ភ្នំពេញៈ កម្ពុជាបាន​ត្រៀមខ្លួន​រួច​ជា​ស្រេច​ក្នុងការ​ជួបចរចា​ជាមួយ​ភាគី​ថៃ​លើ​បញ្ហា​តំបន់​ប្រេង​ត្រួតស៊ីគ្នា​ដែលមាន​ផ្ទៃក្រឡា​ទំហំ​ជាង ២៦ ០០០​ គីឡូម៉ែត្រ​ការ៉េ ដើម្បី​រួមគ្នា​អភិវឌ្ឍ​តំបន់​សំដៅ​ទាញយក​ប្រយោជន៍​សម្រាប់​ប្រទេស​ទាំង ​២ ក្នុងការ​ដោះស្រាយ​វិបត្តិ​ថាមពល​នាពេល​អនាគត​។​

​លោក Khomgrich Tantravanich អគ្គលេខាធិការ​នៃ​គណៈកម្មាធិការ​និយតកម្ម​ថាមពល ​(ERC)​ របស់​ប្រទេស​ថៃ បាន​និយាយថា អ្នកបង្កើត​គោលនយោបាយ​នៃ​ប្រទេស​ទាំង ​២ (​កម្ពុជា​-​ថៃ​) គួរតែ​បញ្ចប់​ភាព​ស្ងៀម​​ស្ងាត់ និង​កំណត់​ទិសដៅ​ច្បាស់លាស់​សម្រាប់​ការអភិវឌ្ឍ​រួមគ្នា​នៅលើ​តំបន់​ប្រេង​ត្រួតស៊ីគ្នា​ (OCA)​។ នេះ​បើតាម​ការចុះផ្សាយ​របស់​បាងកក​ប៉ុស្តិ៍ កាល​​ពីថ្ងៃ​ទី ​២២ ខែសីហា​។​

​លោក Khomgrich បាន​បន្ថែមថា ប្រទេស​ថៃ​ ត្រូវការ​ធានា​នូវ​ការផ្គត់ផ្គង់​ឧស្ម័ន​បន្ថែមទៀត​​សម្រាប់​ការ​​ផលិត​អគ្គិសនី បន្ទាប់ពី​ការថយចុះ​នៃ​បរិមាណ​ឧស្ម័ន​នៅក្នុង​ឈូង​សមុទ្រ​ថៃ បាន​នាំឱ្យមាន​ការកើនឡើង​ការ​នាំចូល​ឧស្ម័ន​ធម្មជាតិ​រាវ (LNG) ដែលមាន​តម្លៃ​ថ្លៃ​។​

​លោក​បញ្ជាក់ថា​៖ «​យើង​ជឿថា OCA នឹង​ជួយ​ប្រទេស​ថៃ​ក្នុង​ការធានា​សុវត្ថិភាព​លើ​ការ​ផ្គត់​​ផ្គង់​ឧស្ម័ន និង​រក្សា​តម្លៃ​ថាមពល​ទាប​ក្នុង​រយៈពេល​វែង​»​។​

​ជុំវិញ​ការចរចា​លើ​តំបន់​ប្រេង​ត្រួតស៊ីគ្នា​នេះ នៅក្នុង​សន្និសីទ​សារព័ត៌មាន​ស្ដីអំពី​សមិទ្ធផល​សម្រេច​បាន​ក្នុង​រយៈពេល ៥ ​ឆ្នាំ​របស់​ក្រសួង​រ៉ែ និង​ថាមពល កាលពីដើម​ខែសីហា​កន្ល​ង​មក លោក ម៉េង សក្តិ​ធារ៉ា រដ្ឋលេខា​​ធិ​ការ​ក្រសួង​រ៉ែ និង​ថាមពល បាន​លើកឡើងថា ការចរចា​លើ​បញ្ហា OCA នេះ​មាន​ភាព​ស្មុគ​​ស្មាញ​ខ្លាំង ដោយសារ​តែមាន​ពាក់ព័ន្ធ​មិន​ត្រឹមតែ​បញ្ហា​ប្រេង​ប៉ុណ្ណោះ​ទេ ប៉ុន្តែ​មាន​ធនធានធម្មជាតិ​ផ្សេងៗ​ទៀត​នៅក្នុង​នោះដែរ ហើយ​បញ្ហា​នេះ មាន​ចរិត​ជា​នយោបាយ​ផង និង​ជា​សេដ្ឋកិច្ច​ផង​។​

​លោក​បន្ថែមថា កម្ពុជាបាន​ព្យាយាម​ជជែក​ជាមួយ​ថៃ​ដើម្បី​បំបែក​រឿងនេះ ជា​ ២ ដោយ​ទុក​រឿង​ព្រំដែន​ ១​ ផ្នែក ហើយ​នាំគ្នា​យក​ធនធានធម្មជាតិ​ទាំង​​អស់នេះ​មក​អភិវឌ្ឍ​រួមគ្នា​សិន ដោយ​យក​គំរូ​ទៅតាម​ប្រទេស​ផ្សេងៗ ដែលមាន​បញ្ហា​ទំនាស់​ព្រំដែន​សមុទ្រ​ដូចគ្នា​។​

​លោក​អះអាងថា​៖ «​ថៃ​មាន​បញ្ហា​ជាមួយនឹង​ម៉ាឡេស៊ី​ដូចគ្នា ហើយ​បាន​អនុវត្ត​ដោយ​ជោគ​​ជ័យ​។ យើង​ខិតខំ​រួមគ្នា​ដើម្បី​យក​ធនធានធម្មជាតិ​មក​អភិ​​វ​ឌ្ឍ​សេដ្ឋកិច្ច​ប្រទេស​ទាំង ​២ ​លើ​គោលការណ៍​សមធម៌ និង​គោរព​តាម​គោលការណ៍​អន្តរជាតិ​»​។​

​លោក​បន្ថែមទៀតថា ទោះបី​ប្រមុខ​ថ្នាក់ដឹកនាំ​ប្រទេស​ទាំង ​២ ​ចង់ឱ្យមាន​ការដោះស្រាយ​ឱ្យបាន​ឆាប់រហ័ស ប៉ុន្តែ​វឌ្ឍន​​ភាព​នៃ​ការចរចា​នេះ​នៅមាន​ភាពយឺតយ៉ាវ​។​

​ទាក់ទង​នឹង​បញ្ហា​នេះ លោក ជៀប សួរ អគ្គនាយក​នៃ​អគ្គ​នា​យក​ដ្ឋា​ន​ប្រេងកាត​នៃ​ក្រសួង​រ៉ែ និង​ថាមពលបាន​និយាយថា កម្ពុជា​បាន​ត្រៀមខ្លួន​រួចស្រេច​ហើយ​ក្នុង​ការចរចា​ជាមួយ​ភាគី​ថៃ សំដៅ​ធ្វើយ៉ាងណា​ទាញយក​អត្ថប្រយោជន៍​ឱ្យបាន​ច្រើន​ពី​កិច្ចចរចា​នេះ​៕

វីដេអូ៖