ភ្នំពេញៈ គម្រោងវិនិយោគដែលមានម្ចាស់ជាវិនិយោគិនសិង្ហបុរីចំនួន ១២៧ គម្រោង ស្មើនឹងទុនវិនិយោគ ១,៥៣ ពាន់លានដុល្លារ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តឱ្យវិនិយោគគិតនៅត្រឹមឆមាសទី១ ឆ្នាំ ២០២២។ នេះបើយោងតាមសេចក្តីប្រកាសព័ត៌មានរបស់ CDC។
សេចក្តីប្រកាសព័ត៌មានស្តីពីសិក្ខាសាលា «ស្វែងយល់ពីកម្ពុជា៖ ការយល់ដឹងពីកាលានុវត្តភាពធុរកិច្ចនៅកម្ពុជា» ដែលរៀបចំតាមប្រព័ន្ធវីដេអូ ដោយក្រុមប្រឹក្សាអភិវឌ្ឍន៍កម្ពុជាសហការជាមួយសហព័ន្ធធុរកិច្ចសិង្ហបុរី (SBF) និងមានការគាំទ្រពីស្ថានទូតសិង្ហបុរីប្រចាំនៅកម្ពុជា និងស្ថានទូតកម្ពុជាប្រចាំនៅសិង្ហបុរី កាលពីល្ងាចថ្ងៃទី ២៦ ខែកក្កដា ឱ្យដឹងថា គិតត្រឹមខែមិថុនា ឆ្នាំ ២០២២ គម្រោងវិនិយោគរបស់សិង្ហបុរីដែលបានអនុម័តដោយ CDC និងកំពុងមានប្រតិបត្តិការនៅកម្ពុជាមានចំនួន ១២៧ គម្រោង ដោយគម្រោងទាំងនោះមាននៅក្នុងវិស័យទេសចរណ៍ កម្មន្តសាល ហេដ្ឋារចនាសម្ព័ន្ធ និងវិស័យផ្សេងៗទៀត។
លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជាបានឱ្យដឹងថា បរិស្ថានវិនិយោគនៅកម្ពុជាដែលមានភាពអំណោយផល គឺជាមូលដ្ឋានគ្រឹះដ៏រឹងមាំសម្រាប់រង់ចាំទទួលការវិនិយោគរបស់សិង្ហបុរី ដើម្បីច្បាមយកកាលានុវត្តភាពដ៏លើសលប់ក្នុងវិស័យកសិ-ចំណីអាហារ, សេវាកម្ម និងកម្មន្តសាល។
លោកបានបន្តថា ក្រៅពីមានស្ថិរភាពនយោបាយល្អប្រសើរ ច្បាប់ស្តីពីវិនិយោគកម្ពុជា ដែលបានអនុម័តកាលពីខែតុលា ឆ្នាំ ២០២១ ក៏ផ្តល់នូវការលើកទឹកចិត្តច្រើនផងដែរដល់វិនិយោគិនដែលអនុវត្តអភិក្រមប្រតិបត្តិធុរកិច្ចប្រកបដោយការទទួលខុសត្រូវ និងបរិយាប័ន្នក្នុងការវិនិយោគ និងធុរកិច្ចប្រចាំថ្ងៃរបស់ខ្លួន។
លោកថ្លែងថា៖ «ការវិនិយោគសិង្ហបុរីនៅកម្ពុជា គឺមានសារៈសំខាន់ណាស់ យើងអំពាវនាវឱ្យមានការវិនិយោគកាន់តែច្រើនថែមទៀតពីវិនិយោគិនសក្តានុពលសិង្ហបុរី ដែលនឹងរួមចំណែកដល់ការស្តារឡើងវិញ និងអភិវឌ្ឍសេដ្ឋកិច្ចកម្ពុជាបានយ៉ាងឆាប់រហ័ស»។
ឯកអគ្គរដ្ឋទូតសិង្ហបុរីប្រចាំនៅកម្ពុជា លោកស្រី Teo Lay Cheng បានឱ្យដឹងថា សិង្ហបុរីស្ថិតនៅក្នុងចំណោមវិនិយោគិនបរទេសធំជាងគេទាំង ៥ របស់កម្ពុជា។ ការវិនិយោគនោះគ្របដណ្តប់លើវិស័យមួយចំនួនដូចជា អចលនទ្រព្យ, ថាមពល, ពាណិជ្ជកម្ម និងចែកចាយ, ម្ហូបអាហារ/អ្នកប្រើប្រាស់, ការអប់រំ និងហិរញ្ញវត្ថុ។
អនុប្រធានសភាកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៧ ខែកក្កដាថា សិង្ហបុរី គឺជាដៃគូពាណិជ្ជកម្មល្អរបស់កម្ពុជាជាយូរមកហើយ ខណៈការវិនិយោគផ្ទាល់របស់សិង្ហបុរីនៅកម្ពុជាក៏មានច្រើនវិស័យផងដែរ។
លោកបន្ថែមថា ម្យ៉ាងទៀតដោយសារសិង្ហបុរី គឺជាទីតាំងឆ្លងកាត់ទំនិញដ៏សំខាន់របស់ពិភពលោក ដូច្នេះបើប្រទេសទាំង ២ អាចបង្កើនកិច្ចសហការជាមួយគ្នាកាន់តែល្អ វានឹងជួយជំរុញការនាំចេញរបស់កម្ពុជាទៅទីផ្សារអន្តរជាតិកាន់តែច្រើន។
លោកថ្លែងថា៖ «វិនិយោគិនសិង្ហបុរីកំពុងរួមចំណែកយ៉ាងច្រើនក្នុងខ្សែចង្វាក់ផលិតកម្មនៅកម្ពុជា ទាំងសម្រាប់ការផ្គត់ផ្គង់ក្នុងស្រុក និងការនាំចេញពីកម្ពុជាទៅទីផ្សារអន្តរជាតិ»។
បន្ថែមពីលើនេះនៅក្នុងជំនួបរវាងលោក ទិត ចន្ថា រដ្ឋលេខាធិការក្រសួងទេសចរណ៍ ជាមួយលោក Tong Edwin រដ្ឋមន្ត្រីក្រសួងវប្បធម៌ សហគមន៍ និងយុវជនសិង្ហបុរី កាលពីថ្ងៃទី ២៦ ខែ កក្កដា ឆ្នាំ ២០២២ កម្ពុជា-សិង្ហបុរី ក៏បានសន្យាបង្កើនជើងហោះហើរជាមួយគ្នាបន្ថែមទៀត ដើម្បីទាក់ទាញកំណើនទេសចរអន្តរជាតិមកកម្ពុជា ពិសេសត្រៀមលក្ខណៈក្នុងការដឹកជញ្ជូនអ្នកដំណើរ និងត្រៀមទទួលភ្ញៀវទេសចរនៅពេលស៊ីហ្គេមមកដល់ តាមរយៈជើងហោះហើរកម្ពុជា-សិង្ហបុរី របស់ Singapore Airline និងក្រុមហ៊ុនផ្សេងៗទៀត៕