.jpg)
អ្នកចូលរួមកិច្ចពិភាក្សាស្តីពីបញ្ហាប្រឈមរបស់សហគ្រិនស្ត្រីវ័យក្មេងនៅថ្ងៃទី ១៨ សីហា។ រូបថត សហការី
ភ្នំពេញៈ មន្ត្រីរដ្ឋាភិបាល សង្គមស៊ីវិលនិងយុវជនជាង ១០០ នាក់ បានជួបជជែកគ្នាពីបញ្ហាប្រឈមរបស់សហគ្រិនស្ត្រីវ័យក្មេង (YWEs) ដែលកំពុងប្រកបអាជីវកម្មខ្នាតតូច ដោយពួកគេរំពឹងថា បញ្ហារបស់ YWEs ដែលបានរកឃើញនឹងត្រូវបានលើកយកមកដោះស្រាយ និងដាក់បញ្ចូលក្នុងគោលនយោបាយជាតិសម្រាប់ជួយស្ត្រីកម្ពុជា។
ការជួបជជែកគ្នានេះ បានធ្វើឡើងពេញ ១ ថ្ងៃ នាថ្ងៃទី ១៨ សីហា ក្នុងសិក្ខាសាលាពិគ្រោះយោបល់កម្រិតគោលនបាយលើកទី២ ស្តីពីបរិយាកាសអំណោយផល សម្រាប់អាជីវកម្ម និងសុខុមាលភាពសង្គមរបស់សហគ្រិនស្ត្រីវ័យក្មេង (YWEs)។
លោក សុន ពេញ នាយកប្រតិបត្តិនៃអង្គការសម្ព័ន្ធភាពដៃគូដើម្បីអភិវឌ្ឍន៍តាមបែបប្រជាធិបតេយ្យ បានលើកឡើងថា សិក្ខាសាលានេះ គឺដើម្បីឱ្យអ្នកចូលរួមដែលមកពីស្ថាប័នរដ្ឋាភិបាល សង្គមស៊ីវិល ជាពិសេសសហគ្រិនស្ត្រីវ័យក្មេងខ្លួនឯងផ្ទាល់ បានលើកឡើង ពីបញ្ហាដែលបានជួបប្រទះរបស់សហគ្រិនស្ត្រីដើម្បីរួមគ្នាដោះស្រាយ។
ការជជែកគ្នានេះ ក៏ចង់ឱ្យរដ្ឋាភិបាលបានស្តាប់នូវបញ្ហាដែលសហគ្រិនស្ត្រីវ័យក្មេងបានជួបប្រទះ ដើម្បីដាក់បញ្ចូលក្នុងគោលនយោបាយជាតិសម្រាប់ជួយគាំទ្រដល់អាជីវកម្មខ្នាតតូចរបស់ស្ត្រីនិងធ្វើយ៉ាងណាឱ្យអាជីវកម្មរបស់ស្ត្រីអាចដំណើរការបានដោយរលូននិងមានការគាំទ្រពីភាគីពាក់ព័ន្ធ។
លោកបញ្ជាក់ថា៖ «សិក្ខាសាលាថ្ងៃនេះ យើងបានពាំនាំស្ថាប័នពាក់ព័ន្ធស្ទើរតែទាំងអស់ ដើម្បីមកជជែកគ្នា ហើយយើងរកចំណុចចេញទាំងអស់គ្នា ដោយធ្វើម៉េចដើម្បីបង្កបរិយាកាសអំណយផលសម្រាប់អាជីវកម្មរបស់អ្នកលក់តាមដងផ្លូវនេះ។ ខ្ញុំមិនជឿថា យើងមិនអាចរកដំណោះស្រាយរួមគ្នាដើម្បីធានាបាននូវបរិយាកាសអំណោយផលសម្រាប់អាជីវកម្ម និងសុខុមាភាពសង្គមសម្រាប់សហគ្រិនស្ត្រីវ័យក្មេងនោះទេ»។
ក្រៅពីនេះ លោក សុន ពេញ ក៏រំពឹងដែរថា រដ្ឋាភិបាលនឹងបង្កើតក្របខ័ណ្ឌ គោលនយោបាយ ច្បាប់បេឡាជាតិ របបសន្តិសុខសង្គម បរិយាកាសអំណោយផលសម្រាប់អាជីវកម្ម និងច្បាប់ពាក់ព័ន្ធ MSME ផ្សេងទៀតសម្រាប់ស្ត្រីដែលប្រកបអាជីវកម្មខ្នាតតូចនេះផងដែរ។
