ភ្នំពេញៈ កម្ពុជានាំចេញ​ស្វាយ​ស្រស់​បាន​ជិត ១២ ​ម៉ឺន​តោន ​នៅក្នុង​រយៈពេល ៧ ​ខែ ឆ្នាំ ​២០២២ ថយចុះ​ជាង ២៦ ​ភាគ​រយ ​បើ​ធៀប​ទៅនឹង​រយៈពេល​ដូចគ្នា​ឆ្នាំ ​២០២១​។​

​បើ​យោងតាម​របាយការណ៍​ស្តីពី​ការ​​នាំចេញ​កសិផល​ទៅ​ក្រៅប្រទេស​របស់​អគ្គនាយក​ដ្ឋា​ន​កសិកម្ម នៃ​ក្រសួង​ក​សិ​​កម្ម រុក្ខាប្រមាញ់ និង​នេសាទ ចាប់ពី​ខែមករា ដល់​ខែកក្កដា ឆ្នាំ ​២០២២ ការនាំចេញ​ផ្លែស្វាយ​ស្រស់​មាន​ចំនួន ១១៧ ៩៥១,៥៥​ តោន ថយចុះ ២៦,៨៤​ ភាគ​​រយ​។ ក្នុងនោះ​នាំទៅ​ប្រទេស​វៀតណាម មាន​ចំនួន ៦២ ៦៤០,២៣ ​តោន ថៃ ២៧ ៦៨១,១២​ តោន​,​ ចិន ២៧៤៦៧,៨៨ ​តោន​, កូរ៉េ ១៦០,០៨ ​តោន និង​ទីក្រុង​ហុងកុង ២,២៤​ តោន​។​

​ដោយឡែក​តំណាប់​ស្វាយ​ត្រូវបាន​នាំចេញ​ចំនួន ​១៣ ២២៤,៤១​ តោន ថយ​​ចុះ ២,២២ ​ភាគរយ ដោយ​នាំ​ចេញទៅ​ប្រទេស​ចិន ១១ ៥៧៣,៣៧ ​តោន​, ថៃ ៨៣៦,០២ ​តោន​, ហ្វីលីពីន ៤៩៩,៩៦ ​តោន​, វៀតណាម ២០០​តោន​, ជប៉ុន ៤៨,៣៨ ​តោន​, រុស្ស៊ី ៤៥,៥៨ ​តោន​, ចក្រភព​អង់គ្លេស ៩,៧៨​ តោន​, អ៊ី​តា​លី ៦,៣០​ តោន​, កូរ៉េ ៤,៩៩​ តោន និង​អាមេរិក ០,០៣​ តោន​។​

​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក វេ​ង សាខុន បានឱ្យដឹងថា ការនាំចេញ​កសិផល​ស្រស់​មួយ​​ចំនួន​ជាពិសេស​ស្វាយ និង​ចេក មានការ​ថយចុះ ជាពិសេស​ការនាំ​ចេញទៅ​ប្រទេស​ចិន ដែល​ការណ៍​នេះ​បណ្តាលមកពី​កត្តា​មួយចំនួន​ដូចជា កង្វះ​ទូ​ត្រ​ជាក់​សម្រាប់​ផ្ទុក​កសិផល​បណ្តាលឱ្យ​ទូ​ត្រជាក់​ឡើងថ្លៃ​, ការ​រឹតបន្តឹង​ការត្រួត​ពិនិត្យ​ទំនិញ​ ដើម្បី​ទប់ស្កាត់​ការ​រាលដាល​ជំងឺ​កូ​វីដ ​១៩ នៅតាម​បណ្តា​ច្រកទ្វារ​​នាំចូល​ប្រទេស​ចិន​ ជាដើម​។​

