ព្រះសីហនុៈ ទឹកប្រាក់នៃការនាំចូល-ចេញទំនិញនៃបណ្តារោងចក្រ/សហគ្រាសនៅតំបន់សេដ្ឋកិច្ចពិសេសក្រុងព្រះសីហនុ (SSEZ) មានតម្លៃសរុបជាង ១,៣ ពាន់លានដុល្លារក្នុងឆមាសទី១ ឆ្នាំ ២០២២ កើនជិត ៤០ ភាគរយបើធៀបនឹងរយៈពេលដូចគ្នាឆ្នាំ ២០២១។
ទិន្នន័យរបស់ SSEZ ឱ្យដឹងថា ចាប់ពីខែមករា-ខែមិថុនា ឆ្នាំ ២០២២ ក្រុមហ៊ុន/សហគ្រាសនៅក្នុងតំបន់សេដ្ឋកិច្ចពិសេសក្រុងព្រះសីហនុបាននាំចូល-នាំចេញទំនិញក្នុងតម្លៃសរុប ១ ៣៧៤ លានដុល្លារកើនឡើង ៣៨,២៣ ភាគរយបើធៀបនឹងរយៈពេលដូចគ្នាក្នុងឆ្នាំ ២០២១ ដែលមានចំនួន ៩៩៤ លានដុល្លារ។ ទោះយ៉ាងណា ទិន្នន័យមិនបានបង្ហាញពីចំនួនដាច់ដោយឡែកនៃទឹកប្រាក់នាំចូលនិងនាំចេញទំនិញនោះទេ។
SSEZ ឱ្យដឹងថា៖ «តំបន់សេដ្ឋកិច្ចពិសេសក្រុងព្រះសីហនុបានរក្សាការអភិវឌ្ឍប្រកបដោយស្ថិរភាពជាមួយនឹងការខំប្រឹងប្រែងរួមគ្នារបស់បុគ្គលិកទាំងអស់ ដែលធ្វើឱ្យទឹកប្រាក់នាំចូល-ចេញកើន ៣៨,២៣ ភាគរយធៀបរយៈពេលដូចគ្នាឆ្នាំមុន»។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ថា ភាពរឹងមាំនៃទំនុកចិត្តរបស់អ្នកវិនិយោគចំពោះកម្ពុជា ទីផ្សារនាំចូលនាំចេញមានភាពធំទូលាយ ច្បាប់វិនិយោគមានលក្ខណៈអំណោយផល និងការគ្រប់គ្រងប្រកបដោយប្រសិទ្ធភាពនៃការឆ្លងរាលដាលជំងឺកូវីដ ១៩ បានធ្វើឱ្យសកម្មភាពផលិតកម្មនៅតំបន់សេដ្ឋកិច្ច ពិសេសក្រុងព្រះសីហនុដំណើរការទៅមុខយ៉ាងរលូន។ លោកបន្តថា ចំនួនទឹកប្រាក់នាំចូលនាំចេញទំនិញរបស់ SSEZ នឹងបន្តសញ្ញាវិជ្ជមានថែមទៀតនៅពេលខាងមុខ ខណៈការធ្វើពាណិជ្ជកម្មរបស់កម្ពុជាជាលក្ខណៈអន្តរជាតិកំពុងមានសម្ទុះឡើងជាបន្តបន្ទាប់។
លោកបានប្រាប់ថា៖ «សកម្មភាពរបស់ SSEZ នឹងកាន់តែមមាញឹកនៅពេលខាងមុខ ព្រោះក្រៅពីលក្ខណៈអំណោយផលខាងលើ ទីនោះក៏ស្ថិតនៅលើទីតាំងមានលក្ខណៈអំណោយផលសម្រាប់ការដឹកជញ្ជូនផងដែរ»។
