ភ្នំពេញៈ សមាគមមីក្រូហិរញ្ញវត្ថុកម្ពុជា (CMA) និងអង្គការ SPTF សហការគ្នាបង្កើនការការពារអតិថិជន ដើម្បីពង្រឹងការអនុវត្តអាជីវកម្មប្រកបដោយបរិយាប័ន្ន, ការគ្រប់គ្រងហានិភ័យ និងបង្កើនការការពារអតិថិជន ដើម្បីធានាបាននូវនិរន្តរភាពទីផ្សាររយៈពេលវែង។
នៅក្នុងពិធីចុះហត្ថលេខាលើអនុស្សរណៈនៃការយោគយល់គ្នាដើម្បីពង្រឹងកិច្ចគាំពារអតិថិជននៅក្នុងវិស័យសេវាហិរញ្ញវត្ថុកម្ពុជា រវាង CMA និងអង្គការ SPTF កាលពីថ្ងៃទី ២២ ខែកក្កដា លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជាបានប្រាប់ថា កិច្ចផ្តួចផ្តើមនេះត្រូវបានដាក់ចេញស្របពេលដែល Smart Campaign ឈានដល់ទីបញ្ចប់ ហើយនឹងជំនួសវិញដោយកិច្ចសហប្រតិបត្តិការជាមួយ SPTF-CERISE ក្នុងដំណើរដ៏សកម្មបន្តទៅមុខ។
លោកបន្តថា កិច្ចសហប្រតិបត្តិការនៃស្ថាប័នទាំង ២ នឹងដើរតួនាទីក្នុងកិច្ចការជំរុញ និងអនុវត្តស្តង់ដាការពារអតិថិជនថ្មីរបស់ SPTF-CERISE ក៏ដូចជាវិញ្ញាបនបត្រទទួលស្គាល់ផងដែរ។
លោកថ្លែងថា៖ «តាមរយៈអនុស្សរណៈនេះសកម្មភាពធំៗជាអាទិភាព ៥ នឹងត្រូវអនុវត្ត ដែលរួមមានការធ្វើឱ្យមានភាពស៊ីចង្វាក់គ្នារវាងក្រមប្រតិបត្តិវិស័យធនាគារ និងហិរញ្ញវត្ថុជាមួយនឹងស្តង់ដាការពារអតិថិជនរបស់ SPTF-CERISE, ការបណ្តុះបណ្តាល និងបកប្រែនូវគោលការណ៍ការពារអតិថិជន, ការបណ្តុះបណ្តាលពង្រឹងសមត្ថភាពត្រៀមសម្រាប់ការគ្រប់គ្រងបេសកកម្មសង្គម, បកប្រែសៀវភៅណែនាំស្តង់ដាសកលសម្រាប់ការគ្រប់គ្រងការអនុវត្តសង្គម និងបរិស្ថាន (USSEPM) និងតាមដាន សម្របសម្រួល និងតស៊ូមតិ»។
លោក Nitin Madan នាយកផ្នែក បរិយាប័ន្នហិរញ្ញវត្ថុប្រកបដោយការទទួលខុសត្រូវប្រចាំអាស៊ីអាគ្នេយ៍នៃអង្គការ SPTF បាននិយាយថា ភាពជាដៃគូថ្មី ដែលមានតែ ១ និងដំបូងគេនេះនឹងបង្កើតជាផែនទីចង្អុលផ្លូវនាំដល់ការរីកចម្រើនវិស័យហិរញ្ញវត្ថុប្រកបដោយការទទួលខុសត្រូវ ស្ថិរភាពហិរញ្ញវត្ថុ និងកិច្ចគាំពារអតិថិជននៅក្នុងវិស័យមីក្រូហិរញ្ញវត្ថុ ក៏ដូចវិស័យធនាគារ និងហិរញ្ញវត្ថុទាំងមូលផងដែរ។
