.jpg)
ក្រុមប្រឹក្សាអភិវឌ្ឍន៍កម្ពុជា (CDC)។ គម្រោងវិនិយោគក្រៅតំបន់សេដ្ឋកិច្ចចំនួន ៦៣ ត្រូវបាន CDC អនុម័តនៅរយៈពេល ៥ ខែ។ ហេង ជីវ័ន
ភ្នំពេញៈ ស្ថានភាពការវិនិយោគនៅកម្ពុជានៅក្នុងរយៈពេល ៥ ខែដើមឆ្នាំ ២០២២ បានងើបឡើងវិញជាបណ្តើរៗហើយបើធៀបនឹងរយៈពេលដូចគ្នាឆ្នាំ ២០២១ ដោយមានគម្រោងវិនិយោគឯកជន (ក្រៅតំបន់សេដ្ឋកិច្ចពិសេស) ចំនួន ៦៣ គម្រោងត្រូវបានអនុម័ត ដែលស្មើនឹងទុនវិនិយោគសរុប ២,៣ ពាន់លានដុល្លារ និងបង្កើតការងារបានប្រមាណជាង ៥២ ពាន់នាក់។
បើយោងតាមរបាយការណ៍និន្នាការសេដ្ឋកិច្ចសង្គមរបស់ក្រសួងសេដ្ឋកិច្ច និងហិរញ្ញវត្ថុ កាលពីសប្តាហ៍មុន គឺចាប់ពីខែមករា-ឧសភា ឆ្នាំ ២០២២ ស្ថានភាពវិនិយោគបានបង្ហាញពីភាពល្អប្រសើរឡើងវិញបន្តិច ជាក់ស្តែងគម្រោងវិនិយោគឯកជនក្រៅតំបន់សេដ្ឋកិច្ចពិសេស ដែលទទួលបានការអនុញ្ញាតដោយក្រុមប្រឹក្សាអភិវឌ្ឍន៍កម្ពុជា (CDC) មានចំនួន ៦៣ គម្រោង កើនឡើង ១៨ គម្រោង ដែលមានទុនវិនិយោគសរុប ២,៣ ពាន់លានដុល្លារ កើន ១៨៣,១ ភាគរយបើធៀបរយៈពេលដូចគ្នាឆ្នាំមុន។ គម្រោងទាំង ៦៣ អាចបង្កើតការងារបានប្រមាណ ៥២ ពាន់នាក់កើនឡើង ៧០,៣ ភាគរយ។
ក្រសួងសេដ្ឋកិច្ចបានលើកឡើងថា សេដ្ឋកិច្ចកម្ពុជារំពឹងថានឹងបន្តនិន្នាការកើនឡើងនៅក្នុងឆ្នាំ ២០២២ ដែលបន្តគាំទ្រដោយភាពល្អប្រសើរនៃតម្រូវការសកល បើទោះបីរងការប៉ះទង្គិចពីការផ្ទុះឡើងសង្គ្រាមរវាងរុស្ស៊ី និងអ៊ុយក្រែនយ៉ាងណាក្តី។ ទន្ទឹមនេះ ការសម្រេចបាននូវអត្រាខ្ពស់នៃការចាក់វ៉ាក់សាំងប្រឆាំងនឹងជំងឺកូវីដ ១៩ និងការបើកប្រទេសឡើងវិញបានអនុញ្ញាតឱ្យសកម្មភាពសេដ្ឋកិច្ចក្នុងស្រុកចាប់ផ្តើមវិលត្រឡប់ទៅរកប្រក្រតីភាពវិញជាបណ្តើរហើយ។
ក្រសួងបានបញ្ជាក់ថា៖ «បើទោះបីកម្ពុជាទទួលឥទ្ធិពលដោយប្រយោលពីសង្គ្រាមរវាងរុស្ស៊ី និងអ៊ុយក្រែនក៏ដោយ ក៏ផលប៉ះពាល់មកលើសេដ្ឋកិច្ច គឺមានទំហំតូចប៉ុណ្ណោះ ដោយហេតុថា ទំនាក់ទំនងសេដ្ឋកិច្ចកម្ពុជាជាមួយប្រទេសទាំង ២ មានកម្រិតទាប»។
ក្រាហ្វិកបង្ហាញថា ក្នុងចំណោមទុនវិនិយោគសរុបទាំង ២,៣ ពាន់លានដុល្លារ គឺមានភាគច្រើនស្ថិតក្នុងវិស័យសេវាកម្មតាមពីក្រោយដោយវិស័យឧស្សាហកម្ម, ថាមពល, ទេសចរណ៍, និងកសិកម្ម។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញ-ប៉ុស្តិ៍ថា ការដាក់ចេញយុទ្ធសាស្ត្រថ្មីៗជាបន្តបន្ទាប់របស់រាជរដ្ឋាភិបាល ដើម្បីស្តារសេដ្ឋកិច្ចជាតិឡើងវិញពីវិបត្តិនៃការរីករាលដាលជំងឺកូវីដ ១៩ តាំងពីឆ្នាំ ២០២០ កំពុងបង្ហាញចេញលទ្ធផលវិជ្ជមានជាបណ្តើរៗហើយជាក់ស្តែងនៅពេលនេះមិនត្រឹមតែចង្វាក់ផលិតកម្មក្នុងប្រទេសអាចដំណើរការបានពេញលេញវិញ និងឆាប់រហ័សបើធៀបទៅនឹងប្រទេសជាច្រើនលើពិភពលោកប៉ុណ្ណោះទេ ប៉ុន្តែចំនួននៃក្រុមហ៊ុនទាំងក្នុងស្រុក និងបរទេសដែលមកបណ្តាក់ទុននៅកម្ពុជា ក៏កំពុងកើនឡើងជាបន្តបន្ទាប់ផងដែរ។
