The Phnom Penh Post Search

Search form




Logo of Phnom Penh Post newspaper Phnom Penh Post - ​អេស៊ីលីដា កំពុង​រួមចំណែក​យ៉ាងសកម្ម​ក្នុង​វិស័យ​មូល​ប​ត្រ​

​អេស៊ីលីដា កំពុង​រួមចំណែក​យ៉ាងសកម្ម​ក្នុង​វិស័យ​មូល​ប​ត្រ​

Content image - Phnom Penh Post
លោក ស៊ូ សុជាតិ (ពី​ឆ្វេង​ទី៣) និង​លោក អ៊ិន ចាន់នី (ពី​ឆ្វេងទី​៤)។ រូបថត សហ​ការី

​អេស៊ីលីដា កំពុង​រួមចំណែក​យ៉ាងសកម្ម​ក្នុង​វិស័យ​មូល​ប​ត្រ​

​ភ្នំពេញៈ អគ្គនាយក​នៃ​និយ័ត​ករ​មូល​​ប​ត្រ​កម្ពុជា ​(SERC) លោក ស៊ូ សុជាតិ បានឱ្យដឹងថា ធនាគារ​អេស៊ីលីដា និង​ក្រុមហ៊ុន​បុត្រ​សម្ព័ន្ធ​របស់ខ្លួន​កំពុង​ដើរ​​តួនាទី​យ៉ាងសំខាន់​ក្នុងការ​រួមចំណែក​អភិវឌ្ឍ​ទីផ្សារ​មូលធន​នៅ​កម្ពុជា​។​

​ថ្លែង​ក្នុង​វគ្គ​បណ្តុះបណ្តាល​វិនិយោគិន​ក្នុង​វិស័យ​មូល​ប​ត្រ ស្តីពី​ការជំរុញ​ការ​យល់ដឹង​ក្នុង​វិស័យ​មូល​ប​ត្រ ដល់​ថ្នាក់ដឹកនាំ និង​បុគ្គលិក​ធនាគារ អេស៊ីលីដា ភីអិលស៊ី កាលពី​ថ្ងៃទី ​១៦ ខែសីហា លោក ស៊ូ សុជាតិ បាន​ប្រាប់ថា ធនា​គារ​អេស៊ីលីដា និង​ក្រុមហ៊ុន​បុត្រ​សម្ព័ន្ធ​បាន​ចូលរួម​យ៉ាងសកម្ម​ក្នុងការ​អភិវឌ្ឍ​ទីផ្សារ​មូល​ប​ត្រ​កម្ពុជា​តាំងពី​ដំណាក់​​កាល​ដំបូង​នៃ​ការចាប់ផ្តើម​ដោយ​ក្នុងនោះ ធនាគារ​អេស៊ីលីដា ត្រូវបាន​ទទួលស្គាល់​ធ្វើជា​ភ្នាក់ងារ​ទូទាត់​សាច់ប្រាក់​ពាក់ព័ន្ធ​នឹង​មូល​ប​ត្រ​ភ្នាក់ងារ បញ្ជិកា​មូល​ប​ត្រ ភ្នាក់ងារ​ចុះបញ្ជី​ផ្ទេរ​មូល​ប​ត្រ និង​ភ្នាក់ងារ​ទូទាត់ និង​ពេលនេះ​ជា​ភ្នា​ក់​​ងារ​រក្សា​សុវត្ថិភាព​ក្នុង​វិស័យ​មូល​ប​ត្រ​។​

​លោក​ថ្លែងថា​៖ «​ធនាគារ​អេស៊ីលីដា ក៏បាន​បោះផ្សាយ​លក់​មូល​ប​ត្រ​កម្មសិទ្ធិ​ជា​សាធារណៈ​កាលពី​អំឡុង​ឆ្នាំ ​២០២០ ​ទោះបី​កម្ពុជា​កំពុងស្ថិត​នៅក្នុង​ដំណាក់​​កាល​នៃ​ការរីក​រាលដាល​ជំងឺ​កូ​វីដ​ ១៩ ក៏​ទីផ្សារ​មូល​ប​ត្រ​នៅតែ​បង្ហាញ​ពី​កំណើន និង​ការវិវឌ្ឍ​ជា​វិជ្ជមាន​»​។​

​លោក​បន្ថែមថា​៖ «​តាមរយៈ​ការបោះ​​ផ្សាយ​លក់​មូល​ប​ត្រ​កម្មសិទ្ធិ​ជា​សា​ធា​រណៈ​របស់​ធនាគារ​អេស៊ីលីដា បានធ្វើឱ្យ​ទីផ្សារ​របស់​យើង​មាន​កំណើន​គួរឱ្យកត់សម្គាល់ ទាំង​កំណើន​វិនិយោគិន ទំហំ តម្លៃ​ជួញដូរ និង​ទំហំ​មូល​ធនូ​ប​​នីយកម្ម​ទីផ្សារ​»​។​

