ភ្នំពេញៈ លោក​នាយករដ្ឋមន្ត្រី ហ៊ុន សែន បាន​លើក​ឡើង​ថា ក្នុង​ករណី​ប្រទេស​ចិន​ជំរុញ​ការ​ងើប​ឡើង​វិញ និង​ដក​ចេញ​នូវ​គោល​នយោបាយ សេរ៉ូ​កូវីដ ១៩ របស់​ខ្លួន​ កម្ពុជា​អាច​នឹង​មាន​កំណើន​ទេសចរ​ច្រើន​ដូចការ​រំពឹង​ទុក ស្រប​ពេល​​ប្រទស​ទាំង ២ កំពុង​បង្កើន​ជើង​ហោះហើរ​កាន់​តែ​ច្រើន​ជាមួយ​គ្នា។

នៅ​​ក្នុង​ពិធី​បិទ​សន្និបាត​បូកសរុប​ការងារ​ទេសចរណ៍ ការ​បូក​សរុប​ផែនការ​ស្តារ និង​លើក​ស្ទួយ​វិស័យ​ទេសចរណ៍​កម្ពុជា ក្នុង​ និង​ក្រោយ​វិបត្តិ​នៃ​ជំងឺ​កូវីដ ១៩ ដំណាក់​កាល​ទី ១ (ឆ្នាំ​២០២០-​២០២១) និង​ឆមាស ទី ១ ឆ្នាំ​២០២២ និង​លើក​ទិសដៅ​ផែនការ​ស្តារ​ឡើង​វិញ​វិស័យ​​ទេសចរណ៍​ក្នុង​ដំណាក់កាល​ទី ២ (​ឆមាស​ទី ២ ឆ្នាំ​២០២២-​២០២៣) កាល​ពី​ថ្ងៃទី ១៤ ខែ​កក្កដា លោក​នាយក​​រដ្ឋមន្ត្រី ហ៊ុន សែន បាន​និយាយ​​​ថា ដូច​ដឹង​ហើយ​ថា​ ប្រទេស​ជា​ច្រើន មិន​ថា​តំបន់​អាស៊ី និង​អឺរ៉ុប​ទេ គឺ​សុទ្ធតែ​ត្រូវ​ការ​ទេសចរ​ចិន ប៉ុន្តែ​នៅ​ពេល​ដែល​ចិន​អនុវត្ត​វិធានការ​សូន្យ​កូវីដ​នេះ បាន​ធ្វើ​ឱ្យ​មាន​ផល​ប៉ះពាល់​​​លើ​បញ្ហា​ការ​ដឹក​ជញ្ជូន និង​ការ​ធ្វើ​ដំណើរ​​របស់​ប្រជាជន​​ចិន។ ក្នុង​នោះ​កម្ពុជា ក៏​ទទួល​រង​ផល​ប៉ះពាល់​ពី​នយោបាយ​គ្មាន​កូវីដ​របស់​ចិន​នេះដែរ។

លោក​បន្ថែម​​ទៀត​ថា ទោះ​បី​យ៉ាង​ណា​ការ​សម្រេច​ដក​ចេញ​នូវ​គោល​នយោបាយ​សេរ៉ូ​កូវីដ ១៩​ របស់​ចិន​នេះ នៅ​មិន​ទាន់​ប្រាកដ​ប្រជា​នោះ​ទេ ដូច្នេះ​កម្ពុជា​ត្រូវ​តាម​ដាន និង​វាយតម្លៃ​សភាពការណ៍​នេះ​ឱ្យ​បាន​ជាប្រចាំ និង​​ត្រូវ​បង្វែរ​ទិសដៅ​មក​ជំរុញ​ទេសចរណ៍​ផ្ទៃក្នុង។

លោក​​​បញ្ជាក់​ថា៖​«ទេសចរ-​​ផ្ទៃ​ក្នុង​បាន​រួម​ចំណែក​យ៉ាង​ធំ​ក្នុង​ដំណាក់​កាល​នៃ​ការស្តារ​ឡើង​វិញ ក្នុង​ពេល​ដែល​យើង​អនុវត្ត​វិធានការ​រស់នៅ​តាម​គន្លង​ថ្មី ដោយ​យើង​ទទួល​បាន​ទេសចរ​ក្នុង​ ១ អាទិត្យ​ប្រមាណ ៣០ ម៉ឺន​នាក់ ដែល​វាបាន​​ផ្តល់​ឱកាស​ឱ្យ​ប្រជាពលរដ្ឋ​កម្ពុជា ស្គាល់​ទឹកដី​របស់​ខ្លួន ជា​ជាង​ទៅ​​ស្គាល់​នៅ​ប្រទេស​ក្រៅ»។

លោក​នាយក​រដ្ឋមន្ត្រី​បាន​បន្ត​ថា ដើម្បី​ជំរុញ​ទេសចរ​ផ្ទៃ​ក្នុង​បន្ថែម គឺត្រូវ​មាន​ហេដ្ឋា​រចនាសម្ព័ន្ធ​គាំទ្រ​​វិស័យ​​ទេសចរណ៍​ផ្ទៃក្នុង​ឱ្យ​​​​រីក​ចម្រើន​​ដែរ ដោយ​ត្រូវ​ការ​ភ្ជាប់​ផ្លូវ​ទៅ​​​តំបន់​ទេសចរណ៍​ថ្មី, រៀបចំ​ទឹកស្អាត​,អគ្គិ-សនី​និង​សេវា​ទូរស័ព្ទ​ជាដើម។

