ភ្នំពេញៈ កម្ពុជា គ្រោង​នឹង​នាំចេញ​ផ្លែ​មៀន​ស្រស់​ទៅ​ប្រទេស​ចិន​នៅក្នុង​ពេល​ដ៏​ខ្លី​ខាងមុខ​នេះ ក្រោយពី​ការវាយតម្លៃ​ពី​អាជ្ញាធរ​ចិន​ទទួល​បាន​លទ្ធផល​ជា​វិជ្ជមាន​។

ក្នុង​ពិធី​បើក​សិក្ខាសាលា​ផ្សព្វផ្សាយ លក្ខខណ្ឌ​តម្រូវ​ភូតគាម​អនាម័យ​សម្រាប់​ការនាំចេញ​ផ្លែ​មៀន​ស្រស់​ពី​ប្រទេស​កម្ពុជា​ទៅកាន់​ប្រទេស​ចិន​នៅ​ខេត្ត​បាត់ដំបង​កាលពី​ថ្ងៃទី ​១៨ ខែកក្កដា លោក ងិន ឆាយ អគ្គនាយក​នៃ​អគ្គនាយកដ្ឋាន​កសិកម្ម ក្រសួង​កសិកម្ម រុក្ខាប្រមាញ់ និង​នេសាទ​ បាន​អំពាវនាវ​ដល់​ម្ចាស់​ចម្ការ សហគមន៍​កសិកម្ម​តា​ង៉ែ​ន និង​ម្ចាស់​រោងចក្រ​វេច​ខ្ចប់ ដែលមាន​បំណង​ផលិត និង​កែច្នៃ​វេចខ្ចប់​នាំចេញ​ផ្លែ​តាង៉ែន​ស្រស់​ទៅ​ទីផ្សារ​ប្រទេស​ចិន​រួសរាន់​ដាក់ពាក្យ​ស្នើសុំ​ចុះបញ្ជី បន្ទាប់ពី​ការវាយតម្លៃ​ពី​អគ្គរដ្ឋបាល​គយ​ចិន​នៅ​ដំណាក់កាល​ចុងក្រោយ​ដែល​បានធ្វើ​ឡើង​កាលពី​ថ្ងៃទី​ ១២ ដល់ទី​ ១៥ ខែកក្កដា ទទួល​បាន​ភាពវិជ្ជមាន​ខ្ពស់ ខណៈ​ដែល​ក្រសួង​ក៏បាន​ចាប់ផ្តើម​​ផ្សព្វផ្សាយ​ពី​គោលការណ៍​ណែនាំ​ស្តីពី​ការនាំចេញ​ផ្លែ​មៀន​ប៉ៃលិន​ពី​កម្ពុជា​ទៅ​ប្រទេស​ចិន​។

លោក​បាន​បន្ថែមថា វិធានការ​អនាម័យ និង​ភូតគាម​អនាម័យ​កំពុង​ដើរតួនាទី​មិនអាច​ខ្វះ​បាន​ក្នុង​ការ​ធ្វើជា​ស្ពាន​ចម្លង​ផលិតផល​កសិកម្ម​ទៅកាន់​ទីផ្សារ​បរទេស ពិសេស​ផលិតផល​កសិកម្ម​មួយចំនួន ដែល​ជា​ប្រភេទ​ផលិតផល​ជាប់​កម្រិត​កំណត់ ឬ​ជា​ក្រុម​ផលិតផល ដែល​មាន​កម្រិត​ហានិភ័យ​ខ្ពស់​។

លោក​បញ្ជាក់ថា​៖ «​ការនាំចេញ​ទំនិញ​ប្រភេទ​នេះ​ទាមទារ​ឱ្យ​សមត្ថកិច្ច​ភូតគាម​អនាម័យ​កម្ពុជា​ធ្វើ​សំណើ​សុំ​ចរចា​បើក​ទីផ្សារ​ជាមួយ​សមត្ថកិច្ច​ភូតគាម​អនាម័យ​នៃ​ប្រទេស​នាំចូល តាមរយៈ​ការស្នើសុំ​វាយតម្លៃ​ហានិភ័យ​សមាសភាព​ចង្រៃ​ពាក់ព័ន្ធ​នឹង​ការនាំចូល​ទំនិញ​ដែល​បាន​ស្នើសុំ​ក្នុង​នោះ​ផ្លែ​តាង៉ែន​ស្រស់​ក៏​ស្ថិតក្នុង​ក្រុម​ផលិតផល ដែលមាន​កម្រិត​ហានិភ័យ​ខ្ពស់​ផងដែរ​»​។

