សកម្មភាពលើកដាក់ទំនិញទូកុងតឺន័រក្នុងផែក្រុងព្រះសីហនុ។ ហេង ជីវ័ន
ភ្នំពេញៈ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានថ្លែងអះអាងថាទោះបីជាកម្ពុជាបានបាត់បង់ចំណូលពន្ធគយជាង ១៨៦ លានដុល្លារក្នុងឆមាសទី ១ ឆ្នាំ ២០២២ នេះពីការអនុវត្តកិច្ចព្រមព្រៀងពាណិជ្ជកម្មសេរីក៏ដោយ ប៉ុន្តែកម្ពុជាបានបើកទីផ្សារនាំចេញកាន់តែធំ ការកើនឡើងនៃខ្សែចង្វាក់ផលិតកម្ម និងបង្កើតការងារកាន់តែច្រើនជាងមុន។
របាយការណ៍សង្ខេបស្តីពី «សកម្មភាពការងារប្រចាំឆមាសទី ១ ឆ្នាំ ២០២២» របស់ក្រសួងសេដ្ឋកិច្ច និងហិរញ្ញវត្ថុ ដែលទើបផ្សព្វផ្សាយក្នុងសប្តាហ៍នេះ ឱ្យដឹងថា ក្នុងឆមាសទី ១ ឆ្នាំ ២០២២ ការបាត់បង់ចំណូលពន្ធគយដោយការអនុវត្តកិច្ចព្រមព្រៀងពាណិជ្ជកម្មសេរីមានចំនួនប្រមាណ ១៨៧ លានដុល្លារ កើនឡើងប្រមាណ ៧,៣៤ ភាគរយធៀបនឹងឆមាសទី ១ ឆ្នាំ ២០២១។
លោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ការអនុវត្តកិច្ចព្រមព្រៀងពាណិជ្ជកម្មសេរីរវាងកម្ពុជា និងប្រទេសដៃគូគឺពិតជាបានធ្វើឱ្យរដ្ឋាភិបាលបាត់បង់នូវចំណូលពន្ធគយ ប៉ុន្តែវាបានផ្តល់នូវឱកាសដល់កម្ពុជាក្នុងការពង្រីកទីផ្សារប្រកួតប្រជែង ការបង្កើតការងារ និងការទាក់ទាញវិនិយោគលើវិស័យផលិតកម្មច្រើនជាងមុន។
លោកបានថ្លែងថា៖ «ជាធម្មតានៅពេលដែលយើងអនុវត្តពាណិជ្ជកម្មសេរីទៅវិញទៅមក មានន័យថា យើងកាត់បន្ថយពន្ធខាងយើង ខាងគេក៏កាត់បន្ថយពន្ធ ដូច្នេះយើងបានចំណេញទីផ្សារ យើងអាចបង្កើនទីផ្សារប្រកួតប្រជែង ដោយសារតែយើងបើករបាំងនាំចូល ខាងគេក៏បើករបាំងនាំចូល ដូច្នេះការប្រកួតប្រជែងនេះមានទៅវិញទៅមក អ៊ីចឹងយើងបានចំណេញទីផ្សារ យើងបង្កើនការនាំចេញ ហើយចង្វាក់ផលិតកម្មនៅក្នុងស្រុកយើងក៏កើនទៅតាមនោះដែរ»។
លោកបានពន្យល់ថា នៅពេល ដែលសេដ្ឋកិច្ចកម្ពុជាកាន់តែរឹងប៉ឹង ពន្ធគយនឹងបាត់បន្តិចម្តងៗ ដូច្នេះរដ្ឋាភិបាលបង្កើនចំណូលមកវិញ ដោយការពង្រឹងនូវរដ្ឋបាលសារពើពន្ធនៅក្នុងស្រុកដើម្បីប្រមូលចំណូល។
