ការជួញដូរថ្លៃទំនិញជាប្រាក់រៀល នាពេលកន្លងទៅ។ ហុង មិនា
ភ្នំពេញៈ ធនាគារជាតិនៃកម្ពុជា (NBC) កំពុងធ្វើការជាមួយអាជ្ញាធរថៃ ដើម្បីលើកកម្ពស់ការប្រើប្រាស់នូវកម្មវិធីទូទាត់សាច់ប្រាក់ KHQR ឱ្យកាន់តែទូលំទូលាយរវាងប្រទេសជិតខាងអាស៊ានទាំង ២ ជាពិសេសការអនុញ្ញាតឱ្យទេសចរថៃអាចធ្វើការទូទាត់នៅកម្ពុជាបាន។
លោកស្រី ជា សិរី អគ្គនាយិកាបច្ចេកទេស NBC បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៧ ខែកក្កដាថា ចាប់តាំងពីការទូទាត់តាម QR ត្រូវបានដាក់ឱ្យដំណើរការតាំងពីខែកុម្ភៈ ឆ្នាំ ២០២០ ដោយធនាគារកណ្តាលនៃប្រទេសទាំង ២ ការទូទាត់តាម QR ក៏ចាប់ផ្តើមមានដំណើរការទៅសន្សឹមៗ។ ប៉ុន្តែចាប់ពីពេលនោះមក ព្រំដែនត្រូវបានបិទដោយសារតែការរីករាលដាលជំងឺកូវីដ ១៩ ដូច្នេះប្រតិបត្តិការមិនមាន ឬមានតិចតួចបំផុត។
លោកស្រីបន្តថា បច្ចុប្បន្ននេះប្រតិបត្តិការអាចធ្វើបានតែរវាងអតិថិជនធនាគារអេស៊ីលីដា និងអតិថិជនរបស់ធនាគារថៃ SCB ប៉ុណ្ណោះ ដោយវាមិនទាន់ដំណើរការជាសកលនោះទេ។
លោកស្រីថ្លែងថា៖ «បច្ចុប្បន្នយើងកំពុងពិភាក្សាដើម្បីអនុញ្ញាតឱ្យអ្នកប្រើ KHQR ទាំងអស់អាចប្រើកម្មវិធីលើទូរស័ព្ទចល័តរបស់អតិថិជនដើម្បីទូទាត់ប្រាក់ជាមួយពាណិជ្ជកររបស់ធនាគារ SCB បានកាន់តែទូលំទូលាយ»។
លោកស្រីអះអាងថា៖ «នៅប្រទេសថៃ មិនមែនពាណិជ្ជករទាំងអស់អាចទទួលយក KHQR ទេ គឺមានតែអាជីវករដែលជាអតិថិជនរបស់ធនាគារ SCB ប៉ុណ្ណោះដែលអាចទទួលការទូទាត់បាន។ យើងសង្ឃឹមថា ជាមួយនឹងការអនុម័តស្តង់ដា QR របស់ប្រទេសថៃ យើងនឹងអាចឱ្យអ្នកប្រើប្រាស់ KHQR របស់យើងអាចទូទាត់ប្រាក់ដោយផ្ទាល់ជាមួយពាណិជ្ជករថៃតាម Thai-QR ទាំងអស់អាចទូទាត់បាន»។
លោកស្រីបន្តថា មកដល់ពេលនេះប្រតិបត្តិការអាចធ្វើបានទៅក្រៅប្រទេសតែប៉ុណ្ណោះ។ មានន័យថា ប្រជាជនកម្ពុជាអាចបង់ប្រាក់នៅប្រទេសថៃបាន។ ប៉ុន្តែភ្ញៀវទេសចរថៃមិនទាន់អាចបង់ប្រាក់នៅកម្ពុជាបានទេ។ បច្ចុប្បន្នសេវាកម្មនេះនៅក្នុងប្រទេសកំពុងដំណើរការរៀបចំ។
លោកស្រីបន្ថែមថា៖ «សំខាន់ជាងនេះទៅទៀតយើងចង់លើកទឹកចិត្តឱ្យមានការប្រើប្រាស់ប្រាក់រៀល។ ដូច្នេះ លុះត្រាតែអ្នកប្រើប្រាស់មានគណនីប្រាក់រៀល ទើបពួកគេអាចប្រើវិធីការទូទាត់ឆ្លងព្រំដែននេះបាន។ ខ្ញុំសូមលើកទឹកចិត្តឱ្យអ្នករាល់គ្នាបើកគណនីប្រាក់រៀល បើពួកគេចង់ទទួលបានអត្ថប្រយោជន៍ពីបទពិសោធនេះ។ អ្នកប្រើប្រាស់ដែលមិនមែនជាប្រាក់-រៀលអាចនឹងត្អូញត្អែរ និងយល់ថា វាមិនមានងាយស្រួលនោះទេ ប៉ុន្តែនេះជាចេតនាពិតប្រាកដ គឺផ្តល់ការលើកទឹកចិត្ត និងភាពងាយស្រួលបន្ថែមទៀតដល់អ្នកប្រើប្រាស់ប្រាក់រៀល»។
