.jpg)
ភ្ញៀវទេសចរជាតិ-អន្តរជាតិ ចូលទស្សនាប្រាសាទអង្គរវត្ត នាពេលកន្លងទៅ។ ហេង ជីវ័ន
ភ្នំពេញៈ ចំណូលពីការលក់សំបុត្រឱ្យភ្ញៀវទេសចរបរទេសទៅកាន់រមណីយដ្ឋានអង្គរ ក្នុងឆមាសទី១ ឆ្នាំ ២០២២ មានទឹកប្រាក់ជាង ២,៤ លានដុល្លារ កើនជាង ១ ០០០ ភាគរយ បើធៀបរយៈពេលដូចគ្នាឆ្នាំ ២០២១ ខណៈមន្ត្រីអះអាងថា ជាសញ្ញាវិជ្ជមាននៃការត្រឡប់មកវិញនៃភ្ញៀវបរទេស បើទោះបីជាចំនួននៅមានកម្រិតទាបក៏ដោយ។
សេចក្តីប្រកាសព័ត៌មានរបស់គ្រឹះស្ថានអង្គរចេញផ្សាយក្នុងថ្ងៃទី ១ ខែ កក្កដា បង្ហាញថា ចាប់ពីខែមករា ដល់ខែឧសភា ឆ្នាំ ២០២១ ទេសចរបរទេសចូលមកទស្សនារមណីយដ្ឋានអង្គរមានចំនួនសរុប ៥៩ ៩៨៣ នាក់ កើនជាង ១ ០០០ ភាគរយ ខណៈចំណូលទទួលបានសរុប ២ ៤២០ ០៨១ ដុល្លារ កើនជាង ១ ០០០ ភាគរយ បើធៀបរយៈពេលដូចគ្នានៅក្នុងឆ្នាំ ២០២១។ ដោយឡែកចំណូលបានពីការលក់សំបុត្រចូលទស្សនាប្រាសាទកោះកេរវិញ បានសរុប ១៥ ៩៩០ ដុល្លារ ស្មើទេសចរចំនួន ១ ០៦៦ នាក់។
លោក ឡុង កុសល អ្នកនាំពាក្យអាជ្ញាធរជាតិអប្សរា បានប្រាប់ ភ្នំពេញ ប៉ុស្តិ៍ថា ថ្វីដ្បិតតែចំណូល និងចំនួនទេសចរនៅមានចំនួនតិចតួចបើធៀបនឹងមុនពេលមានជំងឺកូវីដ ១៩ ប៉ុន្តែកំណើននេះជាសញ្ញានៃការវិលត្រឡប់របស់ភ្ញៀវទេសចរ បន្ទាប់ពីវិបត្តិកូវីដ ១៩។ លោកបន្ថែមថា នេះជាសញ្ញាវិជ្ជមានសម្រាប់ទេសចរណ៍ក្នុងខេត្តសៀមរាប ដែលបង្ហាញថា អង្គរនៅតែជាតំបន់មានសក្តានុពលក្នុងការទាក់ទាញភ្ញៀវទេសចរ។
លោកបញ្ជាក់ថា៖ «អ្វីដែលសំខាន់ គឺការបង្កើននូវទំនុកចិត្តក្នុងការមកទស្សនារបស់ភ្ញៀវ ដែលនេះជាចំណុចសំខាន់នៅក្នុងការគ្រប់គ្រងរៀបចំអភិវឌ្ឍវិស័យទេសចរណ៍។ ការបង្កើនទំនុកចិត្តនេះ គឺតាមរយៈការរក្សាសុវត្ថិភាព, ការផ្តល់នូវការទស្សនាកម្សាន្តដោយភាពរីករាយ និងប្លែកភ្នែក, ការរៀបចំវង់ទស្សនាចរ និងលំហូរនៃភ្ញៀវទេសចរពីកន្លែងមួយទៅមួយកាន់តែមានប្រសិទ្ធភាព»៕
វីដេអូ៖
