.jpg)
លោក យ៉ូស៊ីហ៊ីសា កៃនូម៉ា នាយកប្រតិបត្តិក្រុមហ៊ុន មីនីបៀ (ស្ដាំ) ក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៦ ខែ កក្កដា ឆ្នាំ ២០២២។ រូបថត SPM
ភ្នំពេញៈ ក្រុមហ៊ុន មីនីបៀ (Minebea) របស់ជប៉ុនបានបង្ហាញនូវទំនុកចិត្តសម្រាប់ការវិនិយោគរបស់ខ្លួននៅកម្ពុជា ក្រោយដំណើរការរោងចក្ររបស់ខ្លួនអស់រយៈពេលជាង ១០ ឆ្នាំមកនេះ។
នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៦ ខែកក្កដា ឆ្នាំ ២០២២ លោក យ៉ូស៊ីហ៊ីសា កៃនូម៉ា នាយកប្រតិបត្តិក្រុមហ៊ុន មីនីបៀ បានលើកឡើងថា នៅក្នុងរយៈពេល ១០ ឆ្នាំកន្លងមក ក្រុមហ៊ុនបានដាក់ទុនវិនិយោគសរុបប្រមាណ ១ ១២៤ ពាន់លានយ៉េន ឬស្មើនឹងប្រមាណ ៨, ២២២ ពាន់លានដុល្លារអាមេរិកនៅទូទាំងពិភពលោក ដែលមានរោងចក្រប្រមាណ ៩៥ កន្លែង។
លោក កៃនូម៉ា បានថ្លែងបញ្ជាក់បន្តថា ក្រុមហ៊ុនរបស់លោកគឺយកចិត្តទុកដាក់ខ្លាំងទៅលើគុណភាព តម្លៃ សេដ្ឋកិច្ច សេវាល្អ និងល្បឿនលឿន និងជាពិសេសទៅទៀតនោះ គឺយកចិត្តទុកដាក់ខ្លាំងទៅលើវិស័យបរិស្ថាន។ លោក កៃនូម៉ា បានបញ្ជាក់បន្ថែមថា៖ «ក្រុមហ៊ុន Minebea Cambodia ដែលមានរោងចក្ររបស់យើងផលិតភ្លើងអំពូលអិលអ៊ីឌី 100% នៅកម្ពុជា ហើយបាននាំចេញទៅលើទីផ្សារទូទាំងពិភពលោក។
ដោយឡែក នៅកម្ពុជាក្រុមហ៊ុនបានដំឡើង អំពូល LED បានចំនួន ១៨៨ ៨០ អំពូល ដែលក្នុងនោះបានជួយដល់ការកាត់បន្ថយការប្រើប្រាស់អគ្គិសនីផង ការកាត់បន្ថយការសាយភាយឧស្ម័នកាបូនិកផង ព្រមទាំងកាត់បន្ថយការចំណាយលើអគ្គិសនីប្រមាណ ១ លានដុល្លារក្នុង ១ ឆ្នាំផងដែរ។
លោកឱ្យដឹងបន្តទៀតថា ទោះបីជាមានការរំខានពីវិបត្តិជំងឺកូវីដ ១៩ បន្តិចមែន ប៉ុន្តែក្រុមហ៊ុនរបស់លោកនៅបន្តដំណើរការជារៀងរហូត ពុំមានការខកខានក្នុងចង្វាក់ផលិតកម្ម និងចង្វាក់ផ្គត់ផ្គង់ឡើយ។
លោកនាយករដ្ឋមន្ត្រី ហ៊ុន សែន បានលើកឡើងថា នៅក្នុងរយៈពេល ១០ ឆ្នាំកន្លងមកនេះ ក្រុមហ៊ុនពិតជាទទួលបានជោគជ័យខ្លាំងណាស់ក្នុងការវិនិយោគរបស់ខ្លួននៅកម្ពុជា ដោយបានពង្រីកសកម្មភាពរបស់ខ្លួនជាបន្តបន្ទាប់។
លោកនាយករដ្ឋមន្ត្រីបានបញ្ជាក់ថា៖ «ការសម្រេចចិត្តរបស់ក្រុមហ៊ុនក្នុងការមកវិនិយោគ គឺជារឿងដ៏ត្រឹមត្រូវ ដែលនេះជាគំរូបង្ហាញឱ្យក្រុមហ៊ុនទាំងអស់ ដែលមកប្រទេសកម្ពុជាមានជំនឿចិត្ត ចំពោះកម្ពុជា»។
ក្រុមហ៊ុន Minebea គឺជាក្រុមហ៊ុនជប៉ុនធំជាងគេនៅក្នុងប្រទេសកម្ពុជា ដែលបានចាប់ផ្តើមវិនិយោគកាលពីឆ្នាំ ២០១១ ជាមួយនឹងទឹកប្រាក់ប្រហែល ២៣ លានដុល្លារ ដើម្បីផលិតផលិតផលអេឡិចត្រូនិកនានាដូចជាឌីណាម៉ូ និងម៉ូទ័រ ដើម្បីនាំចេញទៅកាន់បរទេស រួមទាំងប្រទេសចិន សហរដ្ឋអាមេរិក និងសហភាពអឺរ៉ុបផងដែរ។
បើយោងតាមព័ត៌មានរបស់ក្រុមហ៊ុនកាលពីឆ្នាំ ២០១៦ ខ្លួនបានដាក់ឱ្យដំណើរការរោងចក្រទី ៣ ដែលមានទឹកប្រាក់វិនិយោគប្រហែល ២៥០ លានដុល្លារក្នុងតំបន់សេដ្ឋកិច្ចពិសេសភ្នំពេញ។
បើយោងតាមលោក យ៉ូស៊ីហ៊ីសា កៃនុម៉ា ក្រុមហ៊ុន Minebea Cambodia មានទុនវិនិយោគនៅកម្ពុជាប្រមាណ ជា ៣៧២ លានដុល្លារកាលពីឆ្នាំ ២០១៨ និងទុនវិនិយោគនេះបានកើនរហូតដល់ចំនួន ៤០០ លានដុល្លារនៅក្នុងឆ្នាំ ២០១៩។
កាលពីចុងខែធ្នូ ឆ្នាំ ២០១៩ ក្រុមហ៊ុនមីនីបៀបានបិទស្លាកសញ្ញាសម្គាល់ប្រភពផលិតនៅកម្ពុជា (Made in Cambodia) នៅលើឧបករណ៍ល្បែងក្មេងលេងរបស់ខ្លួន ដែលបាននាំចេញទៅក្រៅប្រទេស៕
