.jpg)
យានយន្តធ្វើដំណើរតាមបណ្ដោយផ្លូវព្រះមុន្នីវង្ស ត្រង់ចំណុចច្រមុះជ្រូកក្បាលថ្នល់ កាលពីខែមេសា ឆ្នាំ ២០២២។ ហុង មិនា
ភ្នំពេញៈ រដ្ឋាភិបាលកម្ពុជាគ្រោងនឹងអនុវត្តការធានារ៉ាប់រងជាកាតព្វកិច្ចសម្រាប់យានជំនិះឯកជន ដែលជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គម តាមរយៈការធានាជនរងគ្រោះដោយសារគ្រោះថ្នាក់ចរាចរណ៍នៅកម្ពុជា។
លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងទិវាធានារ៉ាប់រងឆ្នាំ ២០២២ កាលពីថ្ងៃទី ២៥ ខែកក្កដាថា ឧស្សាហកម្មធានារ៉ាប់រងកំពុងដើរតួនាទីដ៏សំខាន់ក្នុងការរួមចំណែកដល់កំណើនសេដ្ឋកិច្ចរបស់កម្ពុជា។ វិស័យនេះបានបន្តរីកចម្រើនយ៉ាងខ្លាំងទោះបីជាមានវិបត្តិជំងឺកូវីដ ១៩ ក៏ដោយ។
ជាមួយគ្នានេះលោកឱ្យដឹងថា វិស័យធានារ៉ាប់រងក៏បានរួមចំណែកក្នុងការកសាងភាពធន់នឹងវិបត្តិដែលបង្កឡើងដោយគ្រោះមហន្តរាយនានា ពិសេសវិបត្តិសកលដែលបណ្តាលមកពីជំងឺកូវីដ ១៩ និងគ្រោះមហន្តរាយធម្មជាតិ។
លោកបានថ្លែងថា៖ «ដើម្បីលើកកម្ពស់វិស័យធានារ៉ាប់រងឱ្យកាន់តែរីកចម្រើនបន្ថែមទៀត រាជរដ្ឋាភិបាលកម្ពុជានឹងគ្រោងដាក់ឱ្យប្រើប្រាស់នូវការធានារ៉ាប់រងជាកាតព្វកិច្ចដែលវាជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គមជាតិតាមរយៈការធានារ៉ាប់រងដល់ជនរងគ្រោះដែលបង្កដោយគ្រោះថ្នាក់ចរាចរណ៍នៅតាមដងផ្លូវនៅក្នុងព្រះរាជាណាចក្រកម្ពុជា ពោលគឺឱ្យពួកគាត់ទទួលបានសំណងសមស្របណាមួយសម្រាប់ការព្យាបាល និងដោះស្រាយផ្នែកហិរញ្ញវត្ថុរបស់ខ្លួនផងដែរ»។
លោកបន្ថែមទៀតថា៖ «ផលប្រយោជន៍នៃការដាក់ឱ្យដំណើរការការធានារ៉ាប់រងយានយន្តឯកជនជាកាតព្វកិច្ចនេះ នឹងដើរតួនាទីកាន់តែសំខាន់ក្នុងការពង្រឹង និងពង្រីកប្រព័ន្ធសំណាញ់ការពារសុវត្ថិភាពសង្គមឱ្យដើរទន្ទឹមគ្នានឹងប្រព័ន្ធគាំពារសង្គមរបស់រាជរដ្ឋាភិបាល»។