លោក រុន សុផាន់ណារ៉ា អនុប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្ត​បន្ទាយមានជ័យ​បាន​ប្រាប់​ភ្នំពេញ​-​ប៉ុស្តិ៍​ថា កាលពី​ថ្ងៃទី​ ១៣ ខែកក្កដា ក្រុម​ការងារ​របស់​មន្ទីរ​បាន​ចុះ​សម្របសម្រួល​អគ្គនាយកដ្ឋាន​រដ្ឋបាល​គយ​ចិន អធិការកិច្ច​ចម្ការ​មៀន​របស់​កសិករ​ស្រុក​ម៉ាឡៃ ខេត្ត​បន្ទាយមានជ័យ តាមរយៈ​ប្រព័ន្ធ​បញ្ជូន​រូបភាព និង​សំឡេង ក្រោម​ការសម្របសម្រួល​ពី​តំណាង​ឯកអគ្គរដ្ឋទូត​ចិន​ប្រចាំ​កម្ពុជា​នៅ​ចម្ការ​មៀន សហគមន៍​មៀន​ម៉ាឡៃ​ក្នុង​ការនាំ​ផ្លែ​មៀន​ស្រស់​ទៅកាន់​ប្រទេស​ចិន​។

លោក​បាន​បន្ថែមថា នៅក្នុង​ខេត្ត​បន្ទាយមានជ័យ​មាន​ផ្ទៃដី​ដាំ​មៀន​ប៉ៃលិន​ប្រមាណ​ជិត​ ១​ ពាន់​ហិកតា និង​មាន​ចម្ការ​ចំនួន​ ៤៣ ដោយ​នាពេល​កន្លងទៅ​ផ្លែ​-​មៀន​ស្រស់​អាច​នាំចេញ​ទៅខាង​ប្រទេស​ថៃ​តែប៉ុណ្ណោះ​។ មន្ទីរ​កំពុង​សម្របសម្រួល​ដល់​ចម្ការ​ទាំងនេះ​ក្នុង​ការស្នើសុំ​ចុះបញ្ជី ដើម្បី​ទទួល​វិញ្ញាបនបត្រ​ GAP​។

លោក​បាន​បញ្ជាក់ថា​៖ «​កាលពី​ប៉ុន្មាន​ឆ្នាំ​មុននេះ កសិករ​បាន​បាក់​ទឹកចិត្ត​យ៉ាងខ្លាំង ដោយសារ​តែ​ឈ្មួញ​ថៃ​បាន​ផ្អាក​ទិញ​មៀន​ប៉ៃលិន​ពី​កម្ពុជា​។ ​តែ​យើង​រំពឹងថា នៅពេល​ដែល​យើង​អាច​នាំចេញ​មៀន​ទៅ​ចិន​ជា​ផ្លូវការ​ហើយ កសិករ​យើង​លែង​បារម្ភ​ពី​រឿង​តម្លៃ​ និង​ទីផ្សារ​ទៀតហើយ​»​។

លោក សួស ស៊ីយ៉ាត ប្រធាន​សហគមន៍​កសិកម្ម​ផលិតផល​មៀន​ប៉ៃលិន​បាន​ប្រាប់​ឱ្យដឹងថា កសិករ​បាន​ត្រៀមខ្លួន​រួចជាស្រេច រង់ចាំ​តែ​ការសម្រេច​របស់​ក្រសួង​កសិកម្ម​ថាឱ្យ​នាំចេញ​ពេលណា នោះ​កសិករ​នឹង​អាច​ប្រមូល​បាន​តាម​ការកំណត់​របស់​អ្នកបញ្ជា​ទិញ ដោយ​បច្ចុប្បន្ន​មាន​ក្រុមហ៊ុន​របស់​ថៃ​មួយ ដែល​បាន​សហការ​ជាមួយ​សហគមន៍​ដើម្បី​អាច​នាំចេញ​ផ្លែ​មៀន​ស្រស់​ទៅ​ចិន​នាពេល​ខាងមុខ​។

ទោះជា​យ៉ាងណា​ក៏ដោយ មាន​កសិករ​តិចតួច​ប៉ុណ្ណោះ​ដែល​បាន​ចុះបញ្ជី និង​អនុវត្តតាម​កសិកម្ម​ល្អ ដោយ​លោក​បាន​បញ្ជាក់ថា​៖ «​យើង​មាន​ការព្រួយបារម្ភ​ខ្លះ​ដែរ ព្រោះ​មកទល់​នឹង​បច្ចុប្បន្ននេះ កសិករ​ដាំដុះ​មៀន​ប៉ៃលិន​មិនទាន់​បាន​ទៅ​ចុះបញ្ជី ដើម្បី​រៀនសូត្រ​ពី​ការអនុវត្ត​កសិកម្ម​ល្អ​បាន​ច្រើន​នៅឡើយ​ទេ​។​»​។

បើតាម​ក្រសួង​កសិកម្ម បច្ចុប្បន្ន​ការដាំ​មៀន​ប៉ៃលិន​មាន​ផ្ទៃដី​ដាំ​ជាង ១៣ ៦០៨ ហិកតា​នៅ​ទូទាំង​ប្រទេស ហើយ​ភាគច្រើន​ដាំ​នៅ​ខេត្ត​បាត់ដំបង ប៉ៃលិន និង​បន្ទាយមានជ័យ​។ ក្នុង​នោះ​ផ្ទៃដី​ប្រមូលផល​មាន​ប្រមាណ ៨ ​ពាន់​ហិកតា ដោយ​ក្នុង​ ១​ ហិកតា​ទទួល​បាន​ផល​ចន្លោះ​ពី ១៥ ​ទៅ​ ២០​ តោន ក្នុង​ ១​ ឆ្នាំៗ​៕