​ភ្នំពេញៈ​ ផ្សារ​ខេ​ម​បូ​ឌា​ត្រេ​ដរ​បស់​ក្រសួងពាណិជ្ជកម្ម នឹងត្រូវ​ត​ភ្ជាប់​ជាមួយ​ប្រព័ន្ធ​ដឹកជញ្ជូន​សម្រាប់​ទីផ្សារ​ក្រៅប្រទេស​របស់​ក្រុមហ៊ុន DHL Cambodia ដើម្បី​ជួយ​សម្រួល​ដល់​សហគ្រាស​ធុន​តូច និង​មធ្យម (SMEs) ក្នុង​ការលក់ និង​នាំចេញ​ផលិតផល​កម្ពុជា​ទៅកាន់​ទីផ្សារ​អន្តរជាតិ​។​

​ផ្សារ​ខេ​ម​បូ​ឌា​ត្រេ​ដ នៃ​គម្រោង​អភិវឌ្ឍន៍​វិស័យ​ពាណិជ្ជកម្ម​តាម​ប្រព័ន្ធ​អេឡិចត្រូនិក​នៅ​កម្ពុជា (Go4eCAM) របស់​ក្រសួងពាណិជ្ជកម្ម កាល​ព្រឹក​ថ្ងៃទី ​១៣ ខែកក្កដា ឆ្នាំ​ ២០២២ បាន​ចុះហត្ថលេខា​លើ​កិច្ចព្រមព្រៀង​ភាពជា​ដៃគូ (Partnership Agreement) ក្នុង​ការតភ្ជាប់​ប្រព័ន្ធ​ដឹកជញ្ជូន​របស់​ក្រុមហ៊ុន DHL Cambodia ក្នុង​កិច្ចសហប្រតិបត្តិការ​ស​ម្រា​ប់​ការចែករំលែក​ចំណេះដឹង និង​ការបណ្ដុះបណ្ដាល​សម្រាប់ SMEs ដែល​បាន​ចុះឈ្មោះ​ជាមួយ​ផ្សារ​ខេ​ម​បូ​ឌា​ត្រេ​ដ​ទាក់ទង​នឹង​ការដឹកជញ្ជូន​ទំនិញ​។​

​លោកស្រី តឹក​រ៉េត កំរង រដ្ឋលេខាធិការ​ក្រសួងពាណិជ្ជកម្ម បាន​មានប្រសាសន៍ថា ការចុះហត្ថលេខា​លើ​កិច្ចព្រមព្រៀង​ជា​ដៃគូ​នេះ នឹង​ក្លាយជា​ព្រឹត្តិការណ៍​ដ៏​ពិ​សេសមួយ​នៅក្នុង​កិច្ចសហប្រតិបត្តិការ​ជាមួយ​វិស័យ​ឯកជន ជាពិសេស ក្រុមហ៊ុន DHL Cambodia ដើម្បី​បង្កើន​ឱកាស​សេដ្ឋកិច្ច​ជូន​ដល់​សហគ្រាស​ធុន​តូច និង​មធ្យម​នៅ​កម្ពុជា​តាមរយៈ​ការ​ដាក់លក់​ផលិតផល​ខ្មែរ​សម្រាប់​អតិថិជន និង​ដៃគូ​អាជីវកម្ម​ជាមួយ​ប្រព័ន្ធ​ដឹកជញ្ជូន​ដែលមាន​ទំនុកចិត្ត​ខ្ពស់​។​

​លោកស្រី​បាន​បន្តថា នៅក្រោម​កិច្ចព្រមព្រៀង​ជា​ដៃគូ​នេះ ដើម្បី​អាចជួយ​សម្រួល​ដល់​សហ​គ្រាស​ធុន​តូច និង​មធ្យម​កម្ពុជា (SMEs) អាច​លក់ និង​នាំចេញ​ផលិតផល​រស់​ខ្លួន ទៅកាន់​ទីផ្សារ​អន្តរជាតិ​បាន​យ៉ាង​ងាយស្រួល និង​ប្រកបដោយ​សុវត្ថិភាព​។