លោក យក់ ចំរើនរិទ្ធិ នាយកប្រតិបត្តិក្រុមហ៊ុនធានារ៉ាប់រង Forte បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៥ ខែកក្កដាថា បណ្តាប្រទេសជុំវិញពិភពលោកស្ទើរតែ ៩៥ ភាគរយទៅហើយបានកំពុងអនុវត្តការធានារ៉ាប់រងជាកាតព្វកិច្ចសម្រាប់យានយន្តឯកជន។ លោកបានស្វាគមន៍ការដាក់ឱ្យដំណើរការនៅពេលខាងមុខនៅកម្ពុជា។
លោកបញ្ជាក់ថា៖ «ក្នុងនាមជាប្រតិបត្តិករយើងបានត្រៀមខ្លួនជាស្រេចដើម្បីធ្វើការងារនេះ ព្រោះវាមានសារៈសំខាន់ខ្លាំងណាស់ គឺមិនត្រឹមតែសម្រាប់ម្ចាស់យានយន្តដែលនឹងត្រូវធានាប៉ុណ្ណោះទេ ប៉ុន្តែវាក៏ជាផលប្រយោជន៍សាធារណៈផងដែរ»។
លោកបន្ថែមថា ដើម្បីធ្វើដូច្នេះបានក្រុមហ៊ុនធានារ៉ាប់រង ត្រូវពង្រីកសាខារបស់ខ្លួនថែមទៀត ដើម្បីចូលឱ្យកាន់តែជិតទៅអតិថិជន។
លោក ប៊ូ ចាន់ភីរូ អគ្គនាយកនិយតករធានារ៉ាប់រងកម្ពុជាបានលើកឡើងថា គិតត្រឹមខែកក្កដានេះកម្ពុជាមានគ្រឹះស្ថានធានារ៉ាប់រងចំនួន ៩៤ ដែលរួមមានក្រុមហ៊ុនធានារ៉ាប់រងទូទៅ ១៨, ក្រុមហ៊ុនធានារ៉ាប់រងអាយុជីវិតចំនួន ១៤, ក្រុមហ៊ុនមីក្រូធានារ៉ាប់រងចំនួន ៧, ក្រុមហ៊ុនធានារ៉ាប់រងបន្ត ១, ក្រុមហ៊ុនឈ្មួញជើងសាធានារ៉ាប់រងចំនួន ១៨, ក្រុមហ៊ុនភ្នាក់ងារសាជីវកម្មចំនួន ៣៤, និងក្រុមហ៊ុនវាយតម្លៃហានិភ័យធានារ៉ាប់រងចំនួន ២ កំពុងដំណើរការនៅកម្ពុជា។
ទន្ទឹមនឹងការកើនឡើងចំនួនក្រុមហ៊ុនធានារ៉ាប់រងទំហំទីផ្សារធានារ៉ាប់រងក៏កំពុងរីកចម្រើនផងដែរ ដោយបុព្វលាភសរុបកើនឡើងដល់ប្រមាណ ៣០០ លានដុល្លារ កាលពីឆ្នាំ ២០២១ ហើយអត្រាកំណើនជាមធ្យមក្នុងរយៈពេល ៥ ឆ្នាំចុងក្រោយមានប្រហែល ២០ ភាគរយ។
លោកបានបន្ថែមថា បច្ចុប្បន្នទីផ្សារធានារ៉ាប់រងកម្ពុជាមានទ្រព្យសកម្ម ៩៤៨ លានដុល្លារ ជាមូលនិធិរបស់ម្ចាស់ហ៊ុនចំនួន ៤២៨ លានដុល្លារ។
លោកថ្លែងថា៖ «ដោយផ្អែកទៅលើអត្រាការចូលទីផ្សារការធានារ៉ាប់រងប្រហែល ១,១១ ភាគរយនៃសេដ្ឋកិច្ចកម្ពុជា និងដង់ស៊ីតេធានារ៉ាប់រងប្រហែល ១៨,៧៥ ដុល្លារក្នុងមនុស្សម្នាក់ កាលពីឆ្នាំ ២០២១ ដែលចំនួននេះបង្ហាញយ៉ាងច្បាស់ថា កំណើនវិស័យធានារ៉ាប់រងកម្ពុជានៅមានកម្រិតទាបបើធៀបនឹងតំបន់ និងពិភពលោក ដោយទីផ្សារធានារ៉ាប់រងរបស់កម្ពុជា នៅមានឱកាសច្រើនទៀត ដើម្បីភាពរីកចម្រើន»៕
