ប្រាក់កម្ចី និងប្រាក់បញ្ញើរបស់ធនាគារ Advanced Bank of Asia Ltd (ABA) នៅតែកើនឡើងនៅក្នុងឆមាសទី ១ ឆ្នាំនេះឆ្លុះបញ្ចាំងពីប្រសិទ្ធភាពយុទ្ធសាស្ត្ររបស់ធនាគារនេះ និងជំហរដ៏រឹងមាំក្នុងវិស័យហិរញ្ញវត្ថុ បើទោះបីជាភាពមិនច្បាស់លាស់នៃសេដ្ឋកិច្ចបណ្តាលមកពីការរីករាលដាលជំងឺកូវីដ ១៩ រយៈពេលយូរ និងសង្គ្រាមអ៊ុយក្រែនក៏ដោយ។
លោក Yves Jacquot ជាប្រធានធនាគារមួយនេះបានថ្លែងក្នុងរបាយការណ៍ហិរញ្ញវត្ថុនៅក្នុងត្រីមាសទី ២ ថាក្នុងត្រីមាសនេះកម្ចីចំនួន ១១ ៥៣៤ គិតជាទឹកប្រាក់ ៥១៣,៣ លានដុល្លារអាមេរិកត្រូវបានបញ្ចេញ។ ចំនួននេះបានធ្វើឱ្យផលបត្រកម្ចីដុលរបស់ធនាគារកើនឡើង ៦ ភាគរយគិតជាទឹកប្រាក់សរុប ៦,១ ពាន់លានដុល្លារអាមេរិក។ ផលបត្រប្រាក់បញ្ញើរបស់ធនាគារ ABA ស្មើនឹង ៦,៩ ពាន់លានដុល្លារនៅត្រីមាសទី ២ ដែលចំនួននេះកើនឡើង ៩ ភាគរយគិតចាប់ពីដើមឆ្នាំ។
ដោយសារតែអតិថិជនកាន់តែច្រើនជ្រើសរើសយកធនាគារ ABA ធ្វើជាធនាគារដៃគូរបស់ខ្លួននោះមូលដ្ឋានអតិថិជនបានកើនឡើងដល់ ២១ ភាគរយក្នុងរយៈពេលទាំង ២ ត្រីមាសនៃឆ្នាំ ២០២២ ធ្វើឱ្យចំនួនគណនីរបស់អតិថិជន ABA បានកើនឡើង ២,៥ លាននាក់។
លោក Yves បានឱ្យដឹងថាប្រទេសកម្ពុជាបានបន្តធូរស្រាលពីស្ថានភាពកូវីដក្នុងអំឡុងពេលរាយការណ៍។ ទន្ទឹមនឹងនេះប្រទេសកម្ពុជាបានឆ្លងកាត់ពេលវេលាមួយដែលការវិលត្រឡប់នៃលំហូរវិនិយោគផ្ទាល់ពីបរទេសយឺតជាងការរំពឹងទុកនិងបានរងនូវសម្ពាធអតិផរណាដែលប៉ះពាល់ដល់អំណាចទិញរបស់ប្រជាពលរដ្ឋ។ វិស័យអចលនទ្រព្យនៅស្ថិតក្រោមសម្ពាធហើយវិស័យទេសចរណ៍ក៏មិនទាន់ងើបឡើងវិញដល់កម្រិតដើមដូចកាលពីពេលមុនមានការរាតត្បាតជំងឺកូវីដដែរ។ បន្ថែមលើនេះទៀតយើងបានចាប់ផ្ដើមមើលឃើញពីផលប៉ះពាល់នៃវិបត្តិរុស្ស៊ី-អ៊ុយក្រែនចំពោះសេដ្ឋកិច្ចពិភពលោក និងផលប៉ះពាល់ដែលអាចកើតឡើងលើប្រទេសនានាជុំវិញពិភពលោក។
លោកលើកឡើងថា៖ «ទោះបីជាស្ថានភាពសេដ្ឋកិច្ចទូទៅទាំងនេះមានភាពមិនច្បាស់លាស់ក្ដីធនាគារ ABA ជាមូលដ្ឋានគ្រឹះហិរញ្ញវត្ថុដ៏រឹងមាំរបស់ខ្លួននៅតែជាគ្រឹះស្ថានមួយដែលមានសុវត្ថិភាព និងស្ថិរភាពស្ថិតលើមាគ៌ាឆ្ពោះទៅរកភាពរីកចម្រើនរបស់ខ្លួន។ កំណើនជាបន្តបន្ទាប់នៃមូលដ្ឋានអតិថិជន និងលទ្ធផលប្រតិបត្តិការហិរញ្ញវត្ថុដ៏រឹងមាំឆ្លុះបញ្ចាំងពីប្រសិទ្ធភាពនៃយុទ្ធសាស្ដ្ររបស់ធនាគារ និងជំហរដ៏រឹងមាំរបស់ខ្លួនក្នុងវិស័យហិរញ្ញវត្ថុ»។
លោកថ្លែងថា៖ «លទ្ធផលទាំងនេះជាចម្បងអាចសម្រេចបានដោយសារអានុភាពនៃប្រព័ន្ធសេវាធនាគារឌីជីថលនិងផ្លែតហ្វមស្វ័យសេវាដ៏ទំនើបរបស់ធនាគារ។ ធនាគារបន្តអភិវឌ្ឍសេវាធនាគារតាមទូរស័ព្ទ ABA Mobile របស់ខ្លួនដោយនាំមកនូវសេវាកម្ម និងមុខងារថ្មីៗប្រកបដោយភាពងាយស្រួលមួយចំនួនទៀត»។
លោកបន្តថាក្នុងចំណោមនោះមានមុខងារកម្ចីប្រាក់បៀវត្សដើម្បីសម្រួលដល់អតិថិជនដែលត្រូវការប្រាក់បន្ទាន់ និងការអភិវឌ្ឍបន្ថែមនៃសេវា ABA KHQR ដើម្បីអនុញ្ញាតឱ្យអាជីវករប្រមូលប្រាក់ទូទាត់ពីអ្នកប្រើ ABA Mobile និងអតិថិជនធនាគារផ្សេងនៃគម្រោងបាគង។ បន្ថែមលើនេះទៀតធនាគារ ABA បន្តចូលរួមក្នុងគម្រោងសហហិរញ្ញប្បទានសហគ្រាសធុនតូចនិងមធ្យម (SCFS) ដែលជាគំនិតផ្តួចផ្ដើមរបស់រាជរដ្ឋាភិបាលកម្ពុជាក្នុងការផ្ដល់ជូនកម្ចីដែលមានតម្លៃសមរម្យដល់សហគ្រាសធុនតូចនិងមធ្យម។ ក្រោមគម្រោងនេះកម្ចីដែលបានបញ្ចេញពីធនាគារ ABA មានចំនួន ៩,៦ លានដុល្លារអាមេរិកគិតត្រឹមចុងខែមិថុនាឆ្នាំ ២០២២ ។ ធនាគារនេះបានផ្ដល់កម្ចីសម្រាប់ចំណាយមូលធន និងដើមទុនបង្វិលជាមួយអត្រាការប្រាក់ពិសេសមិនលើសពី ៧,៥០ ភាគរយក្នុងមួយឆ្នាំ និងរយៈពេលកម្ចីរហូតដល់ ៧ ឆ្នាំ៕