ភ្នំពេញៈ អ្នកសេដ្ឋកិច្ច និងអ្នកជំនួញអះអាងថា កំណើនទឹកប្រាក់ដែលកម្ពុជាចំណាយលើការនាំចូលទំនិញពីប្រទេសចិន ដែលមានរហូតដល់ជាង ១/៣ នៃចំនួនទឹកប្រាក់សរុបនៃការនាំចូលរបស់កម្ពុជាក្នុងឆមាសទី១ ឆ្នាំ ២០២២ កំពុងចូលរួមចំណែកសំខាន់ក្នុងការរក្សានិរន្តរភាពការងារ និងជំរុញកំណើនសេដ្ឋកិច្ចកម្ពុជាឱ្យកាន់តែរឹងមាំ។
តារាងស្ថិតិទំនិញពាណិជ្ជកម្មនាំចូលរបស់អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ក្នុងរយៈពេល ៦ ខែ ដំបូងឆ្នាំ ២០២២ កម្ពុជាបាននាំចូលទំនិញពីក្រៅប្រទេសសរុបចំនួន ១៥ ៨៦៤,៧២ លានដុល្លារ ក្នុងនោះប្រទេសចិន មានចំនួន ៥ ៣៧៤,២៨ លានដុល្លារ កើនឡើង ២៤,២ ភាគរយ បើធៀបនឹងរយៈពេលដូចគ្នាឆ្នាំ ២០២១ ដែលមានចំនួន ៤ ៣២៧,៩៩ លានដុល្លារ។
បើយោងតាមតារាងខាងលើទឹកប្រាក់ការនាំចូលទំនិញពីប្រទេសចិន គឺស្មើនឹង ៣៣,៩ ភាគរយ នៃទំហំទឹកប្រាក់នាំចូលសរុបរបស់កម្ពុជា និងបាននាំមុខប្រទេសវៀតណាម ដែលមានតម្លៃចំនួន ២ ០៨៦,៤៣ លានដុល្លារ (១៣,២ ភាគរយ), សិង្ហបុរី ២ ០១៦,៧ លានដុល្លារ (១២,៧ ភាគរយ), ថៃ ១ ៨០១,៣២ លានដុល្លារ (១១,៤ ភាគរយ), ព្រមទាំងប្រទេសដែនដីមួយចំនួនទៀតដូចជា ហុងកុង, តៃវ៉ាន់, ជប៉ុន, ម៉ាឡេស៊ី, ឥណ្ឌូនេស៊ី, ស្វ៊ីស, កូរ៉េ, និងអាមេរិកជាដើម។
ប្រធានមជ្ឈមណ្ឌលសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ១៤ ខែកក្កដាថា ជាធម្មតាការធ្វើពាណិជ្ជកម្មអន្តរជាតិរបស់ប្រទេសមួយ គឺគេមិនអាចមើលតែទៅលើការនាំចូលនាំចេញទំនិញលក្ខណៈទ្វេភាគីបានទេ ដោយគេត្រូវមើលគ្រប់ទិដ្ឋភាពនៃការដោះដូរពាណិជ្ជកម្មជាមួយប្រទេសដៃគូទាំងអស់។ ចំនួនទឹកប្រាក់ដ៏ច្រើនដែលកម្ពុជានាំចូលទំនិញ (ភាគច្រើនវត្ថុធាតុដើម) ពីប្រទេសចិន គឺជាធាតុផ្សំសម្រាប់ជួយឱ្យកម្ពុជាបង្កើនសមត្ថភាពនាំចេញទំនិញពិសេសវិស័យវាយនភណ្ឌ។ លោកបន្តថា ពេលនេះការនាំចូលពីប្រទេសចិន មានបរិមាណច្រើន ប៉ុន្តែកន្លងមកកម្ពុជាក៏បាននាំចូលទំនិញច្រើនពីប្រទេសជិតខាងដូចជាថៃ និងវៀតណាមដែរ។
លោកថ្លែងថា៖ «កំណើនទឹកប្រាក់នាំចូលទំនិញពីប្រទេសចិន នាពេលនេះ គឺជាការធ្វើពិពិធកម្មទីផ្សារនាំចូលរបស់កម្ពុជាតាមរយៈការស្វែងរកប្រភពណាដែលអាចផ្គត់ផ្គង់ទំនិញឱ្យកម្ពុជាស្របតាមការចង់បាន និងមានតម្លៃសមរម្យ។ នៅពេលថ្លៃដើមផលិតទាប វាក៏ជួយលើកកម្ពស់ភាពប្រកួតប្រជែងសម្រាប់ការនាំចេញទំនិញពីកម្ពុជាទៅលក់នៅទីផ្សារអន្តរជាតិផងដែរ»។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ថា ប្រទេសចិន កំពុងចូលរួមចំណែកយ៉ាងច្រើនក្នុងការផ្គត់ផ្គង់វត្ថុធាតុដើមមកឱ្យរោងចក្រនៅកម្ពុជាសម្រាប់ផលិត ឬកែច្នៃដើម្បីនាំចេញទៅទីផ្សារអន្តរជាតិ ពិសេសក្នុងវិស័យវាយនភណ្ឌ។ វិស័យវាយនភណ្ឌត្រូវបានចាត់ទុកថា ជាវិស័យអាទិភាពមួយដែលបានចូលរួមចំណែកក្នុងការជួយទ្រទ្រង់កំណើនសេដ្ឋកិច្ចកម្ពុជា និងរក្សានិរន្តរភាពការងារ ពិសេសក្នុងអំឡុងពេលពិភពលោកជួបនឹងវិបត្តិនៃការឆ្លងរាលដាលជំងឺកូវីដ ១៩។
លោកបន្ថែមថា ទំនិញដែលកម្ពុជានាំចូលពីប្រទេសចិន ភាគច្រើនជាក្រណាត់ អំបោះ និងសម្ភារប្រើប្រាស់មួយចំនួនទៀត ដែលភាគច្រើនបម្រើឱ្យវិស័យវាយនភណ្ឌ។
លោកលើកឡើងថា៖ «ទោះបីការនាំមកពីចិនមានទឹកប្រាក់ច្រើនក៏ដោយ វាមិនមែនជារឿងគួរឱ្យបារម្ភទេ ព្រោះភាគច្រើននៃទំនិញទាំងនោះ គឺត្រូវបានប្រើប្រាស់សម្រាប់ផលិត ឬកែច្នៃយកទៅលក់នៅទីផ្សារអន្តរជាតិវិញ»។
ក្នុងឆ្នាំ ២០២១ ប្រទេសកម្ពុជា បាននាំចូលទំនិញពីប្រទេសចិន ក្នុងតម្លៃសរុប ៩ ៦៨៤,៣៤ លានដុល្លារ កើន ៣៦,៥ ភាគរយ បើធៀបនឹងឆ្នាំ ២០២០ និងការនាំទំនិញពីកម្ពុជាទៅប្រទេសចិន មាន ១ ៥១០,៥៣ លានដុល្លារកើនឡើង ៣៨,៨ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