អ្នកស្រី អៀង ហ្កិចលី តំណាងសហគ្រិនស្ត្រីវ័យក្មេង បាននិយាយថា បញ្ហាដែលសហគ្រិនស្ត្រីវ័យក្មេងបានជួបប្រទះគឺការខ្វះការគាំទ្រផ្នែកហិរញ្ញវត្ថុ។ បន្ថែមពីនេះអ្នកស្រីថា បញ្ហានៃការចុះបញ្ជីរបស់សហគ្រិនស្ត្រីវ័យក្មេងក៏ជាបញ្ហាប្រឈមផងដែរ ព្រោះការសិក្សាមួយបានបង្ហាញថា ភាគច្រើនអាជីវកម្មខ្នាតតូចរបស់ស្ត្រី ឬអ្នកលក់តាមដងផ្លូវ មិនទាន់បានចុះបញ្ជី ហើយស្ត្រីខ្លួនឯងផ្ទាល់ ក៏បានលើកឡើងពីផលលំបាកនៃការចុះបញ្ជីដោយមានលក្ខណៈស្មុគស្មាញ។
អ្នកស្រីបានបន្តថា៖ «អាជីវករទាំងអស់ ឬភាគច្រើនដែលយើងបានសម្ភាសន៍ នៅក្នុងរាជធានីភ្នំពេញគឺចំណេះដឹងរបស់ពួកគាត់ នៅមានកម្រិតនៅឡើយ ទាក់ទងនឹងការចុះបញ្ជីអាជីវកម្មដូចជាព័ត៌មានទាក់ទងនឹងផែនការគ្រប់គ្រងអាជីវកម្មរបស់ពួកគាត់។ ពួកគាត់លក់ដូរទៅតាមយថាផល និងមិនបានទទួលជំនួយ ឬទទួលបានកម្ចីអ្វីពីធានាគារក្នុងអត្រាការប្រាក់ពិសេសណាមួយនោះទេ»។
យោងតាមការសិក្សារបស់អង្គការ ANSA ដែលបានសិក្សាលើសហគ្រិនវ័យក្មេងជិត ២០០ នាក់ (ស្ត្រីជាង ៧០ ភាគរយ) ក្នុងខណ្ឌចំនួន ៤ នៃរាជធានីភ្នំពេញ បានបង្ហាញថា ពួកគេចំនួន ៩២ ភាគរយធ្វើអាជីវកម្មខ្នាតតូចដោយមិនបានចុះបញ្ជីនោះទេ ចំណែក៨ ភាគរយគឺមិនបានដឹងពីការចុះបញ្ជីអាជីវកម្ម។ នេះបើតាមការលើកឡើងរបស់លោកស្រីអៀង ហ្កិចលី។
លោក ខោល យុទ្ធលី អនុប្រធានអង្គភាពវិភាគ និងអភិវឌ្ឍគោលនយោបាយ នៃលេខាធិការដ្ឋាន គណៈកម្មាធិការជាតិសម្រាប់ការអភិវឌ្ឍន៍ តាមបែបប្រជាធិបតេយ្យនៅថ្នាក់ក្រោមជាតិ (គជអប) បានទទួលស្គាល់នូវបញ្ហាដែលសហគ្រិនស្ត្រីវ័យក្មេងកំពុងជួបប្រទះ។ ជាមួយគ្នានេះ លោកអះអាងថា រដ្ឋាភិបាលបានធ្វើកិច្ចការងារជាច្រើន ដើម្បីចូលរួមជួយលើកកម្ពស់ និងគាំទ្រដល់ស្ត្រីក្នុងការប្រកបអាជីវកម្មខ្នាតតូច។
លោកសន្យាថា នឹងពាំនាំបញ្ហាដែលស្ត្រីបានជួបប្រទះ យកទៅជជែកក្នុងជួររដ្ឋាភិបាល ដើម្បីដាក់ចេញនូវគោលនយោបាយមួយ ជួយដល់ស្ត្រីទាំងនោះ។
លោកបានបញ្ជាក់ថា៖ «រដ្ឋាភិបាលបានរៀបចំនីតិវិធីនិងឯកសារជាច្រើន ដើម្បីជួយសហគ្រិនស្ត្រីវ័យក្មេង។ អ៊ីចឹងការរៀបចំកម្មវិធីនេះនឹងប្រមូលជាមតិយោបល់ ដើម្បីធ្វើការជាមួយរដ្ឋាភិបាល លើកិច្ចការងារពាក់ព័ន្ធបន្តទៀតដោយធ្វើយ៉ាងណាឱ្យសហគ្រិនស្ត្រីវ័យក្មេងបានដំណើរការទៅ ដោយរលូននិងបានលទ្ធផលដល់ប្រជាពលរដ្ឋ»៕