រដ្ឋ​មន្ត្រី​ក្រសួង​ទេសចរណ៍ លោក ថោង ខុន បាន​ឱ្យដឹង​​ថា ចំពោះ​តំបន់​អាស៊ាន​សកម្មភាព​ទេសចរណ៍​អន្តរជាតិ​បាន​ចាប់ផ្តើម​មាន​សម្ទុះ​ឡើង​វិញ​នៅ​ឆ្នាំ ២០២២ នេះ​ដោយ​ប្រទេស​ក្នុង​តំបន់​អាស៊ាន​បាន​បើក​ទទួល​ទេសចរ​អន្តរជាតិ​ឡើង​វិញ​ជា​បណ្តើរៗ ដែល​ក្នុង​នោះ​កម្ពុជា​ជា​ប្រទេស​ដំបូង​គេ​ក្នុង​អាស៊ាន ដែល​​បើក​ប្រទេស​ទទួល​​ទេសចរ​អន្តរជាតិ​ឡើង​វិញ។

លោក​​បន្ថែម​ថា តាម​ការ​ប៉ាន់ស្មាន​ពេញ​ ១ ឆ្នាំ ២០២២ នេះ កម្ពុជា​អាច​​ទទួល​បាន​ទេសចរ​អន្តរជាតិ​ប្រមាណ ១ លាននាក់ ឬ​ច្រើន​ជាង​នេះ និង​​ប្រមាណ ២ ​​លាន​នាក់​​ក្នុង​ឆ្នាំ ២០២៣។ ដោយ​ផ្អែក​លើ​ការវិវត្ត​នៃ​ចរន្ត​ទេសចរណ៍​អន្តរជាតិ នៅ​កម្រិត​​សកល​លោក និង​កម្រិត​តំបន់ ក្នុង​នោះ​កំណើន​នៃការ​មក​ដល់​របស់​ភ្ញៀវទេសចរ​អន្តរជាតិ​នៅ​កម្ពុជា​នឹង​ត្រូវ​ពឹង​ផ្អែក​ខ្លាំង​លើ​កត្តា​ខាង​ក្រៅ ពិសេស​ទិន្នាការ​នៃ​ការ​ធ្វើ​ដំណើរ​ចេញ​ក្រៅ​ប្រទេស​នៃ​ប្រភព​ទីផ្សារ ទេសចរណ៍​សំខាន់ៗ​របស់​កម្ពុជា និង​កត្តា​ខាង​ក្នុង​ផងដែរ។

លោក​​លើកឡើង​​​​ថា៖ «ករណី​សភាព​ការណ៍​ទេសចរណ៍​ក្នុង​តំបន់ និង​សកល​​លោក​កាន់​តែ​មាន​ភាព​ល្អប្រសើរ ដោយ​មាន​ការ​សម្រួល​ការ​ធ្វើ​ដំណើរ​បន្ថែម​ទៀត (ពិសេស​ការ​ដក​ចេញ​នូវ​គោល​នយោបាយ​គ្មាន​កូវីដ ១៩ [Zero-Covid Policy] របស់​ប្រទេស​ចិន នៅ​ក្នុង​ឆ្នាំ ២០២៣ ខាងមុខ) វិស័យ​ទេសចរណ៍ នៅ​កម្ពុជា​រំពឹង​ថា​អាច​នឹង​ងើប​ឡើង​វិញ និង​ទទួល​បាន​ទេសចរ​អន្តរជាតិ ប្រមាណ ៧ លាន​នាក់​នៅ​ឆ្នាំ ២០២៧»។

វិស័យ​ឯកជន​រំពឹង​ថា បើសិន​​ចិន​អាច​ដកចេញ​គោល​នយោបាយ​គ្មាន​កូវីដ និង​បង្កើន​ជើងហោះ​មក​​កម្ពុជា​ថែម​ទៀត​នោះ នឹង​ជំរុញ​លំហូរ​ទេសចរ​ និង​វិនិ​យោគិន​ចិន​កាន់​តែច្រើន ដោយ លោក ឌិន សុមេធារិទ្ធិ ប្រធាន​សមាគម​សណ្ឋាគារ​កម្ពុជា បាន​និយាយ​​ថា ទេសចរ​ចិន គឺជា​ទីផ្សារ​ដ៏ធំ​សម្រាប់​កម្ពុជា ដែល​ស្មើ​នឹង​មួយ​ភាគបី​នៃ​ទេសចរ​អន្តរជាតិ​សរុប​ដែល​មក​កម្សាន្ត​នៅ​កម្ពុជា។

លោក​​បានបញ្ជាក់​ថា៖​«​ការ រឹត​បន្តឹង​ការ​ចេញ​ចូល​របស់​ប្រទេស​ចិន​ បាន​ធ្វើ​ឱ្យ​កម្ពុជា​នៅ​បន្ត​ជួប​ការ​លំបាក​ ទោះ​ជា​កម្ពុជា​ខ្លួន​ឯង​បាន​បើក​ទូលាយ​​ហើយ​ក៏ដោយ។ ប្រសិន​បើ​ចិន​បើក​ទូលាយ​ឡើង​វិញ​យើង​ចំណេញ​ច្រើន ទាំង​ទេសចរណ៍ ទាំង​ការ​វិនិយោគ»៕