លោកស្រី សូរ ផនណារី អនុប្រធាននាយកប្រតិបត្តិជាន់ខ្ពស់ របស់ធនាគារអេស៊ីលីដា បានប្រាប់ ភ្នំពេញ ប៉ុស្តិ៍ថា លោកស្រីបានកត់សម្គាល់ឃើញពីការកើនឡើងនៃប្រតិបត្តិការឌីជីថលរបស់ធនាគារលោកស្រី។ ជាក់ស្តែងកាលពីត្រីមាសទី១ ប្រតិបត្តិការធនាគារឌីជីថលរបស់ធនាគារអេស៊ីលីដា បានកើនឡើង ៣១,៤ លានប្រតិបត្តិការស្មើ ៤២ ភាគរយ ហើយចំនួនប្រតិបត្តិការបានកើនឡើងដល់ ១៤,៣៤២ ពាន់លាន ស្មើនឹង ៩៤ ភាគរយ បើធៀបរយៈពេលពេញមួយឆ្នាំ ២០២១។
លោកស្រីបញ្ជាក់ថា៖ «ការទូទាត់តាមប្រព័ន្ធឌីជីថលរបស់ធនាគារអេស៊ីលីដាបានជំរុញឱ្យមានកំណើនប្រតិបត្តិការទាំងនេះ សេវាធនាគារឌីជីថលអាចឱ្យផ្តល់សេវារបស់ធនាគារអេស៊ីលីដាទៅដល់អតិថិជនរបស់ខ្លួននៅទូទាំងពិភពលោក តាមរយៈបណ្តាញឌីជីថល»។
លោកស្រីបន្តថា៖ «បណ្តាញឌីជីថលរបស់ធនាគារអេស៊ីលីដា រួមចំណែកដល់សេដ្ឋកិច្ចឌីជីថល និងយុទ្ធសាស្ត្រសម្រាប់បរិយាប័ន្នហិរញ្ញវត្ថុនៅកម្ពុជា»។
លោកស្រីបន្ថែមថា គិតត្រឹមថ្ងៃទី ៣១ ខែ ឧសភា ឆ្នាំ ២០២២ មានអ្នកប្រើប្រាស់ប្រមាណ ២,៤ លាននាក់ បានចុះឈ្មោះប្រើប្រាស់សេវាទូរស័ព្ទចល័តរបស់ធនាគារអេស៊ីលីដា។
លោកស្រីនិយាយថា៖ «ក្រៅពីកម្មវិធីទូរស័ព្ទចល័ត និងផលិតផលឌីជីថល ធនាគារអេស៊ីលីដា គ្រោងនឹងពង្រីកសេវាធនាគារដោយខ្លួនឯង (SSB) បន្ថែមទៀត និងបន្តកែលម្អការិយាល័យសាខាដែលមានស្រាប់របស់ខ្លួនឱ្យក្លាយជាការិយាល័យឌីជីថលពេញលេញ និងបរិយាប័ន្ន»។
កាលពីខែកុម្ភៈ ឆ្នាំ ២០១៩ ធនាគារជាតិនៃកម្ពុជាបានចុះហត្ថលេខាលើអនុស្សរណៈយោគយល់គ្នាជាមួយធនាគារកណ្តាលថៃស្តីពី «កិច្ចសហប្រតិបត្តិការលើប្រព័ន្ធនវានុវត្តន៍ហិរញ្ញវត្ថុ និងប្រព័ន្ធទូទាត់» សំដៅពង្រីកកិច្ចសហប្រតិបត្តិការលើវិស័យបច្ចេកវិទ្យាហិរញ្ញវត្ថុ និងសេវាទូទាត់ ដើម្បីលើកកម្ពស់ប្រសិទ្ធភាព សុវត្ថិភាពនៃប្រតិបត្តិការទូទាត់ឆ្លងប្រទេស និងការប្រើប្រាស់រូបិយប័ណ្ណជាតិ។ លុះដល់ខែមិថុនា ឆ្នាំ ២០១៩ NBC បានជ្រើសរើសធនាគារ ៣ ដើម្បីអនុវត្តប្រព័ន្ធទូទាត់តាម QR កម្ពុជា និងថៃ ដែលរួមមានធនាគារអេស៊ីលីដា ធនាគារពាណិជ្ជកម្មបរទេស អេហ្វធីប៊ី (FTB) និងធនាគារពាណិជ្ជកម្ពុជា អិលធីឌី៕
