រថយន្តកុងតឺន័រឆ្លងកាត់ច្រកព្រំដែនកម្ពុជា-វៀតណាម នាពេលកន្លងទៅ។ រូបថត MPWT
ភ្នំពេញៈ កម្ពុជា-វៀតណាម គ្រោងនឹងដំឡើងកូតារថយន្តធ្វើពាណិជ្ជកម្មឆ្លងកាត់ព្រំដែនអន្តរជាតិរវាងប្រទេសទាំង ២ ពីចំនួន ៥០០ គ្រឿង ទៅ ៨០០ គ្រឿង នៅចុងឆ្នាំនេះ ដើម្បីឆ្លើយតបនឹងតម្រូវការនៃការកើនឡើងសកម្មភាពការដោះដូរទំនិញ។
ក្នុងដំណើរទស្សនកិច្ចសិក្សាស្វែងយល់ និងជួបពិភាក្សាការងារជាមួយស្ថាប័នរដ្ឋ និងឯកជននៅប្រទេសវៀតណាម កាលពីចុងសប្តាហ៍មុនគណៈប្រតិភូនៃប្រទេសទាំង ២ បានពិភាក្សាគ្នាលើសេចក្តីព្រាងអនុស្សរណៈនៃការយោគយល់ស្តីពីការដំឡើងកូតារថយន្តធ្វើពាណិជ្ជកម្មឆ្លងកាត់ព្រំដែនកម្ពុជា-វៀតណាម ព្រមទាំងបានកំណត់ពេលវេលា និងទីកន្លែងសម្រាប់រៀបចំកិច្ចប្រជុំទ្វេភាគី ដើម្បីពិនិត្យលទ្ធភាពនៅក្នុងការជំរុញការបញ្ចប់សេចក្តីព្រាងអនុស្សរណៈនៃការយោគយល់នេះ និងកិច្ចប្រជុំពាក់ព័ន្ធនិងបញ្ហាប្រឈមនានានៃការដឹកជញ្ជូនឆ្លងកាត់ព្រំដែន និងការភ្ជាប់ហេដ្ឋារចនាសម្ព័ន្ធដឹកជញ្ជូនរវាងប្រទេសកម្ពុជា-វៀតណាម រួមមាន ហេដ្ឋារចនាសម្ព័ន្ធផ្លូវថ្នល់ ផ្លូវដែក ផ្លូវទឹក និងភ័ស្តុភារកម្ម។
លោក ប៉ែន បូរាណ អនុរដ្ឋលេខាធិការក្រសួងសាធារណការ និងដឹកជញ្ជូន ដែលបានដឹកនាំប្រតិភូនៅក្នុងដំណើរទស្សនកិច្ចនេះ បានឱ្យ ភ្នំពេញ ប៉ុស្តិ៍ ដឹងថា ការកំណត់កូតារថយន្តធ្វើពាណិជ្ជកម្មឆ្លងកាត់ព្រំដែនអន្តរជាតិរវាងកម្ពុជា និងវៀតណាមកាលពីលើកមុន គឺនៅក្នុងឆ្នាំ ២០១២ ដោយភាគីទាំង ២ បានកំណត់កូតារថយន្តចំនួន ៥០០ គ្រឿង មានន័យថា ខាងវៀតណាម ៥០០ គ្រឿង និងកម្ពុជា ៥០០ គ្រឿង ដែលអាចឆ្លងកាត់ព្រំដែនគ្នាទៅវិញទៅមក ដើម្បីផ្លាស់ប្តូរទំនិញ។
លោកបន្ថែមថា នៅក្នុងរយៈពេល ១០ ឆ្នាំមកនេះដោយមើលឃើញថា កំណើននៃការធ្វើពាណិជ្ជកម្មឆ្លងកាត់ព្រំដែនកម្ពុជា-វៀតណាមកើនឡើងគួរឱ្យកត់សម្គាល់ បានធ្វើឱ្យភាគីទាំង ២ សម្រេចពិភាក្សាលើការកំណត់កូតាឡើងវិញដោយសម្រេចដំឡើងចំនួនកូតារថយន្តធ្វើពាណិជ្ជកម្ម (Exchange List) ដែលនឹងឈានទៅដល់ការចុះអនុស្សរណៈយោគយល់គ្នានៅចុងឆ្នាំនេះ។