​លោកស្រី​បាន​បញ្ជាក់ថា​៖ «​ការតភ្ជាប់​ប្រព័ន្ធ​ទាំង ២​ នេះ នឹង​ជួយ​ដល់​សហគ្រិន​ក្នុងស្រុក ជាពិសេស សហគ្រាស​ធុន​តូច​និង​មធ្យម​កម្ពុជា ដែល​លក់​ផលិត​ខ្មែរ ក្នុងការ​ពង្រីក​ការលក់ និង​ទីផ្សារ​របស់ខ្លួន និង​ប្រាក់ចំណូល​តាមរយៈ​ការធ្វើ​ពាណិជ្ជកម្ម​តាម​ប្រព័ន្ធ​អេឡិចត្រូនិក​ក្នុង​ផ្សារ​ខេ​ម​បូ​ឌា​ត្រេ​ដ ខណៈដែល​សកម្មភាព​នេះ នឹង​ជំរុញ​ដល់​បរិ​យា​ប័ន្ន​ហិរញ្ញវត្ថុ និង​វឌ្ឍនភាព​ឌីជីថល​បន្ថែមទៀត​រប​ស់​ប្រទេស​»​។​

​លោក Prayag Chitrakar​ នាយក​ប្រចាំ​ប្រទេស​នៃ​ក្រុមហ៊ុន DHL Cambodia បាន​មានប្រសាសន៍ថា ភាពជា​ដៃគូ​នេះ អនុញ្ញាតឱ្យ​ក្រុមហ៊ុន​ផ្ដល់ជូន​សហគ្រាស​ធុន​តូច និង​មធ្យម​នូវ​ឱកាស​ធ្វើ​ពាណិជ្ជកម្ម​តាម​ប្រព័ន្ធ​អេឡិចត្រូនិក​តាមរយៈ​ផ្សារ​ខេ​ម​បូ​ឌា​ត្រេ​ដរ​បស់​ក្រសួងពាណិជ្ជកម្ម​។

​លោក​បាន​បញ្ជាក់ថា​៖ «ក្រុមហ៊ុន DHL Cambodia បាន​ត្រៀមខ្លួន​រួចជាស្រេច​ក្នុង​ការបន្ត​កិច្ចសហប្រតិបត្តិការ​ជាមួយ​ក្រសួងពាណិជ្ជកម្ម ដើម្បី​សម្រេចបាន​នូវ​គោលដៅ និង​លទ្ធផល​នៃ​កិច្ចព្រមព្រៀង​ជា​ដៃគូ​នេះ​»។​

​លោក ប៉ែន សុ​វិជាតិ អ្នកនាំពាក្យ​ក្រសួងពាណិជ្ជកម្ម​បាន​ប្រាប់​ភ្នំពេញ​ប៉ុស្តិ៍​បន្ថែមថា មុនពេល​ដែលមាន​ការ​ចុះហត្ថលេខា​លើ​កិច្ចព្រមព្រៀង​ភាពជា​ដៃគូ​នេះ ផ្សារ​ខេ​ម​បូ​ឌា​ត្រេ​ដ​និង​ក្រុមហ៊ុន DHL Cambodia បាន​សហការគ្នា​មួយរយៈ​មកហើយ​លើ​ការប្រតិបត្តិ​ការដឹកជញ្ជូន​ទំនិញ​ទាំង​ក្នុង និង​ក្រៅប្រទេស​។

​

​លោក​បាន​បន្ថែម គោលដៅ​របស់​ក្រសួងពាណិជ្ជកម្ម​ភាគច្រើន ចង់​ជំរុញ​ការនាំចេញ​ផលិតផល​ខ្មែរ​ទៅ​ក្រៅប្រទេស ទើប​ក្រសួង​ជ្រើសរើស​សហការ​ជាមួយ​ក្រុមហ៊ុន DHL Cambodia ដែលជា​ក្រុមហ៊ុន​លំដាប់ថ្នាក់​អន្តរជាតិ​មួយ ផ្តល់​សេវាកម្ម​លើ​ការដឹកជញ្ជូន​ទំនិញ​រហ័ស ទាំង​នៅ​តំបន់​អាស៊ី និង​លើ​ពិភពលោក​។​

