.jpg)
ទិដ្ឋភាពនៃស្ថានីយចាក់ប្រេង Caltex ក្នុងរាជធានីភ្នំពេញ។ ហេង ជីវ័ន
ភ្នំពេញៈ កម្ពុជាបានចំណាយប្រាក់ប្រមាណជាង ៩៧០ លានដុល្លារ ទៅលើការនាំចូលប្រេងឥន្ធនៈមកផ្គត់ផ្គង់តម្រូវ-ការក្នុងស្រុក នារយៈពេល ៥ ខែ ដើមឆ្នាំ ២០២២ កើនជាង ៥៧ ភាគរយ បើធៀបរយៈពេលដូចគ្នាឆ្នាំ ២០២១។ នេះបើតាមទិន្នន័យពីក្រសួងពាណិជ្ជកម្ម។
ទិន្នន័យបង្ហាញថា ចន្លោះពីខែមករា-ខែឧសភា ឆ្នាំ ២០២២ ការនាំចូលប្រេងឥន្ធនៈមានតម្លៃសរុបជាង ៩៧១ លានដុល្លារ កើនឡើង ៥៧,៣៦ ភាគរយ បើធៀបនឹងរយៈពេលដូចគ្នាឆ្នាំ២០២១ ដែលមានជាង ៦១៧ លានដុល្លារ។ ក្នុងនោះការនាំចូលប្រេងសាំងមានតម្លៃជាង ៣៤២ លានដុល្លារ កើន ១០៣,១១ ភាគរយ បើធៀបនឹងរយៈពេលដូចគ្នាឆ្នាំ ២០២១ និងប្រេងម៉ាស៊ូត តម្លៃ ៦២៩ លានដុល្លារ កើន ៤០,២០ ភាគរយ។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ៣០ ខែមិថុនាថា បើគិតពីដើមឆ្នាំ ២០២២ មក តម្លៃប្រេងនៅទីផ្សារអន្តរជាតិបានកើនឡើងជាង ២ដងរួចហើយ ដូច្នេះប្រេងនៅកម្ពុជា ដែលជាប្រទេសនាំចូលប្រេងទាំងស្រុង ក៏ត្រូវកើនឡើងទៅតាមតម្លៃទីផ្សារអន្តរជាតិដែរ។ តម្លៃប្រេងនឹងបន្តកើនឡើងថែមទៀតបើផ្អែកតាមស្ថានភាពនៃសង្គ្រាមរវាងប្រទេសរុស្ស៊ី និងអ៊ុយក្រែនពេលនេះ ព្រោះបរិមាណការផ្គត់ផ្គង់ប្រេងលើពិភពលោកមានការធ្លាក់ចុះ (រុស្ស៊ី គឺជាប្រទេសនាំចេញប្រេង ១ ក្នុងពិភពលោក ប៉ុន្តែដោយសារសង្គ្រាមឈ្លានពានអ៊ុយក្រែន រុស្ស៊ីត្រូវបានប្រទេសជាច្រើនដាក់ទណ្ឌកម្មលើការនាំចេញប្រេង និងឧស្ម័ន និងផលិតផលជាច្រើនទៀត)។
ទាក់ទងទៅនឹងបរិមាណប្រេងនាំចូល លោក សុវិជាតិ អះអាងថា មិនបានកើនឡើងច្រើនទេ។ លោកថ្លែងថា៖ «ទឹកប្រាក់នាំចូលប្រេងពិតជាបានហក់ឡើងខ្ពស់ ប៉ុន្តែសម្រាប់បរិមាណប្រេង គឺកើនតិចតួចប៉ុណ្ណោះ ព្រោះចង្វាក់ផលិតកម្មនៅពេលនេះទើបមានសម្ទុះឡើងវិញជាបណ្តើរៗហើយ បន្ទាប់ពីស្ថានភាពនៃការឆ្លងរាលដាលជំងឺកូវីដ ១៩ មានភាពល្អប្រសើរ។
លោកប្រាប់ទៀតថា ក្រសួងពាណិជ្ជកម្មតែងតែតាមដាន និងជួយសម្របសម្រួលក្នុងការកំណត់តម្លៃប្រេងដាក់លក់នៅលើទីផ្សារ ដើម្បីជួយសម្រួលការចំណាយប្រចាំថ្ងៃរបស់ប្រជាជន។
ជាធម្មតា ៣-៤ ថ្ងៃ តែងមានកប៉ាល់ដឹកប្រេងចូលមកកម្ពុជា ដោយតម្លៃតែងតែកើនឡើងជាប្រចាំ។ ប្រេងឥន្ធនៈប្រើប្រាស់នៅកម្ពុជា ត្រូវបាននាំចូលពីប្រទេសសិង្ហបុរី ថៃ និងវៀតណាម។ នេះបើតាមលោក សុវិជាតិ។
យោងតាមអ្នកនាំពាក្យខាងលើ ទោះតម្លៃប្រេងឥន្ធនៈបានកើនឡើងជាបន្តបន្ទាប់ ប៉ុន្តែកម្ពុជាមិនទាន់ប្រឈមនឹងកង្វះខាតប្រេងសម្រាប់ប្រើប្រាស់ក្នុងប្រទេសឡើយ ដោយក្រសួងសហការជាមួយក្រុមហ៊ុននាំចូលរក្សាប្រេងក្នុងស្តុកឱ្យបានយ៉ាងតិច ២០ ថ្ងៃ សម្រាប់បំពេញតម្រូវការប្រើប្រាស់ក្នុងស្រុក។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ការកើនចំនួនទឹកប្រាក់នាំចូលប្រេង គឺដោយសារតែតម្លៃប្រេងនៅទីផ្សារអន្តរជាតិកើនឡើង ពិសេសចាប់ពីចុងខែកុម្ភៈ ឆ្នាំ ២០២២ ដែលប្រទេសរុស្ស៊ី ចូលលុកលុយប្រទេសអ៊ុយក្រែន។ ចំនួនទឹកប្រាក់នាំចូលប្រេងរបស់កម្ពុជា នឹងកើនឡើងខ្ពស់ថែមទៀត ព្រោះតម្លៃប្រេងលើទីផ្សារអន្តរជាតិនឹងបន្តឡើង ព្រោះតែអតុល្យភាពរវាងការផ្គត់ផ្គង់ និងតម្រូវការ។
លោកប្រាប់ថា៖ «បើមើលស្ថានភាពពេលនេះ គឺតម្លៃប្រេងឥន្ធនៈនឹងនៅបន្តឡើងទៀត ហើយចំនួនទឹកប្រាក់ដែលកម្ពុជានាំចូល ក៏ឡើងតាមនោះដែរ»។
លោកបន្ថែមថា ដោយសារប្រេងឥន្ធនៈចូលរួមនៅក្នុងគ្រប់ខ្សែចង្វាក់ផលិតកម្មចាប់តាំងពីការដាំដុះ កែច្នៃ វេចខ្ចប់ និងដឹកជញ្ជូន ដូច្នេះបើតម្លៃប្រេងបន្តកើន វានឹងអាចបង្កឱ្យមានបញ្ហាច្រើនដល់ប្រាក់ចំណូលរបស់ប្រជាជន និងសេដ្ឋកិច្ចប្រទេសជាតិផងដែរ៕