លោកបានបញ្ជាក់ថា៖ «ក្រុមការងារនៃប្រទេសទាំង ២ នឹងពិភាក្សាគ្នាឱ្យបានលម្អិតជុំវិញការរៀបចំអនុស្សរណៈយោគយល់គ្នានេះនៅខែកញ្ញា ឬខែតុលាខាងមុខ។ សេដ្ឋកិច្ចយើងមានការកើនឡើង ហើយតម្រូវការរថយន្តដឹកទំនិញក៏កើនដែរ ទើបភាគីទាំង ២ សម្រេចដំឡើងកូតារថយន្តធ្វើពាណិជ្ជកម្មឆ្លងកាត់ព្រំដែនអន្តរជាតិនេះ»។
ប្រធានសមាគមភ័ស្តុភារកម្មកម្ពុជា លោក ស៊ិន ចន្ធី បានឱ្យដឹងថា ចំនួនកូតារថយន្តធ្វើពាណិជ្ជកម្មឆ្លងកាត់ព្រំដែនអន្តរជាតិរវាងប្រទេសទាំង ២ បានបង្កើនជាបន្តបន្ទាប់ដោយចាប់ផ្តើមពីលើកដំបូង ៤០ គ្រឿង។
លោកបានអះអាងថា៖ «ការដំឡើងកូតាបន្ថែមពី ៥០០ ទៅ ៨០០ គ្រឿងនេះ គឺជាគោលដៅរបស់កម្ពុជា ដើម្បីជំរុញការនាំចេញ ខណៈការនាំចេញតាមផ្លូវគោកមានការកើនឡើងគួរឱ្យកត់សម្គាល់។ វាផ្តល់ជម្រើសកាន់តែច្រើនដល់អ្នកប្រើប្រាស់ ក្នុងការជ្រើសរថយន្តពីក្រុមហ៊ុនដឹកជញ្ជូន ដែលនឹងលើកកម្ពស់ការប្រកួតប្រជែងថែមទៀតទៅដល់ក្រុមហ៊ុនដឹកជញ្ជូន ដើម្បីការផ្តល់សេវាដល់អតិថិជនកាន់តែប្រសើរ»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានគាំទ្រចំពោះការដំឡើងកូតារថយន្តធ្វើពាណិជ្ជកម្មឆ្លងកាត់ព្រំដែនអន្តរជាតិរវាងប្រទេសកម្ពុជា-វៀតណាម ដោយសារតែរថយន្តនៃប្រទេសចង្កូតឆ្វេងដូចគ្នា ដែលអាចបង្កលក្ខណៈងាយស្រួលដល់ការបើកបរ។
លោកប្រាប់ថា៖ «ការជំរុញការតភ្ជាប់ហេដ្ឋារចនាសម្ព័ន្ធដឹកជញ្ជូនរវាងកម្ពុជា-វៀតណាម ជាពិសេស ដំឡើងកូតារថយន្តធ្វើពាណិជ្ជកម្មឆ្លងកាត់ព្រំដែនអន្តរជាតិ ដែលស្ថាប័នរដ្ឋនៃប្រទេសទាំង ២ កំពុងគិតគូរ គឺរឿងដ៏ល្អសម្រាប់វិស័យដឹកជញ្ជូនដែលអាចចំណេញពេលវេលាធ្វើឱ្យការដឹកជញ្ជូនលឿនរហ័សជាងមុន»។
របាយការណ៍អគ្គនាយកដ្ឋានគយ និងរដ្ឋាករកម្ពុជាបង្ហាញថា ការធ្វើពាណិជ្ជកម្មទ្វេភាគីប្រទេសទាំង ២ រយៈពេល ៧ ខែ ឆ្នាំ ២០២២ មានទឹកប្រាក់ជាង ៣ ៧៦៥ លានដុល្លារ កើន ២២ ភាគរយ បើធៀបរយៈពេលដូចគ្នាឆ្នាំ២០២១។ ក្នុងនោះការនាំចេញទៅវៀតណាម មានទឹកប្រាក់ជាង ១ ៣២៦ លានដុល្លារ កើន ៣,៤ ភាគរយ និង កម្ពុជានាំចូលពីវៀតណាម មានជាង ២ ៤៣៩ លានដុល្លារ កើន ៣៥,៥ ភាគរយ បើធៀបរយៈពេលដូចគ្នាក្នុងឆ្នាំមុន៕
