ភ្នំពេញៈ ក្រុមហ៊ុនជប៉ុនចំនួន៨ដែលជាសមាជិករបស់សភាពាណិជ្ជកម្មជប៉ុនប្រចាំនៅកម្ពុជា (JBAC) បានមកវិនិយោគនៅកម្ពុជាគិតត្រឹមពាក់កណ្តាលឆ្នាំ ២០២២ នេះ ខណៈដែលធនាគារអេស៊ីលីដាកំពុងជួយជំរុញផ្សព្វផ្សាយដល់វិនិយោគិនជប៉ុនមកវិនិយោគនៅកម្ពុជាបន្ថែមទៀត។
ក្នុងជំនួបពិភាក្សាជាមួយអ្នកជំនួញជោគជ័យរវាងធនាគារអេស៊ីលីដា និងសភាពាណិជ្ជកម្មជប៉ុនប្រចាំនៅកម្ពុជា (JBAC) និងក្រុមហ៊ុនជប៉ុនប្រមាណ ៥០ ក្រុមហ៊ុននៅប្រទេសកម្ពុជាកាលថ្ងៃទី ២៦ ខែសីហាឆ្នាំ ២០២២ លោក KANDA Yogo ប្រធានសភាពាណិជ្ជកម្មជប៉ុនប្រចាំនៅកម្ពុជាបានប្រាប់សារព័ត៌មានក្នុងស្រុកថាជាទូទៅសភាពាណិជ្ជកម្មជប៉ុនមានកិច្ចប្រជុំពេញអង្គមួយឆ្នាំ ២ ដងហើយនៅក្នុងខែកញ្ញាខាងមុខនេះនឹងមានកិច្ចប្រជុំម្តងទៀតដោយនឹងពិភាក្សាពីស្ថានភាពនៃការវិនិយោគរបស់ជប៉ុននៅកម្ពុជា និងប្រកាសពីក្រុមហ៊ុនថ្មីៗដែលគ្រោងនឹងមកវិនិយោគនៅកម្ពុជាបន្ថែមទៀត។
លោកបញ្ជាក់ថា៖ «សម្រាប់ឆ្នាំ ២០២២ នេះគិតត្រឹមឆមាសទី ១ មានក្រុមហ៊ុនចំនួន ៨ ដែលបានមកវិនិយោគនៅកម្ពុជាដោយឡែកសម្រាប់ឆ្នាំ ២០២៣ យើងនឹងរៀបចំកម្មវិធីជួបសំណេះសំណាលជាមួយធុរជនកម្ពុជាល្បីឈ្មោះដើម្បីស្វែងរកពីឱកាសធ្វើអាជីវកម្មក្នុងវិស័យសក្តានុពលនៅកម្ពុជា»។
លោកបន្តថាបច្ចុប្បន្ននេះសមាគមមានសមាជិកជាក្រុមហ៊ុនជប៉ុនដែលកំពុងវិនិយោគនៅកម្ពុជា និងបានចុះបញ្ជីសភាពាណិជ្ជកម្មជប៉ុនប្រចាំនៅកម្ពុជាមានជាង ២៥០ ក្រុមហ៊ុនដោយក្នុងនោះ ២៥ ភាគរយស្ថិតក្នុងវិស័យផលិតកម្ម និងកម្មន្តសាល ២៥ ភាគរយស្ថិតក្នុងវិស័យពាណិជ្ជកម្មនិងសេវាកម្ម និង ៥០ ភាគរយទៀតស្ថិតក្នុងវិស័យធនាគារនិងធានារ៉ាប់រង និងវិស័យផ្សេងៗទៀត។
ទោះជាយ៉ាងណាក៏ដោយលោក KANDA Yogo អះអាងថាចំនួនក្រុមហ៊ុនជប៉ុនវិនិយោគនៅកម្ពុជាអាចនឹងមានច្រើនជាងនេះ ដោយសារក្រុមហ៊ុនទាំងនោះមិនបានចុះបញ្ជីជាសមាជិករបស់សភាពាណិជ្ជកម្មជប៉ុនប្រចាំនៅកម្ពុជា។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាភីអិលស៊ីបានប្រាប់ឱ្យដឹងដែរថាលោកបានផ្ដល់ព័ត៌មានដល់វិនិយោគិនជប៉ុនជុំវិញភាពអំណោយផលនៃហេដ្ឋារចនាសម្ព័ន្ធផ្លូវថ្នល់ និងការសាងសង់អាយានដ្ឋានថ្មី ដើម្បីបម្រើដល់វិស័យដឹកជញ្ជូន និងសក្តានុពលក្នុងវិស័យសំខាន់ៗដើម្បីធ្វើយ៉ាងណាផ្ដល់ការទាក់ទាញដល់វិយោគិនជប៉ុនឱ្យមកវិនិយោគនៅកម្ពុជា។
