ភ្នំពេញៈ តម្លៃទីផ្សារសរុបនៃការធ្វើពាណិជ្ជកម្មតាមប្រព័ន្ធអេឡិចត្រូនិក នៅកម្ពុជាក្នុងឆ្នាំ ២០២១ មានចំនួនជាង ៩៧០ លានដុល្លារ កើនជិត ២០ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២០។
បើយោងតាមការចេញផ្សាយរបស់វិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ (TTRI) នៃក្រសួងពាណិជ្ជកម្ម កាលពីថ្ងៃទី ៣០ ខែ មិថុនា ឆ្នាំ ២០២២ បានបង្ហាញថា ទំហំទីផ្សារសរុបនៃការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា ក្នុងឆ្នាំ ២០២១ មានទំហំ ៩៧០,១ លានដុល្លារ កើនជាង ១៩,២ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមានទឹកប្រាក់ ៨១៣,២៥ លានដុល្លារ។
ចំពោះចំណូលពាណិជ្ជកម្មតាមប្រព័ន្ធអេឡិចត្រូនិកតាមវិស័យវិញរួមមាន សម្លៀកបំពាក់ចំនួន ២៦៣,៣០ លានដុល្លារ, គ្រឿងអេឡិចត្រូនិក ២៥៤,៤០ លានដុល្លារ, គ្រឿងសម្អាង ផលិតផលសុខភាព និងសម្ភារប្រើប្រាស់ ២៣០,៥ លានដុល្លារ, ម្ហូបអាហារ និងភេសជ្ជៈ ១០១,៤៨ លានដុល្លារ និងសម្ភារក្មេងលេង សម្ភារកម្សាន្ត សម្ភារកែច្នៃ គ្រឿងសង្ហារិម និងប្រព័ន្ធផ្សព្វផ្សាយ ១២០,៤២លានដុល្លារ។
ក្នុងអត្ថបទទស្សនៈផ្សព្វផ្សាយកាលពីថ្ងៃទី ៣០ ខែមិថុនា ស្តីពីផលប៉ះពាល់នៃច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក និងបទប្បញ្ញត្តិ អនុវត្តនានាលើធុរកិច្ច និងសេដ្ឋកិច្ចកម្ពុជាដែលរៀបចំដោយលោក ហោ អៀងឆាយ ប្រធានវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ (TTRI) នៃក្រសួងពាណិជ្ជកម្ម ឱ្យដឹងថា ទីផ្សារពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាមានតម្លៃប្រហែល ១,៥ ពាន់លានដុល្លារ ដោយការលក់ត្រូវរំពឹងថា កើនឡើងដល់ ២៥១ លានដុល្លារក្នុងឆ្នាំនេះ និងកើនដល់ ៣៥៤ លានដុល្លារ ក្នុងឆ្នាំ ២០២៣។
លោក អៀងឆាយ បញ្ជាក់ថា ដោយមានការគាំទ្រយ៉ាងរឹងមាំពីច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ប្រជាជនកាន់តែមានទំនុកចិត្តលើពាណិជ្ជកម្មតាមប្រព័ន្ធអេឡិចត្រូនិក ដោយការលក់ និងអន្តរកម្មអនឡាញរវាងអ្នកលក់ និងអ្នកទិញ កើតឡើងកាន់តែច្រើន ដែលនេះមានន័យថា មនុស្សកាន់តែមានសមត្ថភាពក្នុងការទាក់ទង និងធ្វើជំនួញគ្រប់ទីកន្លែងនិងគ្រប់ពេលវេលា។
ម្ចាស់ផលិតផល ថែរក្សាសក់ ភារព្រីមៀម លោក រិន សុក្រិត្យ ដែលបានប្រតិបត្តិអាជីវកម្មភាគច្រើនបំផុតតាមប្រព័ន្ធអេឡិចត្រូនិកបានប្រាប់ឱ្យដឹងថា ការធ្វើពាណិជ្ជកម្មតាមអនឡាញនៅកម្ពុជានៅថ្មីនៅឡើយ ដែលធ្វើឱ្យឱកាសនៃការរីកចម្រើនមានខ្ពស់ ខណៈពលរដ្ឋខ្មែរភាគច្រើនមានការយល់ដឹងកាន់តែទូលំទូលាយលើការប្រើប្រាស់បច្ចេកវិទ្យាឌីជីថលនេះ។
លោកបន្តថា បណ្តាញសង្គមនៅកម្ពុជា កាន់តែមានភាពទូលំទូលាយខ្ពស់ ស្របពេលការរួមចំណែកពីស្ថាប័នពាក់ព័ន្ធដូចជា ក្រសួងពាណិជ្ជកម្មជាដើម ក្នុងការបង្កើតច្បាប់គ្រប់គ្រង និងការតម្រូវឱ្យចុះបញ្ជីពាណិជ្ជកម្មជាដើម បានជំរុញការធ្វើអាជីវកម្មតាមប្រព័ន្ធអេឡិចត្រូនិកនេះកាន់តែមានទំនុកចិត្តរវាងអ្នកលក់ និងអ្នកទិញ។
លោកបញ្ជាក់ថា៖ «បច្ចុប្បន្នយើងឃើញថាមិនមែនតែគ្រឿងសម្អាងនោះទេ គឺមានទំនិញគ្រប់យ៉ាងដែលត្រូវបានដាក់លក់តាមប្រព័ន្ធអេឡិចត្រូនិក ឬអនឡាញនេះ។ យើងចង់ឱ្យក្រសួងពាក់ព័ន្ធផ្តល់ព័ត៌មានឱ្យបានច្បាស់ដើម្បីឱ្យអ្នករកស៊ីនៅផ្នែកនេះមានភាពប្រាកដប្រជា ជាពិសេសពាក់ព័ន្ធនឹងកាតព្វកិច្ចពន្ធផ្សេង»។
ទំហំទីផ្សារសរុបនៃការធ្វើពាណិជ្ជកម្មតាមប្រព័ន្ធអេឡិចត្រូនិក ក្នុងឆ្នាំ ២០២២ ត្រូវរំពឹងថា នឹងកើនដល់ ១ ១១៧,២៩ លានដុល្លារ, កើនដល់ ១ ២៨៧,២៣ លានដុល្លារក្នុងឆ្នាំ ២០២៣ កើនដល់ ១ ៥០៩,៨៦ លានដុល្លារ ក្នុងឆ្នាំ ២០២៤ និងដល់ ១ ៧៨២,៣៤ លានដុល្លារក្នុងឆ្នាំ ២០២៥៕