ភ្នំពេញៈ គម្រោងកម្ពុជាហាវែស III(Harvest III) ក្រោមជំនួយពីទីភ្នាក់ងារសហរដ្ឋអាមេរិក USAID ដែលមានរយៈពេល ៥ ឆ្នាំត្រូវរំពឹងថានឹងជួយបង្កើនទុនវិនិយោគ ១៥៣ លានដុល្លារដល់ផ្នែកឯកជន, ហិរញ្ញប្បទានទាក់ទងទៅនឹងកសិកម្ម និងការលក់ផលិតផលកសិកម្ម ព្រមទាំងអាចបង្កើតការងារបាន ៣ ២០០ កន្លែង។
កម្មវិធី Feed the Future Cambodia Harvest III (Harvest III) ក្នុងរយៈពេល ៥ ឆ្នាំនេះ គឺចាប់ផ្តើមពីខែមេសា ឆ្នាំ ២០២២ ដល់ខែមីនា ឆ្នាំ ២០២៧ នឹងធ្វើការក្នុងភាពជាដៃគូជាមួយផ្នែកឯកជនរាប់រយក្រុមហ៊ុនតាមរយៈកិច្ចខិតខំប្រឹងប្រែងរួមគ្នាជាមួយដៃគូផ្នែកឯកជន។ ទីភ្នាក់ងារ USAID រំពឹងថានឹងជួយផ្នែកឯកជនឱ្យបង្កើនទុនវិនិយោគប្រមាណ ៣៨ លានដុល្លារ, ទុនសម្រាប់ហិរញ្ញប្បទានទាក់ទងនឹងវិស័យកសិកម្ម ១៥ លានដុល្លារ និងការលក់នៅតាមកសិដ្ឋាននានា និងផ្នែកឯកជនចំនួន ១០០ លានដុល្លារ។ Harvest III នឹងធ្វើការជាមួយអ្នកផលិត និងសមាគមអ្នកផលិត, កសិពាណិជ្ជកម្ម, អ្នកផ្តល់សេវាកម្ម និងបច្ចេកវិទ្យា,ស្ថាប័នហិរញ្ញវត្ថុ និងអ្នកវិនិយោគ និងភាគីពាក់ព័ន្ធដទៃទៀត។
Harvest III មានគោលដៅចំនួន ២ គឺទី១ ពង្រឹងប្រព័ន្ធទីផ្សារកសិកម្មប្រកបដោយនិរន្តរភាព និងបរិយាប័ន្ន តាមរយៈការបង្កើនការវិនិយោគពីផ្នែកឯកជន ដើម្បីពង្រឹងភាពធន់នឹងអាកាសធាតុ និងប្រព័ន្ធទីផ្សារកសិកម្ម ប្រកបដោយភាពប្រកួតប្រជែង។ នៅក្នុងនោះគម្រោងក៏ជួយពង្រឹងសមត្ថភាពបច្ចេកទេស និងអាជីវកម្មរបស់កសិដ្ឋាន និងក្រុមហ៊ុនឯកជន កសិករ សហគ្រិនស្ត្រី និងយុវជន ដើម្បីបង្កើនប្រាក់ចំណូលរបស់ពួកគេ។ គោលដៅទី ២ គឺពង្រឹងទំនាក់ទំនង និងការជឿទុកចិត្តនៅក្នុងចំណោមតួអង្គទីផ្សារ សម្រាប់ទីផ្សារក្នុងស្រុក និងអន្តរជាតិ ដោយត្រូវបង្កើនលទ្ធភាពទទួលបានទីផ្សារផលិតផល និងសេវាកម្មកសិកម្ម រួមទាំងស្ត្រី និងអាជីវកម្មគ្រប់គ្រងដោយយុវជន និងការធ្វើឱ្យប្រសើរឡើងនូវសុវត្ថិភាពចំណីអាហារ និងការតាមដានផលិតផលកសិកម្ម តាមរយៈបង្កើនការប្រើប្រាស់បច្ចេកវិទ្យា។
ក្នុងឱកាសអញ្ជើញចូលរួមកិច្ចប្រជុំថ្នាក់រដ្ឋមន្ត្រីការបរទេស និងកិច្ចប្រជុំពាក់ព័ន្ធអាស៊ាននៅកម្ពុជាកាលពីថ្ងៃទី ៤ សីហា លោក Antony Blinken រដ្ឋមន្ត្រីការបរទេសអាមេរិកបានឆ្លៀតចូលរួមក្នុងកម្មវិធីប្រកាសអំពីការផ្តល់មូលនិធិសន្តិសុខស្បៀងក្រោមជំនួយពីទីភ្នាក់ងារ USAID ដោយលោកលើកឡើងថា កម្ពុជាបាននាំផលិតផលជាច្រើនទៅកាន់សហរដ្ឋអាមេរិក និងពិភពលោក។ ក្នុងចំណោមផលិតផលទាំងនោះ គ្រាប់ស្វាយចន្ទីកម្ពុជាត្រូវបានគេទទួលស្គាល់ថា ពិតជាមានគុណភាពល្អ។