លោកថ្លែងថា៖ «សមាគម និងសមាជិករបស់ខ្លួនក៏អាចដាក់ពាក្យស្នើសុំសហហិរញ្ញប្បទានសម្រាប់អនុវត្ត និងពង្រឹងសមត្ថភាពលើការអនុវត្តបរិយាប័ន្នហិរញ្ញវត្ថុ ប្រកបដោយការទទួលខុសត្រូវក្នុងចំណោមស្ថាប័នផ្តល់សេវាហិរញ្ញវត្ថុនៅក្នុងតំបន់អាស៊ីអាគ្នេយ៍»។
លោក គិត សុវណ្ណារិទ្ធ អគ្គនាយករងត្រួតពិនិត្យទី១ ធនាគារជាតិនៃកម្ពុជាបានលើកឡើងថា ទន្ទឹមនឹងការរីកចម្រើននៃកម្រិតបរិយាប័ន្នហិរញ្ញវត្ថុនៅកម្ពុជា ដែលឆ្លុះបញ្ចាំងតាមរយៈកំណើននៃការប្រើប្រាស់សេវាឥណទាន ប្រាក់បញ្ញើ និងសេវាទូទាត់ ក៏នៅមានបញ្ហាចម្បងៗដែលបាន និងកំពុងរាំងស្ទះដល់ការបន្តអភិវឌ្ឍវិស័យមីក្រូហិរញ្ញវត្ថុ ការជំរុញកម្រិតបរិយាប័ន្នហិរញ្ញវត្ថុ និងការពង្រឹងកិច្ចការពារអតិថិជនផងដែរ។
លោកបន្ថែមថា ការប្ដឹងតវ៉ាពីអ្នកប្រើប្រាស់សេវាហិរញ្ញវត្ថុមកលើគ្រឹះស្ថានមួយចំនួនចំពោះការប្រព្រឹត្តមិនស្របតាមក្រមសីលធម៌វិជ្ជាជីវៈ, ការរឹបអូសទ្រព្យធានាដោយបង្ខំ និងការឃោសនាពាណិជ្ជកម្មដែលលើសពីការពិតជាដើម បានបណ្ដាលឱ្យសាធារណជនបាត់បង់ជំនឿចិត្តមកលើវិស័យហិរញ្ញវត្ថុផ្លូវការ និងជ្រើសរើសប្រើប្រាស់សេវាហិរញ្ញវត្ថុក្រៅផ្លូវការជំនួសវិញ ដែលអាចនាំពួកគាត់ធ្លាក់ក្នុងវិបត្តិបំណុល ឬខាតបង់ទ្រព្យសម្បត្តិដោយការបោកប្រាស់ពីជនខិលខូចមួយចំនួន ដែលបញ្ហាទាំងនេះទាមទារឱ្យគ្រប់ភាគីពាក់ព័ន្ធត្រូវរួមគ្នាដោះស្រាយជាចាំបាច់។
លោកបានអះអាងថា៖ «ក្នុងន័យនេះ ខ្ញុំសូមលើកទឹកចិត្តដល់សមាគមមីក្រូហិរញ្ញវត្ថុកម្ពុជា និងស្ថាប័ន SPTF បន្តតាមដាន និងវាយតម្លៃជាប្រចាំទៅលើគ្រឹះស្ថានដែលបានទទួលការចាត់ថ្នាក់ដោយស្ថាប័ន ដើម្បីធានាពីស្ថិរភាពនៃការអនុវត្តបរិយាប័ន្នហិរញ្ញវត្ថុប្រកបដោយការទទួលខុសត្រូវ»។
បើតាមសមាគមមីក្រូហិរញ្ញវត្ថុកម្ពុជា គិតត្រឹមត្រីមាសទី១ ឆ្នាំ ២០២២ វិស័យមីក្រូហិរញ្ញវត្ថុបានផ្តល់ឥណទានសរុប ៨ ៣៥៥ លានដុល្លារ ដល់អតិថិជនជិត ២ លាននាក់ ខណៈអតិថិជនដាក់ប្រាក់បញ្ញើតាមគ្រឹះស្ថានមីក្រូហិរញ្ញវត្ថុទទួលប្រាក់បញ្ញើទាំង ៥ មានចំនួនជាង ២,៦ លាននាក់ ដោយទទួលបានដាក់ប្រាក់បញ្ញើជាង ៤ ៤០០ លានដុល្លារ ហើយទិន្នន័យនេះនៅមិនទាន់បានបញ្ចូលធនាគារនៅឡើយទេ៕