.jpg)
ភ្ញៀវទេសចរចូលទស្សនាប្រាសាទអង្គរវត្ត ក្នុងខេត្តសៀមរាប នាពេលកន្លងទៅ។ ហេង ជីវ័ន
ភ្នំពេញៈ កម្ពុជាបានរៀបចំកម្មវិធីផ្សព្វផ្សាយបង្ហាញផ្លូវទេសចរណ៍កម្ពុជា «Cambodian Tourism Roadshow» នៅប្រទេសវៀតណាមយ៉ាងជោគជ័យ ខណៈវៀតណាមនឹងរៀបចំកម្មវិធីដូចគ្នានេះនៅកម្ពុជា នាខែតុលាខាងមុខ ដើម្បីជំរុញឱ្យមានរំហូរទេសចរ និងជំរុញកំណើនទេសចររវាងប្រទេសទាំង ២។
នៅប្រទេសវៀតណាមកាលពីថ្ងៃទី ២០ ខែកក្កដា ឆ្នាំ ២០២២ លោក ថុក សុខុម អនុរដ្ឋលេខាធិការក្រសួងទេសចរណ៍បានជួបពិភាក្សាជាមួយលោក Ha Van Sieu អនុប្រធានរដ្ឋបាលជាតិទេសចរណ៍វៀតណាម (VNAT) នៃក្រសួងវប្បធម៌ កីឡា និងទេសចរណ៍វៀតណាម ដោយការពិភាក្សាបានផ្តោតសំខាន់លើកិច្ចការមួយចំនួនក្នុងនោះភាគីទាំង ២ ក៏បានលើកឡើងជុំវិញការរៀបចំកម្មវិធីផ្សព្វផ្សាយបង្ហាញផ្លូវទេសចរណ៍កម្ពុជា «Cambodian Tourism Roadshow» និងប្រកាសប្រាប់ប្រជាជនវៀតណាមពីការបើកឡើងវិញនៃវិស័យទេសចរណ៍កម្ពុជា, ការធ្វើដំណើរបើកបរដោយខ្លួនឯង (Self-driving tour) ពីច្រកព្រំដែនអន្តរជាតិ និងការអភិវឌ្ឍហេដ្ឋារចនាសម្ព័ន្ធទេសចរណ៍ទន់-រឹងជាច្រើននៅទិសនិរតី ដើម្បីតភ្ជាប់ការធ្វើដំណើរ ជំរុញចលនាភ្ញៀវទេសចរពីខេត្តព្រះសីហនុ កំពត កែប និងកោះកុង ទៅខេត្តគៀងយ៉ាង និងទីក្រុងកាន់ធើ ជាដើម។
លោក ថុក សុខុម បានប្រាប់ភ្នំពេញប៉ុស្តិ៍ថា ទាំងមន្ត្រីទេសចរណ៍ និងប្រតិបត្តិករទេសចរណ៍របស់វៀតណាម មានការចាប់អារម្មណ៍ខ្លាំងចំពោះសក្តានុពលទេសចរណ៍របស់កម្ពុជា ដោយពួកគេមានបំណងចង់វិនិយោគលើវិស័យនេះ និងមានគម្រោងមករៀបចំកម្មវិធី Tourism Roadshow នៅប្រទេសកម្ពុជាផងដែរ។
លោកបន្ថែមថា ភាគីទាំង ២ នឹងបន្តជំរុញកិច្ចសហប្រតិបត្តិការការតភ្ជាប់តាមផ្លូវគោកទឹក និងផ្លូវអាកាស ជាពិសេសដើម្បីតភា្ជប់រវាងខេត្តដែលនៅជាប់ព្រំដែនជាមួយគ្នា សម្រួលដល់ការធ្វើដំណើរតាមច្រកព្រំដែនអន្តរជាតិ និងការផ្តល់ទិដ្ឋាការស្នាក់នៅរយៈពេលវែងសម្រាប់ប្រជាជនកម្ពុជាដែលធ្វើដំណើរទេសចរណ៍ទៅពិនិត្យព្យាបាលជំងឺនៅប្រទេសវៀតណាម។
លោកប្រាប់ថា៖ «ក្នុងកម្មវិធី Cambodian Tourism Ro-adshow នៅវៀតណាម យើងទទួលបានលទ្ធផលជាវិជ្ជមានច្រើន ដោយក្រៅពីការទាក់ទាញទេសចរវៀតណាមមកកម្ពុជាក៏មានអ្នកវិនិយោគវៀតណាមមួយចំនួនមានបំណងចង់មកវិនិយោគលើវិស័យឧស្សាហកម្មនៅប្រទេសកម្ពុជាផងដែរដូចជា ក្រុមហ៊ុនផលិតកាហ្វេ និងកែច្នៃអាហារសមុទ្រជាដើម»។
លោកបន្តទៀតថា ដើម្បីបន្តទាក់ទាញទេសចរពីវៀតណាម កម្ពុជានឹងចូលរួមការតាំងពិព័រណ៍ទេសចរណ៍អន្តរជាតិ «International Travel Expo (ITE HCMC)2022» ចាប់ពីថ្ងៃទី ៦-១១ ខែកញ្ញា ឆ្នាំ ២០២២ នៅទីក្រុងហូជីមិញ ប្រទេសវៀតណាម ខណៈកម្ពុជានឹងរៀបចំកម្មវិធីរាត្រីកម្ពុជា «Cambodia Night» នៅសណ្ឋាគាររិស នៅវៀតណាម នាថ្ងៃទី ៨ ខែកញ្ញា ឆ្នាំ ២០២២ ព្រមទាំងចូលរួមក្នុងវេទិកាទេសចរណ៍មេគង្គចាប់ពីថ្ងៃទី ១១-១៤ ខែតុលា ឆ្នាំ ២០២២ នៅ Hoi An ប្រទេសវៀតណាម។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី ឱ្យដឹងថា ការផ្សព្វផ្សាយបង្ហាញផ្លូវទេសចរណ៍កម្ពុជា Cambodian Tourism Ro-adshow របស់កម្ពុជាទៅកាន់ប្រទេសនៅក្នុងតំបន់អាស៊ាន ពិសេសក្នុងប្រទេសវៀតណាមជាការបង្ហាញផលិតផលទេសចរណ៍ថ្មីៗរបស់កម្ពុជា។
លោកបញ្ជាក់ថា៖ «មុនពេលមានវិបត្តិជំងឺកូវីដ ១៩ ទេសចរមកពីវៀតណាមស្ថិតនៅលេខ ២ បន្ទាប់ពីប្រទេសចិន ដូចនេះកម្ពុជា មិនអាចមើលរំលងបាន។ យើងរំពឹងថា វៀតណាមនឹងបើកទូលាយដូចកម្ពុជាដែរ ហើយរំពឹងថា នឹងមានកំណើនទេសចរច្រើនពីប្រទេសជិតខាងយើងនេះ»។
បើតាមក្រសួងទេសចរណ៍កម្ពុជា វៀតណាម និងថៃបានដាក់ចេញរួចមកហើយនូវកិច្ចសហប្រតិបត្តិការច្រករបៀងសេដ្ឋកិច្ចកម្ពុជា វៀតណាម ថៃ ឬហៅថា CVTEC (Cambodia Vietnam Thailand Economic Corridor) ក្នុងនោះក៏មានការជំរុញចលនាភ្ញៀវទេសចរពីគ្នាទៅវិញទៅមកផងដែរ៕
