.jpg)
(ពីឆ្វេងទៅស្តាំ) លោក វេង សាខុន, លោក សុខ ចិន្តាសោភា និងលោក ប៉ាប្លូ កាង ក្នុងពិធីប្រកាសដាក់ឱ្យប្រើប្រាស់ឧបករណ៍ផ្សព្វផ្សាយតុវិនិយោគកសិ-ចំណីអាហារ។ សហការី
ភ្នំពេញៈ កម្ពុជាបានប្រកាសដាក់ឱ្យប្រើប្រាស់ឧបករណ៍ផ្សព្វផ្សាយរបស់តុវិនិយោគកសិ-ចំណីអាហារ (Agri-food Investment Desk) នៅក្រុមប្រឹក្សាអភិវឌ្ឍន៍កម្ពុជា (CDC) ដើម្បីជំរុញការវិនិយោគ និងលើកកម្ពស់ការអភិវឌ្ឍវិស័យកសិ-ចំណីអាហារ នៅកម្ពុជាឱ្យកាន់តែរឹងមាំ និងកាន់តែមានភាពធន់ ខណៈការវិនិយោគក្នុងវិស័យនេះនៅមានកម្រិតនៅឡើយ។
ស្ថិតនៅក្រោមការគាំទ្ររបស់ក្រសួងការបរទេស និងពាណិជ្ជកម្មអូស្ត្រាលី តាមរយៈកម្មវិធីខ្សែចង្វាក់តម្លៃកសិកម្មកម្ពុជា-អូស្ត្រាលី (CAVAC) សហការជាមួយក្រុមប្រឹក្សាអភិវឌ្ឍន៍កម្ពុជា និងក្រសួងកសិកម្ម រុក្ខាប្រមាញ់ និងនេសាទ បានរៀបចំពិធីប្រកាសដាក់ឱ្យប្រើប្រាស់ឧបករណ៍ផ្សព្វផ្សាយរបស់តុវិនិយោគកសិ-ចំណីអាហារនៅ CDC នៅក្នុងគោលបំណងពន្លឿនសកម្មភាពជំរុញវិនិយោគក្នុងវិស័យកសិ-ចំណីអាហារជាអាទិភាព ដើម្បីរួមចំណែករក្សានូវសុវត្ថិភាពម្ហូបអាហារ ការកាត់បន្ថយភាពក្រីក្រតាមរយៈការបង្កើតការងារបន្ថែម និងការជំរុញកំណើនសេដ្ឋកិច្ច និងចីរភាពបរិស្ថាន។
លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ CDC បានថ្លែងថា តុវិនិយោគកសិ-ចំណីអាហារ (AFID) នៅ CDC នេះគឺជាថ្នាលបច្ចេកវិទ្យាព័ត៌មានតែមួយគត់ ដែលនឹងផ្តល់ព័ត៌មាន និងជួយវិនិយោគិនឱ្យច្បាមយកកាលានុវត្តន៍ភាពមិនទាន់ច្នៃធនធានកសិកម្មកម្ពុជា ហើយលើសពីនេះទៀត គឺការទទួលបាននូវការលើកទឹកចិត្តដ៏ទាក់ទាញពីច្បាប់ស្តីពីវិនិយោគ។
លោកបន្ថែមថា ក្រុមការងាររបស់ CDC នឹងនៅជាមួយវិនិយោគិនគ្រប់ដំណាក់កាលដើម្បីធានានូវការទទួលបានផលចំណេញយ៉ាងឆាប់រហ័ស និងគាំទ្រដល់ជីវភាពដ៏ល្អប្រសើររបស់កសិករ និងក្រុមគ្រួសារពួកគាត់។
លោកបញ្ជាក់ថា៖ «ឧបករណ៍ចម្បង (www.afid.cdc.gov.kh) នេះស័ក្តិសមនឹងកាលៈទេសៈនាពេលបច្ចុប្បន្ន ដែលកំពុងមានវិបត្តិកូវីដ ១៩។ យើងនឹងប្រមូលផ្តុំទិសដៅរបស់ក្រសួងពាក់ព័ន្ធទាំងអស់មកធ្វើការផ្សព្វផ្សាយនៅក្នុងស្រុក ក៏ដូចទាក់ទាញវិនិយោគិនក្រៅស្រុកឱ្យមកវិនិយោគលើការកែច្នៃផលិតផលកសិកម្មនេះ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បាននិយាយថា