យោងតាមលោក លឹម ហេង ការវិនិយោគនៅក្នុងតំបន់សេដ្ឋកិច្ច គឺមានភាពងាយស្រួលក្នុងការរៀបចំឯកសារនាំចេញ និងនាំចូលទំនិញ ហើយវាបាននិងកំពុងក្លាយជាឈ្នាន់ សម្រាប់ជំរុញកំណើនសេដ្ឋកិច្ចកម្ពុជាឱ្យកាន់តែលឿន។ ការចូលជាធរមាននៃកិច្ចព្រមព្រៀងពាណិជ្ជកម្មសេរីលក្ខណៈទ្វេភាគី និងពហុភាគី ដែលកម្ពុជាបានចុះហត្ថលេខា និងគ្រោងចុះហត្ថលេខានឹងជួយធ្វើឱ្យសកម្មភាពផលិត និងនាំចូលនាំចេញមានកាន់តែច្រើន។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជាបានលើកឡើងថា បច្ចុប្បន្នចំនួនរោងចក្រ/សហគ្រាសនៅក្នុងតំបន់សេដ្ឋកិច្ចពិសេសក្រុងព្រះសីហនុបានកើនជាលំដាប់ ដោយភាគច្រើននៃរោងចក្រ/សហគ្រាសនៅទីនោះមានម្ចាស់ជាវិនិយោគិនមកពីប្រទេសចិន។ លោកបន្តថា ភាគច្រើននៃរោងចក្រនៅ SSEZ គឺជារោងចក្រផលិតកែច្នៃគ្រឿងសង្ហារិម, គ្រឿងអេឡិចត្រូនិក, កាត់ដេរសម្លៀកបំពាក់ និងស្បែកជើង ជាដើម។
លោកបាននិយាយថា៖ «តាមរយៈសកម្មភាពនៅទីនោះ ចំនួនទឹកប្រាក់នៃការនាំចូល-នាំចេញប្រាកដជានឹងបន្តកើនឡើងថែមទៀត ព្រោះការដឹកជញ្ជូនទំនិញ និងចំនួនរោងចក្របើកថ្មីបានកើនឡើងជាប្រចាំ»។
បន្ថែមពីលើនេះ លោក ស៊ិន ចន្ធី ប្រធានសមាគមភ័ស្តុភារកម្មកម្ពុជាបានប្រាប់ថា ជាការពិតសកម្មភាពនៅក្នុងតំបន់សេដ្ឋកិច្ចពិសេសនៅទូទាំងប្រទេសកម្ពុជា រួមទាំងតំបន់សេដ្ឋកិច្ចពិសេសក្រុងព្រះសីហនុ គឺពិតជាកើនឡើងច្រើននាដើមឆ្នាំ ២០២២ នេះបើធៀបនឹងឆ្នាំ ២០២១ ដោយចំនួននៃការបញ្ជាទិញទំនិញពីកម្ពុជាក៏កើនឡើងជាបន្តបន្ទាប់ដែរ។
លោកអះអាងថា៖ «សម្រាប់ផលិតផលដែលកម្ពុជានាំចេញនាពេលបច្ចុប្បន្ន គឺមានផលិតផលចម្រុះជាច្រើនមុខទំនិញ ដោយមានទីផ្សារប្រទេសទទួលទិញធំៗដូចជា អាមេរិក អឺរ៉ុប ជប៉ុន ជាដើម»។
កាលពីឆ្នាំ ២០២១ ការនាំចូលនាំ- ចេញទំនិញរបស់ក្រុមហ៊ុន/សហគ្រាស SSEZ មានទឹកប្រាក់សរុប ២ ២៣៤ លានដុល្លារ កើន ៤២,៧៥ ភាគរយ បើធៀបនឹងឆ្នាំ ២០២០។ នេះបើតាមទិន្នន័យរបស់ SSEZ។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាបង្ហាញថា ក្នុងឆមាសទី ១ ឆ្នាំ ២០២២ ពាណិជ្ជកម្មអន្តរជាតិកម្ពុជាមានតម្លៃសរុប ២៧ ២៤៣,៨៤ លានដុល្លារ កើនឡើង ២០,២ ភាគរយបើធៀបឆមាសទី ១ ឆ្នាំ ២០២១ ក្នុងនោះការនាំចូលទំនិញមានតម្លៃ ១៥ ៨៦៤,៧២ លានដុល្លារ កើន ១១,៩ ភាគរយ និងការនាំចេញមានតម្លៃ ១១ ៣៧៩,១២ លានដុល្លារ កើនឡើង ៣៣,៩ ភាគរយ៕