លោកបន្ថែមថា ក្រៅពីលក្ខណៈអំណោយផលក្នុងស្រុក កម្ពុជាក៏មានកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី និងមានប្រទេសដៃគូពាណិជ្ជកម្មធំៗជាច្រើនសម្រាប់នាំចេញទំនិញទៅកាន់ទីផ្សារប្រទេសទាំងអស់នោះក្នុងលក្ខខណ្ឌអនុគ្រោះទៀតផង។
លោកបានថ្លែងថា៖ «ការកើនឡើងជាបន្តបន្ទាប់នៃទំហំទឹកប្រាក់ពាណិជ្ជកម្មអន្តរជាតិរបស់ប្រទេសកម្ពុជា គឺបញ្ជាក់ថា កម្ពុជាកំពុងក្លាយជាកន្លែងផលិត និងនាំចេញ-នាំចូលទំនិញមួយទៅទីផ្សារអន្តរជាតិ។ ចំនួនគម្រោងវិនិយោគនៅកម្ពុជានឹងបន្តកើនឡើងច្រើនថែមទៀតនៅពេលខាងមុខ»។
កាលពីថ្ងៃទី ២១ ខែកក្កដា ថ្មីៗ នេះ ស្ថាប័ន Standard & Poor (S&P) ដែលជាភ្នាក់ងារវាយតម្លៃសកលបានព្យាករថា ផលិតផលក្នុងស្រុកសរុប (GDP) របស់កម្ពុជានឹងមានកំណើន ៦,៣ ភាគរយនៅឆ្នាំនេះ ដែលខ្ពស់ជាងការព្យាកររបស់ស្ថាប័នហិរញ្ញវត្ថុអន្តរជាតិផ្សេងៗទៀត ដូចជាធនាគារពិភពលោក មូលនិធិរូបិយវត្ថុអន្តរជាតិ (IMF) និងធនាគារអភិវឌ្ឍន៍អាស៊ី ជាដើម។ ស្ថាប័ននេះបានលើកឡើងថា កម្មវិធីចាក់វ៉ាក់សាំងរបស់កម្ពុជា គឺជាជោគជ័យគួរឱ្យកត់សម្គាល់ដែលជួយសម្រួលដល់ការបើកដំណើរការឡើងវិញ និងជំរុញការវិនិយោគបរទេសឡើងវិញ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា កត្តាស្ថិរភាពនយោបាយ, សម្បូរកម្លាំងពលកម្មជំនាញ និងមានតម្លៃសមរម្យ, អត្រានៃចំនួនប្រជាជនដែលបានចាក់វ៉ាក់សាំងខ្ពស់, និងមានទីផ្សារអន្តរជាតិធំៗ បានធ្វើឱ្យអ្នកវិនិយោគកាន់តែច្រើនចាប់អារម្មណ៍ក្នុងការបណ្តាក់ទុននៅកម្ពុជា។ ការបណ្តាក់ទុននៅកម្ពុជានៅពេលនេះ គឺមានលក្ខណៈចម្រុះលើគ្រប់វិស័យ ដោយមិនមែនភាគច្រើនតែក្នុងវិស័យកាត់ដេរដូចមុននោះទេ។
លោកបានអះអាងថា៖ «នៅពេលមានការបណ្តាក់ទុនចម្រុះវិស័យកាន់តែច្រើន វានឹងធ្វើឱ្យចន្ទល់សេដ្ឋកិច្ចកម្ពុជាកាន់តែរឹងមាំ និងមានទីផ្សារនាំចេញ និងនាំចូលកាន់តែច្រើន។ ការបង្កើតគម្រោងថ្មីៗក៏នឹងជួយឱ្យកម្ពុជាកាត់បន្ថយការធ្វើចំណាកស្រុកទៅធ្វើការនៅក្រៅប្រទេសផងដែរ»។
ក្នុងឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគឯកជននៅក្រៅតំបន់សេដ្ឋកិច្ចសរុបចំនួន ១០៨ គម្រោង ធ្លាក់ ៤៦ គម្រោងបើធៀបនឹងឆ្នាំ ២០២០ ដោយមានទុនវិនិយោគ ១ ៧១៩ លានដុល្លារ ថយចុះ ៧២,៦ ភាគរយ។ នេះបើតាមក្រសួងសេដ្ឋកិច្ច៕
