ភ្នំពេញៈ ការនាំចេញ​ត្រី​ប្រា​ទៅកាន់​ប្រទេស​ចិន នឹង​យឺត​​យ៉ាវ​ជាង​ការរំពឹងទុក ដោយសារ​រោងចក្រ ខ្វះ​បុគ្គលិក​ជំនាញ​ក្នុង​ការកែច្នៃ​។​

​ក្រុមហ៊ុន ហ៊ុន ទី ដែល​ទទួលបាន​សិទ្ធិ​ក្នុងការ​កែច្នៃ​ត្រី​ប្រា​សម្រាប់ធ្វើ​ការនាំចេញ​កំពុងដំណើរការ​ខ្សែចង្វាក់​ផលិតកម្ម​កែច្នៃ​ត្រី​ប្រា​របស់ខ្លួន​ដើម្បី​នាំ​ចេញ​សាកល្បង​ជា​លើកដំបូង​ក្នុង​បរិមាណ​ ៤០ ​តោន នៅពេល​ខាងមុខនេះ នឹងត្រូវ​ពន្យារ​​ពេល​បន្ថែមទៀត រហូតដល់​ពាក់កណ្តាល​ខែកញ្ញា ដោយ​​សារ​តែ​រោងចក្រ​ពិបាក​រក​អ្នក​ជំនាញ​ក្នុង​ការកែច្នៃ និង​បុគ្គលិក​ដែលមាន​ស្រាប់​មិនទាន់​ស្ទាត់​​ជំនាញ​។​

​លោក ខូវ គួ​ង អនុប្រធាន​​រដ្ឋបាល​ជលផល បាន​ប្រាប់ ​ភ្នំពេញ ​ប៉ុស្តិ៍ ​កាលពី​ថ្ងៃទី ​២៩ ខែសីហា​ថា ខាង​រដ្ឋ​ជល​​ផលកំពុងតែ​ជំរុញ​ក្រុមហ៊ុន ក្នុងការ​ព​ន្លឿ​ន​លើ​ការងារ​នេះ ខណៈដែល​ខាង​ក្រុមហ៊ុន​ក៏​កំពុង​មមាញឹក​ក្នុងការ​កែច្នៃ លើ​បរិមាណ​ត្រី ដែល​បាន​ទិញ​ពី​កសិដ្ឋាន​ចិញ្ចឹម​ត្រី​ប្រា យន់ សុវណ្ណារិទ្ធ នៅ​ព្រែក​ព្នៅ​ដែរ ដើម្បី​ធ្វើយ៉ាងណា​នាំចេញ​ឱ្យ​ឆាប់​តាម​ដែល​អាចធ្វើ​ទៅបាន​។​

​លោក​បាន​បន្ថែមថា ដំបូង​ក្រុមហ៊ុន​មាន​គម្រោង​កែច្នៃ​ឱ្យបាន ​៥ ​តោន ​ក្នុង ​១ ​ថ្ងៃ ប៉ុន្តែ​ជាក់ស្តែង​បាន​ត្រឹម ​១ ​តោន​ ក្នុង ​១ ​ថ្ងៃ ដោយសារតែ​បុគ្គលិករបស់​រោងចក្រ​ភាគច្រើន​ជា​បុគ្គលិក​ថ្មី​។​

​លោក​បានបញ្ជាក់​បន្ថែម​ថា​៖ «​រោងចក្រ​នេះ ប្រើប្រាស់​កម្លាំង​ពលកម្ម​នៅក្នុង​ស្រុក​ច្រើន ខណៈដែល​អ្នកជំនាញការ​ជា​ជនជាតិចិន​។​ដូចនេះ​កម្មករ​នៅក្នុង​ស្រុក​យើង ដែលជា​អ្នកធ្វើ​ផ្ទាល់​មិន ទាន់​ស្ទាត់ជំនាញ និង​គ្មាន​បទពិសោធ​លើ​ការងារ​នេះ​នៅឡើយ ដែល​ត្រូវការ​ពេលវេលា​ ១ ​ខែ ​ឬ​ ២​ ខែ​ទៀត ដើម្បី​ថ្នឹក​នឹង​ការងារ​នេះ​»​។

​ទោះជា​យ៉ាងណា លោក​បាន​​អះអាងថា រដ្ឋបាល​ជលផល និង​ក្រុមហ៊ុន ហ៊ុន​ ទី បាន​ត្រៀមខ្លួន​រួចរាល់​ក្នុងការ​នាំចេញ​ត្រី​ប្រា​ទៅកាន់​ប្រទេស​ចិន ​នាពេល​ខាងមុខនេះ នៅពេល​ត្រី​កែច្នៃ​បាន​គ្រប់​ចំនួន​ ៤០​ តោន​។​

​លោក អ៊ុំ ចាន់​ចំណាន ប្រធាន​ផ្នែក​រដ្ឋបាល​នៃ​កសិដ្ឋាន​ចិញ្ចឹម​ត្រី​ប្រា យន់ សុវណ្ណារិទ្ធ មាន​ទីតាំងនៅ​ខណ្ឌ​ព្រែក​ព្នៅ រាជ​​ធានី​ភ្នំពេញ បានឱ្យដឹង​ដែរ​ថា ក្រុមហ៊ុន​បានចាប់ផ្តើម​បន្ត​ទិញ​ត្រី​ប្រា​ពី​កសិដ្ឋាន​វិញ​កាល ពីថ្ងៃ​ព្រហស្បតិ៍​មុន (​ថ្ងៃទី ​២៥ ខែសីហា​) បន្ទាប់ពី​ផ្អាក​មួយរយៈ ដើម្បី​រើស​បុគ្គលិក​ជំនាញ​។ លោក​បានឱ្យដឹងថា ក្រុមហ៊ុន ហ៊ុន ទី មាន​តម្រូវការ​ត្រី​ប្រា​ដែលមាន​ទម្ងន់​ចន្លោះ​ពី ​៩០០ ​ក្រាម ទៅ​ ១ ១០០ ​ក្រាម ​(៩ ​ខាំ​ទៅ​ ១,១​ គីឡូក្រាម​) ហើយ​ត្រី​ដែល​ដឹកចេញទៅ​រោងចក្រ​កែច្នៃ​ត្រូវតែ​នៅរស់​ទាំងអស់់​។

​កន្លងទៅ កម្ពុជា​មិនទាន់មាន​ការនាំចេញ​ផល​វារីវប្បកម្ម​នៅឡើយ ដោយ​ការនាំចេញ​ជា​ប្រភេទ​ត្រី​ធម្មជាតិ​។ ក្នុងនោះ​ការនាំចេញ​ផល​នេសាទ​ស្រស់ និង​កែច្នៃ​សម្រេចបាន​ចំនួន​ជិត ២ ពាន់​តោន ​ក្នុង​រយៈពេល ៧ ខែ​ឆ្នាំនេះ មានការ​ថយចុះ​ជាង ២០ ភាគរយ បើ​ធៀប​នឹង​រយៈពេល​ដូចគ្នា​ក្នុង​ឆ្នាំ ​២០២១​។ ទិន្នផល​វារីវប្បកម្ម​នៅ​កម្ពុជា ត្រូវបាន​រំពឹងថា នឹង​កើនឡើង ២០ ភាគរយ​ប្រចាំឆ្នាំ ចាប់ពី ១៨៥ ០០០ តោន ទៅ ២៤០ ០០០ តោន តាមរយៈ​ការដាក់ចេញ​ផែនការ​យុទ្ធសាស្ត្រ​ជលផល របស់​ក្រសួងកសិកម្ម​៕