​លោក​បាន​បញ្ជាក់ថា​៖ «​បើសិន​ជាមាន​តម្រូវការ​ច្រើន យើង​ចាំបាច់​ត្រូវតែ​ចុះហត្ថលេខា​ជាមួយ​ក្រុមហ៊ុន​ផ្សេងៗ​ទៀត ដើម្បី​ធ្វើការ​ដឹកជញ្ជូន​ក្នុងប្រទេស និង​ជំរុញ​ការនាំចេញ​ផលិតផល​ខ្មែរ​ទៅ​ក្រៅប្រទេស​ឱ្យបាន​ច្រើន​។​ការចុះហត្ថលេខា​លើ​កិច្ចព្រមព្រៀង​ភាពជា​ដៃគូ​នេះ នឹង​ជួយ​សម្រួល​ដល់​លក្ខខណ្ឌ​មួយចំនួន​រវាង​ភាគី​ទាំង២ ​»​។​

​លោកស្រី កែវ មុំ ម្ចាស់​សិប្បកម្ម​ផលិត​នំ​ស្រួយ​លីលី ដែល​បានដាក់​ផលិតផល​នំ​ស្រួយ​លីលី​នៅលើ​ផ្សារ​ខេ​ម​បូ​ឌា​ត្រេ​ដរ​បស់​ក្រសួងពាណិជ្ជកម្ម​ដែរនោះ បាន​ប្រាប់​ភ្នំពេញ​ប៉ុស្តិ៍​ថា ផលិតផល​នំ​ស្រួ​លី​លី បានដាក់​លក់​នៅលើ​ផ្សារ​ខេ​ម​បូ​ឌា​ត្រេ​ដ​តាំងពី​ផ្សារ​នេះ​ចាប់ផ្តើម​ដំណើរ​មកម្ល៉េះ ខណៈដែល​កន្លងទៅ​ផលិត​នេះ​បាន​នាំ​ចេញទៅ​ចំនួន ​១៣​ ប្រទេស​រួចមកហើយ​។​

​លោកស្រី​បានបញ្ជាក់​ថា៖ «​កិច្ចសហការ​រវាង​ផ្សារ​ខេ​ម​បូ​ឌា​ត្រេ​ដ និង​ក្រុមហ៊ុន​ដឹកជញ្ជូន​អន្តរជាតិ DHL នឹង​កាន់តែ​បង្កលក្ខណៈ​ងាយស្រួល​ថែមទៀត​ដល់​ការដឹកជញ្ជូន​ផលិតផល​របស់​ខ្មែរ​ដល់ដៃ​អតិថិជន​ទាំង​ក្នុង​ និង​ក្រៅប្រទេស ជាពិសេស​ការដឹកជញ្ជូន​ជា​កញ្ចប់​តូចៗ​»​។​

​ផ្សារ​ខេ​ម​បូ​ឌា​ត្រេ​ដ (Cambodiatrade) គឺជា​ទីផ្សារ​អន​ឡាញ​សម្រាប់​សហគ្រាស​ធុន​តូច និង​មធ្យម (SME) ដែល​បាន​បើក​ឱ្យ​ដំណើរការ​ជា​ផ្លូវការ កាល​អំឡុង​ខែកញ្ញា​ឆ្នាំ​ ២០២១ ដោយមាន​សហគ្រាស​រាប់​រយ​បាននិងកំពុង​ដំណើរកា​រ​និង​មាន​ប្រតិបត្តិ​ការទិញ​ទំនិញ​ជាច្រើន​ផងដែរ នាពេល​បច្ចុប្បន្ននេះ៕

​