.jpg)
លោក គង់ ម៉ារី (ស្ដាំ) និងលោកស្រី ជា សិរី ក្នុងពិធីចុះហត្ថលេខាលើអនុស្សរណៈនៃការយោគយល់ និងការប្រកាសដាក់ឱ្យដំណើរការកម្មវិធី CamDigiKey ជំនាន់ ២.០ កាលពីថ្ងៃទី ៤ ខែ កក្កដា ឆ្នាំ ២០២២។
ភ្នំពេញៈ កម្ពុជាបានបង្កើតប្រព័ន្ធសម្គាល់អត្តសញ្ញាណអតិថិជនឌីជីថល (e-KYC) សម្រាប់ផ្ទៀងផ្ទាត់ និងផ្គូផ្គង ឬកំណត់អត្តសញ្ញាណអតិថិជន ដើម្បីចៀសវាងហានិភ័យក្នុងការក្លែងបន្លំ និងការប្រព្រឹត្តបទល្មើសបច្ចេកវិទ្យាផ្សេងៗទៀត នៅពេលអតិថិជនបើកគណនីប្រើប្រាស់ប្រព័ន្ធបាគង។
ការរៀបចំប្រព័ន្ធសម្គាល់អត្តសញ្ញាណអតិថិជន e-KYC នេះ ត្រូវបានធ្វើឡើងរវាងធនាគារជាតិនៃកម្ពុជា និងមជ្ឈមណ្ឌលបណ្តុះធុរកិច្ចថ្មី «តេជោ» នៃក្រសួងសេដ្ឋកិច្ច និងហិរញ្ញវត្ថុដែលត្រូវបានប្រកាសនៅក្នុងពិធីចុះហត្ថលេខាលើអនុស្សរណៈនៃការយោគយល់ និងការប្រកាសដាក់ឱ្យដំណើរការកម្មវិធី CamDigiKey ជំនាន់ ២.០ កាលពីថ្ងៃទី ៤ ខែ កក្កដា ឆ្នាំ ២០២២។
លោក គង់ ម៉ារី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួងអនុវត្តប្រព័ន្ធសម្គាល់អត្តសញ្ញាណអតិថិជនឌីជីថលបានឱ្យដឹងថា ការចុះអនុស្សរណៈយោគយល់គ្នាជាមួយនឹងធនាគារជាតិនេះ គឺដើម្បីជំរុញការប្រើប្រាស់ e-KYC នៅក្នុងវិស័យហិរញ្ញវត្ថុ និងធនាគារ ស្របពេលដែលកម្មវិធីទូរស័ព្ទ CamDigiKey ជំនាន់ ២.០ ដាក់ឱ្យដំណើរការដែលជាយន្តការផ្ទៀងផ្ទាត់អត្តសញ្ញាណបុគ្គលនៃថ្នាល e-KYC។
លោកបានបន្ថែមថា យន្តការសម្រាប់ការចូលទៅប្រើប្រាស់សេវាភាគច្រើន គឺជាការ Log in ដោយប្រើប្រាស់ Username និង Password ដែលជាហេតុធ្វើឱ្យសេវាមួយត្រូវមានគណនីមួយ ហើយគណនីនោះមិនអាចបញ្ជាក់អំពីអត្តសញ្ញាណពិតប្រាកដបានឡើយ។
លោកបញ្ជាក់ថា៖ «កន្លងទៅវិស័យឯកជន ពិសេសវិស័យធនាគារបានលើកសំណើមករាជរដ្ឋាភិបាល តាមរយៈវេទិការដ្ឋាភិបាលផ្នែកឯកជន ដើម្បីអាចផ្ទៀងផ្ទាត់អត្តសញ្ញាណអតិថិជនរបស់ខ្លួន តាមរយៈការតភ្ជាប់មកកាន់ទិន្នន័យរបស់រដ្ឋ។ តបតាមសំណើនេះក្រសួងសេដ្ឋកិច្ចក៏បានរៀបចំជាប្រព័ន្ធ e-KYC ឡើង ដើម្បីប្រើប្រាស់ជាយន្តការក្នុងការតភ្ជាប់ជាមួយព័ត៌មានអត្តសញ្ញាណកម្មរបស់ក្រសួងមហាផ្ទៃ»។
លោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជាបានប្រាប់ថា បច្ចុប្បន្នគ្រឹះស្ថានធនាគារ និងហិរញ្ញវត្ថុដែលចុះឈ្មោះអតិថិជនប្រើប្រាស់ប្រព័ន្ធបាគងបានអនុវត្តនីតិវិធីផ្ទៀងផ្ទាត់អត្តសញ្ញាណអតិថិជន (e-KYC) តាមវិធីសាស្ត្រ Manual Approach នៅតាមបញ្ជររបស់គ្រឹះស្ថាន ឬកំណត់អត្តសញ្ញាណអតិថិជនតាមវិធានដោយឡែកពីគ្នារបស់គ្រឹះស្ថាននីមួយៗ។
ទោះបីយ៉ាងណា លោកស្រីបន្ថែមថា ការអនុវត្តបែបនេះជាវិធីសាស្ត្របែបប្រពៃណីនៅពុំទាន់មានភាពងាយស្រួល នឹងអាចបង្កឱ្យមានហានិភ័យក្នុងការក្លែងបន្លំ និងការប្រព្រឹត្តបទល្មើសបច្ចេកវិទ្យាផ្សេងៗទៀត។
លោកស្រីបញ្ជាក់ថា៖ «អនុស្សរណៈនេះ ផ្តោតសំខាន់លើចំណុចចម្បងៗដូចជា ការរៀបចំកសាងប្រព័ន្ធសម្គាល់អត្តសញ្ញាណអតិថិជនឌីជីថលក្នុងវិស័យធនាគារ និងហិរញ្ញវត្ថុ, ការចូលរួមសាកល្បងអនុវត្ត និងប្រើប្រាស់ប្រព័ន្ធសម្គាល់អត្តសញ្ញាណអតិថិជនឌីជីថល និងចែករំលែកបទពិសោធទៅវិញទៅមកទាំងទិដ្ឋភាពបច្ចេកទេស ទិដ្ឋភាពធុរកិច្ចក្នុងប្រព័ន្ធសម្គាល់អត្តសញ្ញាណអតិថិជនឌីជីថល»៕
