.jpg)
ភ្ញៀវទេសចរជាច្រើនទៅកម្សាន្តនៅប្រាសាទអង្គរវត្តក្នុងខេត្តសៀមរាប ។ ហេង ជីវ័ន
ភ្នំពេញៈខេត្តសៀមរាបរំពឹងថានឹងអាចទទួលបានភ្ញៀវទេសចរជាង ២ លាននាក់ក្នុងឆ្នាំ ២០២២ នេះ ខណៈរយៈពេល ៧ ខែដើមឆ្នាំខេត្តមួយនេះមានភ្ញៀវទៅកម្សាន្តជាង ១,២ លាននាក់រួចមកហើយ។ នេះបើតាមថ្នាក់ដឹកនាំក្រសួងទេសចរណ៍។
រដ្ឋមន្ត្រីក្រសួងទេសចរណ៍លោកថោងខុននៅថ្ងៃទី ១៦ ខែសីហា បានលើកឡើងថាក្នុងឆ្នាំ ២០២២ ចំនួនភ្ញៀវទេសចរ (ទាំងក្នុងស្រុក និងបរទេស) ទៅកម្សាន្តនៅខេត្តសៀមរាបនឹងអាចមានចំនួនប្រហែល ២ ២៧៨ ៨៥៤ នាក់ខណៈក្នុងរយៈពេល ៧ ខែឆ្នាំ ២០២២ ខេត្តសៀមរាបទាំងមូលទទួលបានភ្ញៀវទេសចរសរុប ១ ២៤២ ៨៥៤ នាក់មកហើយ។
លោកបានអះអាងថា៖ «តាមការព្យាករសម្រាប់រយៈពេលពេញមួយឆ្នាំ ២០២២ នេះភ្ញៀវទេសចរចូលមកកម្សាន្តក្នុងខេត្តសៀមរាបនឹងឡើងដល់ ២ ២៧៨ ៨៥៤ នាក់»។
យោងតាមលោកថោងខុនចំនួនជាង ២ លាននាក់ដែលជាការរំពឹងទុកនេះនឹងកើនឡើងក្នុងអត្រា ៣២៦,៧៥ ភាគរយបើធៀបនឹងឆ្នាំ ២០២១ ដែលមានចំនួន ៥៣៤,០០៥ នាក់។ ក្នុងនោះភ្ញៀវទេសចរជាតិនឹងឡើងដល់ចំនួន ២ ០៣៩ ០០០ នាក់កើនឡើង ២៩១,២៦ ភាគរយនិងភ្ញៀវទេសចរអន្តរជាតិនឹងឡើងដល់ ២៣៩ ៨៥៤ នាក់កើនឡើង ១ ៧៦៣,២៣ ភាគរយ។
លោក ថោង ខុន បានបន្តទៀតថា ដើម្បីចូលរួមជំរុញដល់កំណើននេះក្រសួងទេសចរណ៍បាននិងកំពុងពិភាក្សាជាមួយក្រសួង/ស្ថាប័នពាក់ព័ន្ធ និងផ្នែកឯកជនអំពីលទ្ធភាពក្នុងការបង្កើត «កញ្ចប់ទស្សនកិច្ចពិសេស» ដើម្បីទាក់ទាញឱ្យទេសចរមកទស្សនាខេត្តសៀមរាបច្រើនដង។
បន្ថែមពីលើនោះលោកថោងខុនក៏បានជំរុញឱ្យមានការយកចិត្តទុកដាក់ចំពោះធនធានមនុស្ស ដែលបម្រើឱ្យវិស័យទេសចរណ៍ផងដែរ ដោយលោកបានចាត់ក្រុមការងារក្រសួងទេសចរណ៍ឱ្យចុះពិនិត្យជំហានទី ២ ដើម្បីវាយតម្លៃពីគុណភាពសេវាកម្ម និងបដិសណ្ឋារកិច្ចក៏ដូចជាផ្ដល់ការបណ្តុះបណ្តាលពង្រឹងសមត្ថភាពដល់អ្នកបម្រើការក្នុងវិស័យទេសចរណ៍នៅខេត្តសៀមរាបបន្ថែមទៀត។
