.jpg)
ភ្ញៀវទេសចរទៅទស្សនាប្រាសាទអង្គរវត្ត កាលពីឆ្នាំ ២០១៩។ ហុង មិនា
សៀមរាបៈ កម្ពុជាប្រកាសផ្សព្វផ្សាយពីសមាសភាព និងយន្តការអនុវត្តចំណុះឱ្យគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ និងប្រកាសដាក់ឱ្យអនុវត្តផែនការសកម្មភាពនៃផែនការមេអភិវឌ្ឍន៍ទេសចរណ៍ ខេត្តសៀមរាប (ឆ្នាំ ២០២២-២០២៣) ដើម្បីជំរុញកំណើនទេសចរជាតិ និងអន្តរជាតិ។
ផែនការសកម្មភាពនៃផែនការមេអភិវឌ្ឍន៍ទេសចរណ៍ខេត្តសៀមរាបនេះ បានដាក់ចេញនូវយុទ្ធសាស្ត្រចំនួន ១៧ និងសកម្មភាពអនុវត្តចំនួន ៣៧ ក្នុងនោះគោលដៅទេសចរណ៍អាទិភាពចំនួន ៦ ដែលត្រូវអនុវត្តក្នុងផែនការសកម្មភាពតំបន់ទេសចរណ៍ជុំវិញតំបន់ការពារប្រាសាទបន្ទាយស្រី, តំបន់ទេសចរណ៍ជុំវិញតំបន់ការពារប្រាសាទបន្ទាយស្រី, តំបន់បេតិកភណ្ឌអង្គរ, តំបន់ក្រុងសៀមរាប, តំបន់បឹងទន្លេសាប និងតំបន់ទេសចរណ៍សៀមរាបថ្មី។
ក្នុងពិធីប្រកាសផ្សព្វផ្សាយអមជាមួយការប្រកាសផែនការសកម្មភាពនៃផែនការមេអភិវឌ្ឍន៍ទេសចរណ៍ កាលពីថ្ងៃទី ១ ខែ សីហា ឆ្នាំ ២០២២ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈប្រតិបត្តិនៃគណៈកម្មការគ្រប់គ្រង និងអភិវឌ្ឍន៍ទេសចរណ៍ខេត្តសៀមរាបបានថ្លែងថា ភាពជោគជ័យនៃការអនុវត្តនៅក្នុងឆមាសទី២ ឆ្នាំ ២០២២ និងឆ្នាំ ២០២៣ នឹងដើរតួជាមូលដ្ឋានសំខាន់បំផុតសម្រាប់ជំរុញដល់ការអភិវឌ្ឍវិស័យទេសចរណ៍កម្ពុជាឱ្យដល់កម្រិតដូចមុនពេលវិបត្តិ និងកាន់តែប្រសើរ ជាងមុន ទាំងនៅលើទិដ្ឋភាពបរិមាណ និងគុណភាព។
លោកបន្តថា ក្រោយពីការប្រកាសដាក់ឱ្យអនុវត្តផែនការសកម្មភាពនេះ ខេត្តសៀមរាបរំពឹងថា នឹងទទួលបានទេសចរអន្តរជាតិជាង ១០ ម៉ឺននាក់ក្នុងឆ្នាំនេះ ហើយនឹងកើនដល់ ៥០ ម៉ឺននាក់ ក្នុងឆ្នាំ ២០២៣។
លោកបន្ថែមថា សៀមរាប គឺជាគោលដៅចម្បងបំផុតដែលចាំបាច់ត្រូវតែស្តារសកម្មភាពទេសចរណ៍ឡើងវិញទាំងការជំរុញចលនាទេសចរណ៍ផ្ទៃក្នុង និងការខិតខំទាក់ទាញទេសចរអន្តរជាតិពីប្រភពទីផ្សារសំខាន់ៗក្នុងដំណាក់កាលនេះ។
លោកបញ្ជាក់ថា៖ «ការកាត់បន្ថយនូវរបាំងនៃការធ្វើដំណើរ រួមជាមួយការគ្រប់គ្រងបាននៃការរីករាលដាលជំងឺកូវីដ ១៩ កំពុងចូលរួមជំរុញកំណើននៃការធ្វើដំណើររបស់ភ្ញៀវទេសចរផ្ទៃក្នុង និងការមកដល់របស់ភ្ញៀវអន្តរជាតិ រួមជាមួយកំណើននៃការតភ្ជាប់ឡើងវិញនូវជើងហោះហើរចូលមកកម្ពុជាគួរឱ្យកត់សម្គាល់ ដែលនេះជាសញ្ញាវិជ្ជមាននៃការងើបឡើងវិញនៃវិស័យទេសចរណ៍កម្ពុជា»។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានថ្លែងថា ផែនការមេអភិវឌ្ឍន៍ទេសចរណ៍ខេត្តសៀមរាប គឺជាផែនការមេដំបូងគេដែលត្រូវបានប្រកាសឱ្យអនុវត្តដោយតាមរយៈផែនការសកម្មភាពឆ្នាំ២០២២-២០២៣ នេះ សៀមរាបនឹងទទួលបានភ្ញៀវទេសចរដូចការរំពឹងទុក។