លោកបានបន្ថែមថា ធុរកិច្ចជនជប៉ុនជាង ៥០ ក្រុមហ៊ុនបានមកស្វែងយល់ឱកាសវិនិយោគលើវិស័យមួយចំនួននៅកម្ពុជាតាមរយៈធនាគារអេស៊ីលីដា ដើម្បីបង្កើនចំនួនវិនិយោគរបស់ជប៉ុននៅកម្ពុជា ខណៈដែលអេស៊ីលីដាមានអតិថិជនដែលក្រុមហ៊ុនជប៉ុនប្រមាណជាង ៦០០ ក្រុមហ៊ុនដែលភាគច្រើនជាក្រុមហ៊ុនសាជីវកម្មធំៗដូចជាក្រុមហ៊ុន Minebea ក្រុមហ៊ុនផ្សារទំនើបអ៊ីអនម៉លជាដើម។
លោកបានបញ្ជាក់ថា៖ «គោលដៅរបស់យើងគឺធ្វើការចែករំលែកបទពិសោធរបស់យើងពាក់ព័ន្ធអាជីវកម្មរបស់ធនាគារ និងហិរញ្ញវត្ថុនិងទិន្នន័យខ្លះដែលទទួលបានពី CDC,ក្រសួងសេដ្ឋកិច្ច និងធនាគារពិភពលោក ដើម្បីប៉ាន់ប្រមាណពីការលូតលាស់សេដ្ឋកិច្ចកម្ពុជានាឆ្នាំបន្តបន្ទាប់រហូតដល់ឆ្នាំ ២០២២។ ក្នុងនោះយើងឃើញថាសេដ្ឋកិច្ចកម្ពុជានៅតែខ្លាំងពីឆ្នាំ ២០២២ នេះដល់ឆ្នាំ ២០២៧»។
ទោះយ៉ាងណាក៏ដោយវិនិយោគជប៉ុនក៏មានការព្រួយបារម្ភខ្លះដែរពីបញ្ហាអតិផរណានាពេលបច្ចុប្បន្នតែលោកបានបញ្ជាក់ថាតួលេខនៃអតិផរណានៅឆ្នាំនេះមានកម្រិតទាបជាងឆ្នាំ ២០០៨ នៅឡើយទេ ខណៈរាជរដ្ឋាភិបាលមានវិធានការគ្រប់គ្រាន់ក្នុងការគ្រប់គ្រងអតិផរណានេះបាន។
បើតាមទិន្នន័យពីធនាគារអេស៊ីលីដាដែលដកស្រង់ចេញពី CDC បានបង្ហាញថានាប៉ុន្មានឆ្នាំចុងក្រោយនេះលំហូរចូលនៃការវិនិយោគផ្ទាល់ពីក្រៅប្រទេស (FDI) មកកម្ពុជាមានការកើនឡើងយ៉ាងខ្លាំង ដោយសារតែស្ថិរភាពនយោបាយទីផ្សារវិនិយោគបើកចំហគោលនយោបាយម៉ាក្រូសេដ្ឋកិច្ចល្អកំណើនសេដ្ឋកិច្ចក្នុងតំបន់។ នៅក្នុងនោះវិស័យសំខាន់ៗដែលទាក់ទាញអ្នកវិនិយោគច្រើនជាងគេគឺវិស័យសំណង់អចលនទ្រព្យវិស័យកាត់ដេរវិស័យមិនមែនកាត់ដេរនិងវិស័យកសិកម្ម។ នៅក្នុងរយៈពេលជិត ៣០ ឆ្នាំប្រទេសកម្ពុជាបានចុះបញ្ជីការវិនិយោគសរុបមានតម្លៃប្រមាណ ៤១,០២ ពាន់លានដុល្លារ។ ដោយវិស័យហិរញ្ញវត្ថុរួមចំណែក ២២,៩ ភាគរយ, ផលិតកម្ម ២០,៨ ភាគយ,សំណង់និងអចលនទ្រព្យ ១៦,១ ភាគរយ,សណ្ឋាគារនិងភោជនីយដ្ឋាន ១០,៧ ភាគរយ,កសិកម្ម ១០,៣ ភាគរយ,អគ្គិសនី ៦,១ ភាគរយនិងវិស័យផ្សេងទៀត ១៣ ភាគរយ៕