ដើម្បីបង្កើនភាពទាក់ទាញឱ្យភ្ញៀវទេសចរធ្វើដំណើរទៅកម្សាន្តខេត្តសៀមរាបបានកាន់តែច្រើនរាជរដ្ឋាភិបាលកម្ពុជាកាលពីថ្ងៃទី ២០ ខែតុលាឆ្នាំ ២០២១ បានប្រកាសជាផ្លូវការដាក់ឱ្យអនុវត្តផែនការមេអភិវឌ្ឍន៍ទេសចរណ៍ខេត្តសៀមរាបឆ្នាំ ២០២១-២០៣៥។
ក្រសួងទេសចរណ៍ធ្លាប់បានប្រកាសថា តាមរយៈផែនការមេនេះខេត្តសៀមរាបរំពឹងនឹងអាចទាក់ទាញបានភ្ញៀវទេសចរជាតិចំនួន ១០,៩ លាននាក់នៅឆ្នាំ ២០២៣ និងភ្ញៀវទេសចរអន្តរជាតិ ៧,៥ លាននាក់នៅឆ្នាំ ២០២៥។ តាមរយៈនេះរដ្ឋាភិបាលក៏មានចក្ខុវិស័យបង្កើតការងារឱ្យបាន ៩៤ ម៉ឺននាក់ និងប្រាក់ចំណូលចូលក្នុងចរន្តសេដ្ឋកិច្ចខេត្តសៀមរាបប្រមាណ ៦ ពាន់លានដុល្លារ។
ផែនការមេនេះក៏នឹងជួយធ្វើឱ្យខេត្តសៀមរាបនិងតំបន់នៅជុំវិញក្លាយជាគោលដៅទេសចរណ៍ប្រកបដោយគុណភាពឆ្ពោះទៅឆ្នាំ ២០៣៥ តាមរយៈការអនុវត្តនូវយុទ្ធសាស្ត្រមួយចំនួនដូចជាការអភិវឌ្ឍតំបន់ទេសចរណ៍អាទិភាពក្នុងខេត្ត, ការអភិវឌ្ឍផលិតផលទេសចរណ៍ថ្មីៗ, ការផ្សព្វផ្សាយនិងទាក់ទាញភ្ញៀវទេសចរ, ការពង្រឹងគុណភាពនិងនិរន្តរភាព, ការគ្រប់គ្រងបរិស្ថាន, ការអភិវឌ្ឍហេដ្ឋារចនាសម្ព័ន្ធនិងពង្រីកការតភ្ជាប់គាំទ្រវិស័យទេសចរណ៍, និងការពង្រឹងអភិបាលកិច្ចសម្រាប់ទ្រទ្រង់ការអភិវឌ្ឍវិស័យទេសចរណ៍ខេត្តនេះ។
លោកថោងខុនកាលពីអំឡុងខែតុលាឆ្នាំ ២០២១ បាននិយាយថា៖ «ផែនការមេអភិវឌ្ឍន៍ទេសចរណ៍ខេត្តសៀមរាបឆ្នាំ ២០២១-២០៣៥ នឹងប្រែក្លាយខេត្តសៀមរាបជាគោលដៅទេសចរណ៍អន្តរជាតិដ៏ទាក់ទាញប្រកបដោយគុណភាពផ្ដល់នូវធនធានទេសចរណ៍សម្បូរបែបមានការទទួលស្គាល់ជាលក្ខណៈសកលលើការអភិរក្សនិងកិច្ចគាំពារសម្បត្តិបេតិកភណ្ឌវប្បធម៌ និងបរិស្ថានធម្មជាតិ និងមានភ្ញៀវទេសចរមកកម្សាន្តបានម្ដងហើយម្ដងទៀតផ្សារភ្ជាប់ជាមួយការអភិវឌ្ឍសេដ្ឋកិច្ចមូលដ្ឋានចូលរួមដល់ការកាត់បន្ថយភាពក្រីក្រព្រមទាំងឆ្លើយតបនឹងបម្រែបម្រួលអាកាសធាតុ»៕
