.jpg)
កសិករដឹកពោតក្រហមយកទៅលក់ឱ្យឈ្មួញក្នុងខេត្តបន្ទាយមានជ័យ។ ហេង ជីវ័ន
ភ្នំពេញៈ កម្ពុជានាំចេញគ្រាប់ពោតប្រមាណជាង ៨៤ ពាន់តោនក្នុងឆមាសទី ១ ឆ្នាំ ២០២២ ថយចុះជាង ៣៩ ភាគរយ បើធៀបរយៈពេលដូចគ្នាឆ្នាំ ២០២១ ខណៈបច្ចុប្បន្នការនាំចេញតាមច្រកក្នុងខេត្តបាត់ដំបងកំពុងមានការរាំងស្ទះ។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទស្តីពីស្ថានភាពនៃការនាំចេញកសិផលក្នុងឆមាសទី ១ ឆ្នាំ ២០២២ នេះការនាំចេញកសិផលទៅក្រៅប្រទេសមានបរិមាណសរុប ៥ ០៣៥ ៤២៥,២៥ តោន (នាំទៅ ៦៥ ប្រទេស) ដោយកើនឡើងចំនួន ៥៨១ ៣៧៤,៤០ តោន ស្មើ ១៣,០៥ ភាគរយបើធៀបនឹងរយៈពេលដូចគ្នាក្នុងឆ្នាំ ២០២១ ដែលទទួលបានត្រឹមតែ ៤ ៤៥៤ ០៥០,៨៥ តោន។
នៅក្នុងចំណោមផលិតផលដែលបាននាំចេញគឺគ្រាប់ពោតមានចំនួន ៨៤ ៨៩៨,៩០ តោនធ្លាក់ចុះ ៣៩,៦៥ ភាគរយ បើធៀបនឹងរយៈពេលដូចគ្នាឆ្នាំ ២០២១។ ក្នុងនោះការនាំចេញទៅប្រទេសវៀតណាមចំនួន ៧៦ ៥៤០ តោន, ប្រទេសថៃចំនួន ៧ ៥០០ តោន កោះតៃវ៉ាន់ ៨៤៦,៦០ តោន និងកូរ៉េ ១២,៣០ តោន។
លោក ឈឹម វជិរា ប្រធានមន្ទីរកសិកម្មខេត្តបាត់ដំបងបានប្រាប់ភ្នំពេញ-ប៉ុស្តិ៍ក្នុងសប្តាហ៍នេះថា ក្នុងរដូវប្រមូលផលពោតលើកទី ១ នេះ ខេត្តបាត់ដំបងបាននាំពោតទៅលក់ជាបន្តបន្ទាប់ ដែលមានប្រមាណ ២ ០០០ តោនក្នុង ១ ថ្ងៃ។
លោកបន្ថែមថា ការនាំចេញកន្លងមក គឺពេលខ្លះខាងម្ចាស់សៃឡូនៅក្នុងស្រុកនីមួយៗជាអ្នកប្រមូលទិញ និងយកទៅលក់នៅថៃ និងពេលខ្លះទៀតឈ្មួញថៃបានចូលមកទិញនៅតាមព្រំដែនដោយខ្លួនឯង ខណៈដែលតម្លៃហាក់ប្រសើរជាងឆ្នាំមុន (២០២១)។
លោកបានបញ្ជាក់ថា៖ «ដោយសារតែផលិតផលដំឡូងមីហាក់មានទីផ្សារជាងពោត មានកសិករខ្លះបានងាកមកដាំដំឡូងមីវិញ ដែលធ្វើឱ្យផ្ទៃដីដាំពោតមានការថយចុះបន្តិច។ ពោតមានតម្លៃល្អនៅឆ្នាំនេះ ដែលថ្លៃប្រមាណ ៧០០ រៀលក្នុង ១ គីឡូក្រាម»។