​ក្រៅពី​មូលហេតុ​ទាំងនេះ​លោក​បន្ថែមថា​៖ «​ការ​រឹតបន្តឹង​លក្ខខណ្ឌ​អនាម័យ និង​ភូតគាម​អនាម័យ​ដែល​បណ្តាលមកពី​ការរកឃើញ​កូ​វីដ ​១៩ លើ​សម្បក​កេស​វេច​ខ្ចប់​ផ្លែ​ចេក​ពី​សំណាក់​អាជ្ញាធរ​គយ​ចិន ជាហេតុ​ធ្វើឱ្យ​ក្រុមហ៊ុន​មួយចំនួន​ត្រូវ​អាក់ខាន​ការនាំចេញ​មួយរយៈ​»​។​

​អគ្គនាយក​ក្រុមហ៊ុន​រី​ច​ហ្វា​ម អេ​ស៊ា លោក ហ៊ុន ឡាក់ បាន​និយាយថា បញ្ហា​ភូមិសាស្ត្រ​នយោបាយ​រវាង​កោះ​តៃវ៉ាន់ និង​ចិន​មិនមាន​ផលប៉ះពាល់​អ្វី​ដល់​ការ​​នាំចេញ​ផលិតផល​កសិកម្ម​កម្ពុ​ជា​ទៅកាន់​ប្រទេស​ចិន​ទេ ខណៈដែល​តម្លៃ​នៃ​ការដឹកជញ្ជូន​ហាក់​មាន​ភាពល្អប្រសើរ​ជាង​មុន​បន្តិច​នៅ​ឆមាស​ទី​២ ​នេះ​។​

​លោក​បន្ថែមថា គោលនយោបាយ​បិទ​ខ្ទប់​របស់​ចិន​ហាក់​មានការ​បន្ធូរបន្ថយ​ខ្លះ​ហើយ ប៉ុន្តែ​គេ​ត្រូវ​រង់ចាំ​ដល់​ខែវិច្ឆិកា ជា​ពេលដែល​រដ្ឋាភិបាល​ចិន​នឹងដាក់​​ចេញ​នូវ​គោលនយោបាយ​ថ្មី​ទាក់ទង​នឹង​ការបើក​ឡើងវិញ​នូវ​លំហូរ​សេដ្ឋកិច្ច ដែល​រំពឹងថា គោលនយោបាយ​ថ្មី​នោះ នឹងមាន​ភាពល្អប្រសើរ​ជាង​មុន​។​

​លោក​អះអាងថា​៖ «​ខ្ញុំ​គិតថា នៅ​ចុង​​ឆ្នាំនេះ​នឹង​ប្រសើរឡើង​ចំពោះ​ការនាំ​​ចេញ​ផលិត​កសិកម្ម ដែល​មិន​ត្រឹមតែ​នាំទៅ​ប្រទេស​ចិន ​នោះទេ ការនាំចេញ​ទៅតាម​បណ្តា​ប្រទេសជិតខាង​ក៏​នឹង​ល្អប្រសើរ​ដែរ​។ អ្វីដែល​សំខាន់​យើង​ត្រូវតែ​រៀបចំ​​ គឺ​ធ្វើយ៉ាងណា​ដើម្បី​ឱ្យមាន​ប្រព័ន្ធ​លាង​សម្អាត វេច​ខ្ចប់ ដើម្បី​ឆ្លើយ​ទៅនឹង​ស្តង់ដា​ដែល​គេ​ចង់បាន​»​។​

​របាយការណ៍​ក្រសួងកសិកម្ម​បង្ហាញថា ក្នុង​ឆ្នាំ ​២០២១ ការនាំចេញ​ស្វាយ​​ស្រស់ និង​ផលិតផល​ពី​ផ្លែស្វាយ​មាន​ចំនួន​សរុប ២៦៥ ២២៩,៧៦​ តោន​ ក្នុងនោះ​ស្វាយ​ស្រស់ ២៤២ ៤៨៣,៧៦ តោន កើនឡើង ១៤៨,៣៨​ភាគរយ​បើ​ធៀប​នឹង​ឆ្នាំ​ ២០២០៕