ភ្នំពេញៈ តម្លៃប្រេងឥន្ធនៈនៅកម្ពុជាបានធ្លាក់ចុះបន្តទៀតហើយ ដោយនៅថ្ងៃទី ១១ ខែសីហា ឆ្នាំ ២០២២ នេះតាមការជូនដំណឹងពីក្រសួងពាណិជ្ជកម្មបានបញ្ជាក់ថាតម្លៃប្រេងឥន្ធនៈបានបន្តចុះថ្លៃ ដោយប្រេងសាំងធម្មតា មានតម្លៃ ៤ ៦៥០ រៀល ក្នុងមួយលីត្រ (ចុះ ១០០ រៀល) និងប្រេងម៉ាស៊ូត មានតម្លៃ ៥០០០ រៀលក្នុងមួយលីត្រ (ចុះ ១៥០ រៀល) ដែលត្រូវអនុវត្តចាប់ពីថ្ងៃទី ១១ ដល់ថ្ងៃទី ២០ ខែសីហា ឆ្នាំ ២០២២ ។
បើតាមអ្នកជំនាញសេដ្ឋកិច្ច តម្លៃប្រេងឥន្ធនៈអន្តរជាតិហាក់មាននិន្នាការធ្លាក់ចុះមកវិញជាបន្តបន្ទាប់ នៅក្នុងរយៈពេលចុងក្រោយនេះ បន្ទាប់ពីប្រទេសឥណ្ឌា និងអ៊ីរ៉ង់បានបង្កើនការទិញប្រេងពីប្រទេសរុស្ស៊ី ដោយការសហការរបស់ប្រទេសទាំងនេះត្រូវបានអ្នកជំនាញសេដ្ឋកិច្ចយល់ឃើញថា អាចនឹងកាត់បន្ថយសម្ពាធនៃវិបត្តិតម្លៃប្រេងជាសកល។
របាយការណ៍បច្ចុប្បន្នភាពស្តីពីស្ថានភាពសេដ្ឋកិច្ចនៅកម្ពុជារបស់ធនាគារពិភពលោក ដែលបានចេញកាលពីចុងខែមិថុនាបានបង្ហាញថា ប្រេងឥន្ធនៈឡើងថ្លៃគួបជាមួយអតុល្យភាពជញ្ជីងពាណិជ្ជកម្មបរទេសរបស់កម្ពុជាបានបន្ថែមផលប៉ះពាល់អវិជ្ជមានដល់សេដ្ឋកិច្ច។ ធនាគារពិភពលោកបានផ្តល់អនុសាសន៍មួយចំនួន ដើម្បីទ្រទ្រង់សកម្មភាពស្តារសេដ្ឋកិច្ចឱ្យងើបឡើងវិញ រួមមាន ការបន្តខិតខំទប់ស្កាត់ការឆ្លងរីករាលដាលជំងឺកូវីដ ១៩, បន្តពង្រឹងភាពជឿទុកចិត្តរបស់អ្នកទទួលប្រើប្រាស់ និងវិនិយោគិន,ជំរុញការនាំចេញ ជាពិសេសកសិផល តាមរយៈកិច្ចសម្របសម្រួលពាណិជ្ជកម្ម និងកាត់បន្ថយថ្លៃដើមក្នុងការធ្វើអាជីវកម្ម និងបន្តរក្សាលំនឹងថ្លៃទំនិញលក់រាយនៅលើទីផ្សារជាដើម៕