លោកបានបញ្ជាក់ថា៖«ការបាត់ចំណូលនេះ ទោះបីវាហាក់ដូចជាធំពិតមែន ប៉ុន្តែយើងត្រូវមើលថា ការបង្កើនចង្វាក់ផលិតកម្មនៅក្នុងស្រុកវាជាការបង្កើតឱ្យមានការផ្តល់ឱកាសការងារដល់ប្រជាពលរដ្ឋយើងនៅក្នុងស្រុក ហើយពន្ធក្នុងស្រុកក៏នឹងកើនឡើងផងដែរ»។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ភ្នំពេញ-ប៉ុស្តិ៍នៅថ្ងៃទី ៣០ ខែសីហាថា ចំពោះការបាត់បង់ចំណូលពន្ធគយ ដោយសារតែកិច្ចព្រមព្រៀង ពាណិជ្ជកម្មសេរីនេះ ដោយសារតែមានផលិតផលជាច្រើនបាននាំចូលពីប្រទេសចិនដែលកម្ពុជាបានអនុវត្តកិច្ចព្រមព្រៀងពាណិជ្ជកម្មសេរីកម្ពុជា-ចិន។
លោកបានថ្លែងថា៖ «ការបាត់បង់ចំណូលពន្ធគយនេះនឹងជំនួសដោយចំណូលពន្ធដារ ដូច្នេះពាណិជ្ជកម្មកម្ពុជា-ចិនក៏ជំរុញឱ្យមានកំណើនផលិតកម្មនៅក្នុងស្រុក សម្រាប់ធ្វើការនាំចេញទៅប្រទេសចិនផងដែរ»។
លោកថា ទោះបីជាអតុល្យភាពនៃការនាំចូល និងការនាំចេញក៏ដោយ ក៏ការនាំចេញរបស់កម្ពុជាទៅកាន់ប្រទេសចិនមានកំណើនខ្ពស់ជាងមុន ដែលធ្វើឱ្យចំណូលបានមកពីផលិតកម្មនៅក្នុងស្រុក និងអាចបង្កើតការងារជូនប្រជាពលរដ្ឋ និងជំរុញផលិតផលក្នុងស្រុកប្រសើរជាងមុន។
លោកបានថ្លែងថា៖«ការបាត់បង់ចំណូលពីពន្ធគយជាង ១៨០ លានដុល្លារនោះ ខ្ញុំជឿថា វាគឺជាកត្តារួមចំណែកមួយនៃការកាត់បន្ថយចំណូលរបស់រដ្ឋាភិបាល ក៏ប៉ុន្តែការជំនួសមកវិញនៃចំណូលពន្ធដារនឹងការបង្កើតការងារជូនប្រជាពលរដ្ឋពិតជាមានសារៈសំខាន់ និងភាពប្រសើរជាជាងការនាំចូល»។
បើយោងតាមរបាយការណ៍ក្រសួងសេដ្ឋកិច្ច ការប្រមូលចំណូលពន្ធគយក្នុងផ្នែកមួយចំនួនមិនមានភាពវិជ្ជមានទេ ដោយសារតែកំណើននៃចង្វាក់ផ្គត់ផ្គង់ក្នុងស្រុកចាប់ផ្តើមបំពេញតួនាទីជំនួសឱ្យការនាំចូល។ កំណើននៃផលិតកម្មក្នុងស្រុកទាំងនោះមានដូចជា ស្រាបៀរ, ស៊ីម៉ងត៍, ភេសជ្ជៈ, បារី និងយានយន្ដដែលបានធ្វើឱ្យកម្ពុជាបាត់ចំណូលពន្ធនាំចូលប្រមាណ ៥២៦,៧៣ លានដុល្លារក្នុងឆមាសទី ១ ឆ្នាំ ២០២២ ធៀបរយៈពេលដូចគ្នាឆ្នាំ ២០២១។
ផលប៉ះពាល់ចំណូលទាំងនោះមានទឹកប្រាក់សរុបចំនួន ៥២៦,៧៣ លានដុល្លារ ដោយក្នុងនោះពីស្រាបៀរមានចំនួន ២៣៨ លានដុល្លារ,ស៊ីម៉ងត៍ ១០១,៨៥ លានដុល្លារ,ភេសជ្ជៈគ្មានជាតិសុរា ៨៤,៦២ លានដុល្លារ, បារី ១៧,៤២ លានដុល្លារ, ការដំឡើងរថយន្ដ ៧,៤៥ លានដុល្លារ, ការដំឡើងទោចក្រយានយន្ដ ៧៤,៤៧ លានដុល្លារ, និងការដំឡើងត្រីចក្រយានយន្ដ ៣,៣៦ លានដុល្លារ៕
