.jpg)
ទិដ្ឋភាពទឹកជ្រោះប៊ូស្រា ក្នុងខេត្តមណ្ឌលគិរី។ ហុង មិនា
ភ្នំពេញៈ ចក្ខុវិស័យសំខាន់ៗចំនួន ៤ ត្រូវបានកំណត់សម្រាប់ការអនុវត្តរយៈពេលវែង (ឆ្នាំ២០២១-២០៣៥) ក្នុងផែនការមេអភិវឌ្ឍន៍ទេសចរណ៍ខេត្តមណ្ឌលគិរី ដើម្បីប្រែក្លាយទីនោះទៅជាគោលដៅអេកូទេសចរណ៍លំដាប់អន្តរជាតិ និងជាខេត្តដ៏សំខាន់ក្នុងការផ្គត់ផ្គង់ផ្កា បន្លែ ផ្លែឈើ និងសាច់ សម្រាប់បំពេញតម្រូវការក្នុងស្រុក និងឈានដល់ការនាំចេញ។ នេះបើយោងតាម លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍នៃក្រសួងទេសចរណ៍។
ការលើកឡើងរបស់ លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ និងជាប្រធានលេខាធិការដ្ឋានគណៈកម្មាធិការដឹកនាំផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី (គ.ដ.ផ.ម) ត្រូវបានធ្វើឡើងក្នុងពិធីផ្សព្វផ្សាយសមាសភាពនៃគណៈកម្មាធិការដឹកនាំផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី (គ.ដ.ផ.ម) អមជាមួយការប្រកាសផែនការសកម្មភាពនៃផែនការមេអភិវឌ្ឍន៍ទេសចរណ៍ខេត្តមណ្ឌលគិរី កាលពីថ្ងៃទី៤ ខែ កក្កដា ឆ្នាំ ២០២២ នៅខេត្តមណ្ឌលគិរី។
លោកបញ្ជាក់ថា៖ «ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ត្រូវបានកំណត់ចក្ខុវិស័យក្របខ័ណ្ឌអនុវត្តរយៈពេលវែង (២០២១-២០៣៥) ដោយឈរលើចក្ខុវិស័យសំខាន់ចំនួន ៤»។
យោងតាមលោក ជំនោរ ចក្ខុវិស័យសំខាន់ទាំង ៤ រួមមាន ខេត្តមណ្ឌលគិរី ត្រូវបានកំណត់ជាគោលដៅអេកូទេសចរណ៍លំដាប់អន្តរជាតិ និងជាខេត្តដ៏សំខាន់ក្នុងការផ្គត់ផ្គង់ផ្កា បន្លែ ផ្លែឈើ និងសាច់សម្រាប់បំពេញតម្រូវការក្នុងប្រទេស និងឈានដល់ការនាំចេញ, ឆ្នាំ ២០៣៥ ចំនួនភ្ញៀវទេសចរអន្តរជាតិមកកាន់ខេត្តមណ្ឌលគិរីនឹងកើនឡើងដល់ ៩០ ម៉ឺននាក់ ខណៈចំនួនភ្ញៀវទេសចរក្នុងស្រុកនឹងកើនដល់ប្រមាណ ២ លាននាក់ បង្កើតការងារបាន ៨ម៉ឺនកន្លែង និងបង្កើតចំណូលដោយផ្ទាល់ប្រមាណ ៥០០ លានដុល្លារ និងដោយប្រយោល ១ ០០០ លានដុល្លារ, ការរួមចំណែកធ្វើឱ្យភូមិភាគឦសាន ដែលមានខេត្តមណ្ឌលគិរីជាស្នូល ក្លាយជាប៉ូលសេដ្ឋកិច្ចទី៤ និងធ្វើសមាហរណកម្មខេត្តមណ្ឌលគិរីជាមួយតំបន់ផ្សេងក្នុងប្រទេស និងក្នុងតំបន់, និងរក្សាតុល្យភាពឱ្យបានម៉ឺងម៉ាត់រវាងការអភិវឌ្ឍសេដ្ឋកិច្ច ទេសចរណ៍ និងអន្តរវិស័យគាំទ្រ ជាមួយការអភិរក្សធនធានធម្មជាតិ បេតិកភណ្ឌវប្បធម៌ ជនជាតិដើមភាគតិច ធានាបានផ្លែផ្កានៃការអភិវឌ្ឍសេដ្ឋកិច្ចសង្គមជាអតិបរមា។
រដ្ឋមន្ត្រីក្រសួងទេសចរណ៍ លោក ថោង ខុន បាននិយាយថា ផែនការមេនេះនឹងក្លាយជាឯកសារយុទ្ធសាស្ត្រដ៏សំខាន់ក្នុងការជំរុញការអភិវឌ្ឍវិស័យទេសចរណ៍ខេត្តមណ្ឌលគិរី ក៏ដូចជាតំបន់ភាគឦសានទាំងមូល ពិសេសរួមចំណែកធ្វើឱ្យតំបន់ភាគឦសានក្លាយជាប៉ូលសេដ្ឋកិច្ចទី៤ របស់កម្ពុជា។
លោកថ្លែងថា៖ «ដើម្បីជំរុញការអនុវត្តផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ប្រកបដោយប្រសិទ្ធភាព និងប្រសិទ្ធផល ខ្ញុំសូមឱ្យក្រសួងស្ថាប័នពាក់ព័ន្ធយកខ្លឹមសារ និងផែនការសកម្មភាពរយៈពេលខ្លី មធ្យម និងវែងដែលបានកំណត់ក្នុងផែនការមេនេះបញ្ចូលទៅក្នុងផែនការសកម្មភាពរបស់ខ្លួន ដើម្បីរួមចំណែកសម្រេចឱ្យបានលទ្ធផលដូចបានកំណត់នៅក្នុងផែនការមេ ដោយឈរលើស្មារតីបុរេសកម្ម និងការទទួលខុសត្រូវខ្ពស់ ព្រោះក្រសួងទេសចរណ៍ ពិតជាមិនមានលទ្ធភាពគ្រប់គ្រាន់ក្នុងការសម្រេចឱ្យបានលទ្ធផលតាមផែនការដែលមានលក្ខណៈសមាហរណកម្មនេះទេ»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់ ភ្នំពេញ ប៉ុស្ត៍ថា តាមរយៈផែនការមេនេះ ខេត្តមណ្ឌលគិរីនឹងក្លាយជាកន្លែងកម្សាន្តថ្មីមួយបន្ថែមទៀតដែលនឹងជួយធ្វើឱ្យរយៈពេលការស្នាក់នៅរបស់ភ្ញៀវបរទេសនៅកម្ពុជាយូរជាងមុន។
លោកស្រីថ្លែងថា៖ «ផែនការមេនេះ នឹងជួយឱ្យកម្ពុជាទាក់ទាញភ្ញៀវដែលនិយមចូលចិត្តធម្មជាតិចូលមកកម្សាន្តកាន់តែច្រើន បន្ថែមលើតំបន់ប្រាសាទ និងសមុទ្រ»។
បច្ចុប្បន្នក្រៅពីកិច្ចការខាងលើរដ្ឋាភិបាលក៏បានអនុញ្ញាតឱ្យកសាងព្រលានយន្តហោះខេត្តមណ្ឌលគិរី ដើម្បីទាក់ទាញទេសចរ និងការតភ្ជាប់ពីគោលដៅទេសចរណ៍នានានៅក្នុងប្រទេសទៅទីនោះផងដែរ៕