វិស័យកសិកម្មកំពុងមានការអភិវឌ្ឍដោយបានផលិតស្បៀងលើសសេចក្តីត្រូវការក្នុងស្រុក ហើយកំពុងជំរុញគាំទ្រ និងលើកទឹកចិត្តដល់វិស័យឯកជន និងដៃគូអភិវឌ្ឍន៍នានាវិនិយោគលើការកែច្នៃ ដើម្បីធានានូវនិរន្តរភាពនៃការប្រើប្រាស់វត្ថុធាតុដើមក្នុងស្រុក បង្កើនតម្លៃបន្ថែម លើកកម្ពស់គុណភាពស្តង់ដាអនាម័យ សុវត្ថិភាព និងបង្កើនភាពប្រកួតប្រជែង។
លោកថ្លែងថា៖ «ឧបករណ៍ផ្សព្វផ្សាយរបស់តុវិនិយោគកសិ-ចំណីអាហារនេះ បានបង្ហាញនូវកិច្ចខិតខំប្រឹងប្រែងរបស់យើងក្នុងការជួយសម្រួល និងដោះស្រាយបញ្ហាទាំងឡាយដែលពាក់ព័ន្ធនឹងការសម្រួលដល់ការវិនិយោគផ្នែកកសិ-ចំណីអាហារ ក៏ដូចជាជួយដល់វិស័យកសិ-ឧស្សាហកម្មផងដែរ។ ជាប្រាកដកិច្ចការរបស់យើងដែលនឹងត្រូវធ្វើចាប់ពីពេលនេះក៏នឹងគាំទ្រដល់ការអនុវត្ត «ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយនឹងកូវីដ ១៩ តាមគន្លងប្រក្រតីភាពថ្មី»។
ទោះជាយ៉ាងណា លោកបន្ថែមថា មានបញ្ហាមួយចំនួនដែលវិស័យឯកជននៅជួបប្រទះ ហើយដែលត្រូវរួមគ្នាដោះស្រាយមានដូចជា ប្រព័ន្ធស្តុកទុក ឃ្លាំងសម្ងួត ឃ្លាំងត្រជាក់ ទូត្រជាក់ បញ្ហាស្ថិរភាពការផ្គត់ផ្គង់អគ្គិសនី និងឡូជីស្ទីក ជាដើម។
ឯកអគ្គរាជទូតអូស្ត្រាលីប្រចាំកម្ពុជា លោក ប៉ាប្លូ កាង បានលើកឡើងថា រដ្ឋាភិបាលអូស្ត្រាលី បានប្តេជ្ញាចិត្តក្នុងការគាំទ្រដល់ដំណើរការអភិវឌ្ឍន៍សេដ្ឋកិច្ចកម្ពុជា ជាពិសេសការលើកកម្ពស់ផលិតភាពក្នុងវិស័យកសិកម្ម តាមរយៈការរួមគ្នាជំរុញការវិនិយោគក្នុងវិស័យកសិ-ចំណីអាហារ។
លោកលើកឡើងថា៖ «យើងសង្កេតឃើញថា ការវិនិយោគផ្ទាល់ពីបរទេស លើវិស័យកសិកម្មកម្ពុជានៅមានកម្រិតទាប ដែលប្រមាណ ៤ ភាគរយប៉ុណ្ណោះក្នុង ១ ឆ្នាំ។ ដូច្នេះការដាក់ឱ្យប្រើប្រាស់ឧបករណ៍ផ្សព្វផ្សាយរបស់តុវិនិយោគកសិ-ចំណីអាហារ គឺជាសមិទ្ធផលថ្មីនិងជាសក្ខីភាពមួយដែលអូស្ត្រាលីបានរួមជួយបំពេញបន្ថែមដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការជំរុញ ទាក់ទាញ និងថែរក្សាការវិនិយោគក្នុងវិស័យកសិកម្ម កសិ- ធុរកិច្ច និងកសិ-ចំណីអាហារ»។
ក្នុងពិធីប្រកាសដាក់ឱ្យប្រើប្រាស់ AFID នេះដែរ លោក ហ៊ុន ឡាក់ អគ្គនាយកក្រុមហ៊ុន Rich Farm Asia បានឱ្យដឹងថា កម្ពុជានៅមានបញ្ហាលើការចំណាយថ្លៃដើមផលិតខ្ពស់ និងកង្វះខាតពលកម្មជំនាញ ដែលទាមទារឱ្យមានគិតគូរលើបញ្ហានេះបន្ថែមទៀតពីសំណាក់រាជរដ្ឋាភិបាល៕
