.jpg)
ផ្លែក្រូចពោធិ៍សាត់ ដាក់លក់តាមចិញ្ចើមផ្លូវក្នុងក្រុងភ្នំពេញ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្តែងក្តីកង្វល់ពាក់ព័ន្ធទៅនឹងការកើនឡើងនៃអតិផរណាដែលបណ្តាលមកពីការកើនឡើងតម្លៃប្រេងនៅលើទីផ្សារអន្តរជាតិ ដោយលោកតម្រូវឱ្យកម្ពុជាត្រូវធ្វើការពង្រឹងនូវគោលនយោបាយរូបិយវត្ថុតាមរយៈការជំរុញការទិញជាប្រាក់រៀល។
ការថ្លែងរបស់លោកនាយករដ្ឋមន្ត្រីធ្វើឡើងក្នុងអំឡុងពេលលោកអញ្ជើញជាអធិបតីភាព ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ ក្នុងរាជធានីភ្នំពេញ។
លោកថ្លែងថា បញ្ហាសង្គ្រាមនៅអ៊ុយក្រែនបានជំរុញឱ្យមានការកើនឡើងនូវតម្លៃប្រេងឆៅសកល និងរុញច្រានឱ្យមានការកើនឡើងនូវតម្លៃម្ហូបអាហារ ហើយកម្ពុជាក៏រងផលប៉ះពាល់នៃការកើនឡើងតម្លៃប្រេងលក់រាយក្នុងស្រុកផងដែរ។
លោកថ្លែងថា៖ «យើងត្រូវតែរក្សាឱ្យបាននូវស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច។ ទប់ស្កាត់អតិផរណា រក្សាឱ្យបាននូវកម្លាំងទិញជាប្រាក់រៀល។ ខ្ញុំកង្វល់ធំណាស់ទៅលើបញ្ហាការឡើងថ្លៃប្រេង ខ្ញុំមិនសូវកង្វល់ច្រើនពេកទេទៅលើបញ្ហាឡើងថ្លៃស្បៀងនោះ ប៉ុន្តែការឡើងថ្លៃប្រេង គឺជារឿងដ៏លំបាក។ ប៉ុន្តែប៉ុន្មានថ្ងៃនេះវាជាកុសលមួយល្អសម្រាប់ការធ្លាក់ចុះនៃតម្លៃប្រេង»។
ជាមួយគ្នានេះលោកក៏បានស្នើដល់បណ្តាក្រុមហ៊ុនចែកចាយប្រេងនៅក្នុងស្រុកមិនគួរធ្វើការដំឡើងថ្លៃលក់រាយប្រេងឆាប់តាមតម្លៃប្រេងអន្តរជាតិភ្លាមៗឡើយ ខណៈក្រុមហ៊ុនមិនទាន់នាំចូលភ្លាមៗនោះ។
លោកលើកឡើងថា៖ «យើងជាប្រទេសតូចតាចមួយក៏រងឥទ្ធិពលពីវិបត្តិសេដ្ឋកិច្ចសកលដែរ ព្រោះសេដ្ឋកិច្ចរបស់យើងក៏ផ្សារភ្ជាប់ជាមួយទីផ្សារពិភពលោកដែរ។ អ៊ីចឹងយើងក៏ត្រូវរកវិធីទប់ស្កាត់ដោះស្រាយបញ្ហានេះតាមរយៈការខិតខំបង្កបង្កើនផលរបស់យើង»។
លោកបន្តទៀតថា សម្រាប់តំបន់អាស៊ានមិនចោទជាបញ្ហាធំពេកទេទាក់ទងបញ្ហាស្បៀងអាហារ ព្រោះប្រទេសអាស៊ីផលិតស្រូវបានច្រើនណាស់ជាពិសេសនៅក្នុងចំណោមប្រទេសអាស៊ាន ថៃ វៀតណាម កម្ពុជា និងមីយ៉ាន់ម៉ា។
លោកបញ្ជាក់ថា៖ «គ្រាន់តែប្រទេសទាំង ៤ នេះ សល់មិនតិចជាង ១៥ លានតោននោះទេ ក្រៅពីនោះប្រទេសឥណ្ឌាក៏ជាប្រទេសផលិតស្រូវច្រើនជាងគេដែរនៅអាស៊ី ដូច្នេះបញ្ហាកង្វះស្បៀងមិនមែនជាបញ្ហាចោទទេ ប៉ុន្តែអ្វីដែលជាកង្វល់ដ៏ធំនោះ គឺទាក់ទិននឹងបញ្ហាប្រេងនេះឯង ដែលអាចទាញទៅរកអតិផរណាមួយដែលយើងត្រូវខិតខំរកវិធីទប់ស្កាត់អតិផរណា»។
បើតាមរបាយការណ៍របស់ក្រសួងកសិកម្ម ការប្រមូលផលនៅដើមរដូវមកទល់ពេលនេះ គឺប្រមូលផលបានជាង ៩០ ភាគរយ ហើយក្នុងចំណោមផ្ទៃដីដាំដុះ ២,៥ លានហិកតា។ ដើមរដូវឆ្នាំនេះកម្ពុជាទទួលផលស្រូវជាង ១ លានតោនរួចហើយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែសីហាថា ទាក់ទងនឹងការកើនឡើងតម្លៃប្រេងសកលមានសេដ្ឋវិទូជាច្រើនបានសម្តែងក្តីបារម្ភ ដោយសារភាពតានតឹងសង្គ្រាមអ៊ុយក្រែន ការបន្តរកឃើញនូវវីរុសថ្មីនៅប្រទេសចិន។
លោកថ្លែងថា៖ «ខ្ញុំប្រមើលមើលថា ការឡើងថ្លៃប្រេងនេះអាចបន្តរហូតដល់ត្រីមាសទី១ ក្នុងឆ្នាំ ២០២៣ ដោយសារខ្ញុំផ្អែកលើមូលដ្ឋានមួយនៃវិបត្តិប្រេងដែលគេពុំអាចរកទំនិញអ្វីមកជំនួសបាន ដូច្នេះពីពេលនេះតទៅ គឺពិភពលោកទាំងមូលនៅសល់ពេលជិត ១ ឆ្នាំទៀត ដើម្បីរកទំនិញជំនួស និងរកដំណោះស្រាយ។ វិបត្តិប្រេងនេះនឹងត្រូវបានដោះស្រាយ បើការរកឃើញប្រេងនៅស៊ីនជាំងនៅប្រទេសចិន និងបណ្តាប្រេងនៅប្រទេសផ្សេងៗទៀត»។
នៅក្នុងសន្និសីទសារព័ត៌មាន កាលពីថ្ងៃទី ២ ខែសីហា លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ថា អត្រាអតិផរណានៅកម្ពុជាស្ថិតក្នុងកម្រិតមួយដែលអាចគ្រប់គ្រងបានដោយអត្រាអតិផរណាមធ្យមប្រចាំឆ្នាំស្ថិតក្រោម ៥ ភាគរយ និងតួលេខថ្មី ៣ ភាគរយ៕