លោកថ្លែងថា៖ «សមាសភាព និងយន្តការអនុវត្តចំណុះឱ្យគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប បានប្រកាសជាផ្លូវការហើយ។ យើងមានជំនឿថា គ្រប់ភាគីពាក់ព័ន្ធនឹងខិតខំធ្វើយ៉ាងណាជំរុញការអនុវត្តផែនការសកម្មភាពនេះឱ្យទទួលជោគជ័យ ជាពិសេសអភិវឌ្ឍន៍ និងកែលម្អគោលដៅទេសចរណ៍អាទិភាពសំខាន់ៗទាំង ៦ ឱ្យមានប្រសិទ្ធភាព»។
លោក ទៀ សីហា អភិបាលខេត្តសៀមរាប បាននិយាយថា ការអភិវឌ្ឍហេដ្ឋារចនាសម្ព័ន្ធថ្មីៗក្នុងខេត្ត គួបផ្សំនឹងផែនការមេអភិវឌ្ឍន៍ទេសចរណ៍នៅខេត្តសៀមរាប នឹងជំរុញកំណើនទេសចរជាតិ និងអន្តរជាតិមកកាន់សៀមរាប ឱ្យដល់កម្រិតដូចមុនពេលមានវិបត្តិ និងកាន់តែប្រសើរជាងមុន។
លោកនិយាយថា៖ «គម្រោងហេដ្ឋារចនាសម្ព័ន្ធផ្លូវថ្នល់ និងផ្លូវ៣៨ខ្សែ ក្នុងក្រុងសៀមរាប ដែលរដ្ឋាភិបាលបានប្រើប្រាស់កញ្ចប់ថវិកាពិសេសប្រមាណជាង ១៥០ លានដុល្លារនេះ គឺជាការវិនិយោគមួយដ៏ត្រឹមត្រូវ និងមានចក្ខុវិស័យវែងឆ្ងាយ ដើម្បីជំរុញ និងស្តារឡើងវិញនូវវិស័យទេសចរណ៍នៅក្នុងខេត្តសៀមរាប ឱ្យត្រឡប់ទៅភាពល្អប្រសើរឡើងវិញ»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានឱ្យដឹងថា វិស័យឯកជនបានចូលរួមយ៉ាងសកម្មជាមួយក្រសួងទេសចរណ៍ និងស្ថាប័នជាច្រើនទៀតក្នុងការផ្តល់នូវធាតុចូលដើម្បីកសាងគោលនយោបាយ និងយុទ្ធសាស្ត្រទាក់ទាញទីផ្សារដែលមានសក្តានុពល។
លោកស្រីអះអាងថា៖ «យើងរំពឹងថា ការដាក់ឱ្យអនុវត្តផែនការនេះនឹងជួយជំរុញពន្លឿនដល់ផែនការមេអភិវឌ្ឍន៍ឱ្យបានទទួលជោគជ័យតាមការគ្រោងទុក និងជួយជំរុញដល់ការចូលរួមពីភាគីពាក់ព័ន្ធក្នុងការពង្រឹងគុណភាពបដិសណ្ឋារកិច្ច សេវាកម្មផលិតផលទេសចរណ៍ ធនធានមនុស្ស និងសមត្ថភាពវិជ្ជាជីវៈទេសចរណ៍បន្ថែមទៀត»។
របាយការណ៍ក្រសួងទេសចរណ៍ឱ្យដឹងថា ក្នុងឆមាសទី១ ឆ្នាំ ២០២២ ខេត្តសៀមរាបបានទទួលទេសចរអន្តរជាតិប្រមាណ ៦ ម៉ឺននាក់ កើនឡើង ១ ០២៥ ភាគរយ បើធៀបរយៈពេលដូចគ្នាឆ្នាំ ២០២១ និងភ្ញៀវទេសចរផ្ទៃក្នុងជាង ១ លាននាក់ កើន ៧៩៨ ភាគរយ។ ជើងហោះហើរមកកាន់ខេត្តសៀមរាប មានចំនួន ៣៨៧ ជើង៕
