សន្ទស្សន៍ទីផ្សារភាគហ៊ុនអាមេរិកទទួលបានសុទិដ្ឋិនិយមកាន់តែច្រើនពីវិនិយោគិនចាប់តាំងពីការចេញផ្សាយរបាយការណ៍អតិផរណាខែកក្កដា ហើយឥឡូវនេះ ត្រូវបានជំរុញបន្ថែមទៀតដោយកម្សោយសេដ្ឋកិច្ចរបស់ប្រទេសចិន។
ការមិនប្រែប្រួលនៃសន្ទស្សន៍ថ្លៃទំនិញ (CPI) ក្នុងខែកក្កដា បានជំរុញឱ្យអត្រាអតិផរណារយៈពេល ១២ ខែ ធ្លាក់មកត្រឹម ៨,៥% ថយចុះ ០,៦% ពីតួលេខមុន។ លទ្ធផលនៃការបង្កើនអត្រាការប្រាក់ដើម្បីទប់ទល់នឹងអតិផរណាក៏បានធ្វើឱ្យសន្ទស្សន៍ភាគហ៊ុនសំខាន់ៗរបស់សហរដ្ឋអាមេរិកកើនឡើងផងដែរ នៅថ្ងៃដែល CPI ត្រូវបានចេញផ្សាយ។ ជាក់ស្ដែង សន្ទស្សន៍ Dow Jones Industrial Average បានកើនឡើង ១,៦៣% សន្ទស្សន៍ S&P 500 បានកើនឡើង ២,១៣% ដែលជាការកើនឡើងខ្ពស់បំផុតតាំងពីខែឧសភា និងសន្ទស្សន៍ Nasdaq បានកើនឡើង ២,៨៩% ដែលជាការកើនឡើងខ្ពស់បំផុតតាំងពីចុងខែមេសា។ គិតត្រឹមថ្ងៃអង្គារ សន្ទស្សន៍ទាំង ៣ នៅតែបន្ដស្ថិតក្នុងទិសដៅកើនឡើង។
លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីងស៊ីឃ្យួរឹធី បានមានប្រសាសន៍ថា ទីផ្សារនៅតែរឹងមាំក្នុងទិសដៅកើនឡើងសម្រាប់សប្តាហ៍នេះ ជាមួយនឹងកម្លាំងនៃកត្តាព័ត៌មានទាក់ទងនឹងការធ្លាក់ចុះនៃសេដ្ឋកិច្ចរបស់ចិន។
គេហទំព័រ Reuters បានរាយការណ៍កាលពីថ្ងៃអង្គារថា៖ «តួលេខដ៏អាក្រក់កំពុងបង្ហាញថា សេដ្ឋកិច្ចរបស់ចិនកំពុងជម្នះនឹងផលប៉ះពាល់នៃការរឹតបន្តឹងដោយសារជំងឺកូវីដ ដែលជំរុញឱ្យអ្នកសេដ្ឋកិច្ចមួយចំនួនបន្ទាបការព្យាកររបស់ពួកគេ»។
សម្រាប់ការវិភាគជួញដូរក្នុងសប្តាហ៍នេះ ជាពិសេសសម្រាប់ S&P 500 អ្នកជួញដូរគួរទិញក្នុងតម្លៃ ៤ ២៤៧.៦០ ដុល្លារ ដោយកំណត់មុខងារទាញយកប្រាក់ចំណេញនៅតម្លៃ ៤ ៣០៦ ដុល្លារ និងមុខងារការពារហានិភ័យ ៤ ២០៤ ដុល្លារ៕