លោកបញ្ជាក់ថា៖ «ដើម្បីគាំទ្រដល់កំណើនសេដ្ឋកិច្ចប្រទេសកម្ពុជា និងប្រជាជនកម្ពុជាដែលពឹងផ្អែកទៅលើវិស័យកសិកម្មជាប្រភពចំណូលចម្បងរបស់ពួកគេ វិធីសាស្ត្រផលិតកម្មកសិកម្មត្រូវតែធ្វើទំនើបកម្ម។ កម្ពុជាត្រូវតែបង្កើនការប្រកួតប្រជែងរបស់ខ្លួននៅក្នុងទីផ្សារក្នុងស្រុក និងអន្តរជាតិ ដែលមានន័យថាការកែលម្អលទ្ធភាពទទួលបានហិរញ្ញវត្ថុ បង្កើនតម្លៃបន្ថែម កាត់បន្ថយការប្រឈមនឹងហានិភ័យអាកាសធាតុ ការកែលម្អគុណភាព និងការប្រកាន់ខ្ជាប់នូវស្តង់ដាសុវត្ថិភាព និងការបង្កើនលទ្ធភាពទទួលបានសេវាកសិកម្ម»។
លោក Patrick Murphy ឯកអគ្គរដ្ឋទូតអាមេរិកប្រចាំកម្ពុជាបានលើកឡើងថា Harvest III នឹងជួយកសិករជាច្រើនឱ្យបង្កើនការធ្វើពាណិជ្ជកម្ម និងនាំយកនូវបច្ចេកវិទ្យាទំនើប ដែលនឹងអាចជួយបង្កើនផលិតភាព និងទទួលបានតម្លៃបន្ថែមពីការផលិតនូវផលិតផលទាំងនោះ និងទទួលបានការអភិវឌ្ឍប្រកបដោយនិរន្តរភាព។
លោកបញ្ជាក់ថា៖ «ភ្នាក់ងារទាំង ២ USAID និង US Department of Agriculture បាននិងកំពុងអនុវត្តនូវកម្មវិធីជួយដល់ការផ្តល់មូលនិធិសន្តិសុខស្បៀង ប្រកបដោយភាពធន និងជួយដល់កំណើនសេដ្ឋកិច្ចកម្ពុជា»។
លោកស្រី ប៊ុន សៀង ប្រធានក្រុមហ៊ុនភូមិកសិកម្មធម្មជាតិបាននិយាយថា ក្រុមហ៊ុនលោកស្រីទទួលបានមូលនិធិប្រមាណ ៥ ម៉ឺនដុល្លារ ពី Harvest II ដែលទើបបានបញ្ចប់កាលពីពេលថ្មីៗនេះ ដោយលោកស្រីបានប្រើប្រាស់មូលនិធិនេះបានជួយដល់ការផ្សារភ្ជាប់ទីផ្សារជាមួយកសិករកាន់ច្រើន បង្កើនគុណភាព និងស្តង់ដាបន្លែ សម្រាប់អ្នកបរិភោគ។
លោកស្រីប្រាប់ថា៖ «បញ្ហាប្រឈមរបស់អ្នកផលិតបន្លែនាពេលនេះគឺកត្តាអាកាសធាតុ។ យើងរំពឹងថា គម្រោង Harvest III នេះនឹងអាចជួយដល់ពួកយើងក្នុងការដោះស្រាយបញ្ហាបម្រែបម្រួលអាកាសធាតុ ដោយអាចឱ្យយើងបន្តផលិតបន្លែសុវត្ថិភាពបានគ្រប់រដូវ ដើម្បីតម្រូវការទីផ្សារ»។
គួរបញ្ជាក់ថា គម្រោង Harvest នេះបានដំណើរការ ២ ដងមកហើយ ដោយគម្រោងកម្ពុជាហាវែស II ក្រោមជំនួយទីភ្នាក់ងារសហរដ្ឋអាមេរិក USAID ទើបបានបញ្ចប់កាលពីពេលថ្មីៗនេះ។ ក្នុងរយៈពេល ៥ ឆ្នាំកន្លងមក គម្រោងកម្ពុជាហាវែស II បានជួយផ្នែកឯកជនបង្កើនទុនវិនិយោគប្រមាណ ២៨ លានដុល្លារ បង្កើតការងារបានជាង ២ ៥០០ កន្លែង គាំទ្រដល់ការអភិវឌ្ឍគោលនយោបាយកសិកម្មចំនួន ១៧ និងជួយគាំទ្រអាជីវកម្ម និងអ្នកផលិតក្នុងវិស័យសាកវប្បកម្ម បង្កើនការលក់បានជាង ៧៥ លានដុល្លារ៕