​បើតាម​លោក សុជាតិ ចំពោះ​អេ​ស៊ី​​លីដា ស៊ី​ឃ្យូ​រី​ធី ភីអិលស៊ី ដែលជា​ក្រុម​​ហ៊ុន​បុត្រ​សម្ព័ន្ធ​របស់ អេស៊ីលីដា បានទទួល​អាជ្ញាប័ណ្ណ និង​ការ​ទទួលស្គាល់ថា ជា​ក្រុមហ៊ុន​ឈ្មួញ​ជើងសា​មូល​ប​ត្រ ក្រុមហ៊ុន​ចែកចាយ​លក់​មូល​ប​ត្រ និង​ជា​ភ្នាក់ងារ​តំណាង​ម្ចាស់​មូល​ប​ត្រ​បំណុល​។​

​លោក​បាន​បន្ថែមថា​៖ «​បើ​ពិនិត្យ​លើ​គំរូ​អាជីវកម្ម​ធនាគារ​អេស៊ីលីដា គឺ​បាន​បង្កើត​ខ្សែចង្វាក់​សេវាកម្ម​មួយ​ដែល​កំពុង​ចូលរួម​យ៉ាងសកម្ម​ក្នុង​វិស័យ​មូល​​ប​ត្រ​នៅ​កម្ពុជា ព្រមទាំង​បាន​បង្កើត​សមត្ថភាព​ប្រកួតប្រជែង​របស់​ធនាគារ និង​បង្កើន​ទំនុកចិត្ត​ខ្ពស់​ដល់​វិនិយោគិន​ក្នុង​ទីផ្សារ​មូល​ប​ត្រ​»​។​

​ប្រធាន​នាយក​ប្រតិបត្តិ​ធនាគារ​អេ​​ស៊ី​លីដា លោក អ៊ិ​ន ចាន់នី បាន​ប្រាប់ថា ធនាគារ​អេស៊ីលីដា កំពុង​បន្ត​រីកចម្រើន​ប្រកបដោយ​និរន្តរភាព ដោយសារ​មាន​ធនធានមនុស្ស​ដ៏​រឹងមាំ និង​មាន​ការទទួល​​ខុសត្រូវ​ខ្ពស់​ក្នុងការ​អនុវត្ត​ការងារ​របស់ខ្លួន​តាម​ការគ្រោងទុក ស្របតាម​ច្បាប់ បទ​ប្បញ្ញត្តិ គោលការណ៍ និង​ក្រម​សីល​​ធម៌​វិជ្ជាជីវៈ​ស្រប​នឹង​ការអភិវឌ្ឍ​បច្ចេក​​វិទ្យា និង​លក្ខខណ្ឌ​តម្រូវ​ការងារ​។​

​លោក​ថ្លែងថា​៖ «​ដូច​យើង​ដឹង​ហើយ​ថា ធនាគារ​អេស៊ីលីដា មានការ​រីកចម្រើន​គួរឱ្យកត់សម្គាល់ តាមរយៈ​របាយ​ការ​​ណ៍​ជា​សាធារណៈ ដែល​ទើបបាន​ចេញផ្សាយ​ថ្មីៗ​នេះ គឺ​ធនាគារ​យើង​សម្រេចបាន​លទ្ធផល​ល្អប្រសើរ​នៅក្នុង​ឆមាស​​ទី​១ ឆ្នាំនេះ​។ របាយការណ៍​របស់​ក្រុម​​ហ៊ុន​ចុះបញ្ជី​ត្រូវបាន​ចេញផ្សាយ​ជា​សា​​ធារ​ណៈ គឺ​ពិត​ជាមាន​សារៈសំខាន់ និង​ត្រូវបាន​ប្រើប្រាស់​ជា​ធាតុ​ផ្សំ​មូលដ្ឋាន​សម្រាប់​វិនិយោគិន​ក្នុងការ​សម្រេចចិត្ត​វិនិយោគ​លើ​មូល​ប​ត្រ​ណាមួយ​តាម​ការ​​យល់ឃើញ​ដ៏​រឹងមាំ​របស់​ពួកគេ​»​។​

​បើតាម​លោក ស៊ូ សុជាតិ គិត​មកទល់​បច្ចុប្បន្ន​មាន​ក្រុមហ៊ុន​ចំនួន ​៩ បាន​ចុះ​​បញ្ជី​លក់​មូល​ប​ត្រ​កម្មសិទ្ធិ ​(​ក្រុមហ៊ុន​ចុះបញ្ជី​ក្នុង​ផ្សា​រគោល​មាន​ចំនួន ៧ និង​ទីផ្សារ​កំណើន ២) និង​ក្រុមហ៊ុន​ចំនួន ៧ បាន​ចុះបញ្ជី​លក់​មូល​ប​ត្រ​បំណុល (​ក្នុងនោះ​មាន​មូល​ប​ត្រ​បំណុល​ចំនួន​ ៩ ​បាន​ចុះបញ្ជី​លក់​ដោយមាន​មូល​ប​ត្រ​បំណុល ៣ បាន​ដល់​ឥណប្រតិទាន​) នៅលើ​ផ្សា​រមូល​ប​ត្រ​កម្ពុជា​៕

អត្ថបទគួរចាប់អារម្មណ៍