លោក ហេង សិទ្ធិ មន្ត្រីនៃការិយាល័យផែនការ និងស្ថិតិនៃមន្ទីរកសិកម្មខេត្តបាត់ដំបងបានឱ្យដឹងថា បច្ចុប្បន្នការប្រមូលផលពោតមានប្រមាណ ២០ ភាគរយនៃទំហំផ្ទៃដីជាង ៥៤ ពាន់ហិកតា ដោយ ១ ហិកតាអាចប្រមូលផលជាមធ្យមពី ៤ ទៅ ៥ តោន។
លោកបន្តថា មួយរយៈចុងក្រោយនេះការនាំចេញពោតទៅប្រទេសថៃកំពុងជួបបញ្ហាខ្លះ ដោយសារការហាមឃាត់រថយន្តរបស់ឈ្មួញថៃដែលដឹកពោតនាំចេញ និងការហាមឃាត់មិនឱ្យរថយន្តឈ្មួញថៃចូលមកវិញ ដោយសាររថយន្តរបស់ថៃអាចដឹកបានចន្លោះពី ៣០ ទៅ ៣៥ តោន តែច្បាប់អនុញ្ញាតឱ្យដឹកបានត្រឹមតែ ២០ ទៅ ២៥ តោនប៉ុណ្ណោះ។
លោកបាននិយាយថា៖ «មានរថយន្តឈ្មួញថៃមួយចំនួននៅបន្តរាំងស្ទះនៅតាមច្រកព្រំដែននៅឡើយ ដោយសារតែស្ថានីយថ្លឹងជញ្ជីងនៅព្រំដែនមិនអនុញ្ញាតឱ្យទៅ ព្រោះរថយន្តទាំងនោះដឹកធ្ងន់ប្រមាណ ៣៥ តោន។ យើងបារម្ភថាបើពោតមិនអាចនាំចេញទៅបានអាចធ្វើឱ្យតម្លៃពោតធ្លាក់ចុះ និងមានផលប៉ះពាល់ដល់ទីផ្សាររបស់កសិករ»។
លោក ទឹម ឡាង កសិករដាំពោតនៅស្រុកសំពៅលូន ខេត្តបាត់ដំបង បានឱ្យដឹងថា លោកទើបបញ្ចប់ការលក់ពោតថ្មីៗ ដែលមានប្រមាណជាង ៤០ តោនពីផ្ទៃដី ១០ ហិកតា និងលក់បានតម្លៃជាង ៦០ ម៉ឺនរៀលក្នុង ១ តោន។
លោកប្រាប់ថា៖ «តម្លៃពោតឆ្នាំនេះល្អជាងឆ្នាំមុន ដោយបានជាង ៦០ ម៉ឺនរៀលក្នុង ១ តោន ដែលតម្លៃនេះអាចទូទាត់ការចំណាយថ្លៃដើមបាន ដោយសារតែជី ពូជ និងប្រេងឥន្ធនៈសុទ្ធតែឡើងថ្លៃ។ ខ្ញុំលក់អស់ហើយកាលពីខែមុន ប៉ុន្តែឮថាអ្នកលក់ថ្មីៗនេះបានតម្លៃជាង ៥០ ម៉ឺនរៀលទេ ដោយសារតែការនាំចេញទៅហាក់ពិបាកបន្តិច»។
បើតាមលោក ទឹម ឡាង ចាប់ពីខែកក្កដា-សីហា ជាពេលចាប់ផ្តើមដាំដុះវគ្គទី ២ ហើយគេត្រូវចំណាយពេលជាង ៣ ខែ ដើម្បីប្រមូលផល។
តាមរបាយការណ៍ពីក្រសួងកសិកម្មនៅក្នុងឆ្នាំ ២០២១ ការនាំចេញគ្រាប់ពោតសម្រេចបាន ២០១ ៥៨៩,៣៤ តោន កើន ៣,៥៨ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២០៕
