ភ្នំពេញៈ ការធូរស្រាលស្ថានភាពការឆ្លងរាលដាលជំងឺកូវីដ ១៩ និងការងើបឡើងកំណើនសេដ្ឋកិច្ចពិភពលោកបានធ្វើឱ្យការប្រមូលចំណូលពន្ធគយក្នុងឆមាសទី១ ឆ្នាំ ២០២២ សម្រេចបានជិត ១,៣ ពាន់លានដុល្លារ កើន ១២ ភាគរយ បើធៀបនឹងរយៈពេលដូចគ្នាឆ្នាំ ២០២១។ នេះបើតាមទិន្នន័យអគ្គនាយកដ្ឋានគយ និងរដ្ឋាករកម្ពុជា។
សេចក្តីប្រកាសព័ត៌មានស្តីពីលទ្ធផលការងារគយ និងរដ្ឋាករកម្ពុជា ឆមាសទី ១ ឆ្នាំ ២០២២ ដែលរៀបចំកាលពីថ្ងៃទី ៣ ខែសីហា បានឱ្យដឹងថា ពីខែមករា-មិថុនា ឆ្នាំ ២០២២ ការប្រមូលចំណូលពន្ធគយសម្រេចបាន ៥ ២៥៩,៥ ពាន់លានរៀល ស្មើប្រមាណ ១ ២៩៥,៤ លានដុល្លារ កើន ១២ ភាគរយធៀបនឹងចំណូលក្នុងឆមាសទី ១ ឆ្នាំ ២០២១។ លទ្ធផលនេះស្មើ ៥០,២ ភាគរយនៃផែនការកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២។
យោងតាមសេចក្តីប្រកាសព័ត៌មាន បើគិតតាមប្រភេទពន្ធ និងអាករឃើញថា អាករពិសេសមានចំនួន ១ ៩៧៧,៧ ពាន់លានរៀល (៣៧,៩ភាគរយនៃចំណូលសរុប), អាករលើតម្លៃបន្ថែម ១ ៩៩៦ ពាន់លានរៀល (៣៧,៦ភាគរយ), ពន្ធគយ ៩៨៩,៨ពាន់លានរៀល (១៨,៨ភាគរយ), អាករបន្ថែមលើផលិតផលប្រេង ១៨៩,៤ ពាន់លានរៀល (៣,៦ភាគរយ), និងអាករនាំចេញ និងកម្រៃផ្សេងៗចំនួន ១០៦,៦ ពាន់លានរៀល (២,១ភាគរយ)។
ចំពោះចំណូលតាមក្រុមទំនិញ គឺយានយន្ត និងគ្រឿងចក្រ ២ ៣៧១,៥ពាន់លានរៀល (៤៥,១ភាគរយ), ទំនិញចម្រុះ ១ ៤៥៦,១ ពាន់លានរៀល (២៧,៧ភាគរយ), ផលិតផលតេលសិលា ១ ១១០,៣ ពាន់លានរៀល (២១,១ភាគរយ), និងសម្ភារសំណង់ និងកម្រៃផ្សេងៗ ៣២១,៦ ពាន់លានរៀល (៦,១ភាគរយ)។
ក្នុងឱកាសចូលរួមក្នុងកិច្ចប្រជុំខាងលើ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគយគ្រប់ជាន់ថ្នាក់ដែលអាចសម្រេចបាននូវលទ្ធផលល្អប្រសើរលើគ្រប់ការដ្ឋានការងារ។ ជាមួយគ្នានេះលោកក៏ផ្តល់ការណែនាំមួយចំនួនដើម្បីបង្កើនប្រសិទ្ធភាពការងារ និងការប្រមូលចំណូលក្នុងឆមាសទី ២ និងពេលបន្តបន្ទាប់ទៀត។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី ៤ ខែសីហាថា ពន្ធគយ និងពន្ធដារ គឺជាប្រភពចំណូលដ៏សំខាន់សម្រាប់រដ្ឋាភិបាលប្រើប្រាស់យកទៅអភិវឌ្ឍប្រទេសលើគ្រប់វិស័យ។ ការកើនឡើងចំណូលពន្ធគយ គឺបញ្ជាក់ពីកំណើននៃសកម្មភាពនាំចេញ-នាំចូលទំនិញ ហើយវានឹងមានសញ្ញាវិជ្ជមានបន្ថែមទៀតនៅពេលខាងមុខ។
លោកថ្លែងថា៖ «វឌ្ឍនភាពនៃការសម្រេចបានកំណើននេះមិនត្រឹមតែជួយរដ្ឋាភិបាលឱ្យមានចំណូលកាន់តែច្រើនប៉ុណ្ណោះទេ ប៉ុន្តែវាក៏អាចបង្ហាញពីប្រសិទ្ធភាពនៃការប្រមូលចំណូលពន្ធគយ និងកំណើនសេដ្ឋកិច្ចជាតិផងដែរ»។
ថ្នាក់ដឹកនាំនៃអគ្គនាយកដ្ឋានគយ និងរដ្ឋាករកម្ពុជា កាលពីដើមសប្តាហ៍នេះ បានឱ្យដឹងថា អគ្គនាយកដ្ឋានគយ និងរដ្ឋាករកម្ពុជា ត្រូវបាត់ចំណូលប្រមាណជិត ៨០០ លានដុល្លារពីការអនុគ្រោះពន្ធនាំចូលតាមរយៈកិច្ចព្រមព្រៀងពាណិជ្ជកម្មសេរី នានា ការលើកទឹកចិត្តផ្នែកពន្ធនានាដល់សហគ្រាសក្នុងស្រុក និងការលើកទឹកចិត្តវិនិយោគផ្នែកយានយន្ត និងអេឡិចត្រូនិក។
ឆ្នាំ ២០២១ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបាន ២ ២៩៥,២ លានដុល្លារ ថយចុះ ៥,១ ភាគរយបើធៀបនឹងចំណូលនៅក្នុងឆ្នាំ ២០២០។ នេះបើយោងតាមទិន្នន័យអគ្គនាយកដ្ឋានគយ និងរដ្ឋាករកម្ពុជា៕