញសេដ្ឋកិច្ចរបស់ខ្លួន និងជួយជម្នះបញ្ហាប្រឈមដែលបណ្តាលមកពីការរីករាលដាលជំងឺកូវីដ១៩»៕
