​ភ្នំពេញៈ ក្រុមហ៊ុន HN OUTSOURCES TRADING AND TECHNOLOGY CO., LTD. ជា​ក្រុមហ៊ុន​តែមួយគត់​ដែល​បាន​ចុះបញ្ជី និង​ត្រូវបាន​អនុ​ញ្ញាត​ឱ្យ​នាំគ្រាប់ពោត​ចេញទៅ​ប្រទេស​ចិន ​ជា​ផ្លូវការ បន្ទាប់ពី​កម្ពុជា​បានបញ្ចប់​នីតិវិធី​ទាំង​ស្រុង​សម្រាប់​ការនាំចេញ​។​

​យោងតាម​ការចេញផ្សាយ​របស់​គេហទំព័រ​ស្ថានទូត​ចិន​ប្រចាំ​កម្ពុជាបានឱ្យដឹងថា នៅ​ថ្ងៃទី ​២៧ ខែសីហា​ កន្លងទៅនេះ រដ្ឋបាល​គយ​ប្រទេស​ចិន បាន​ផ្សព្វផ្សាយ​បញ្ជី​ឈ្មោះ​ក្រុមហ៊ុន​ដែល​បាន​ចុះបញ្ជី​ក្នុង​ការនាំ​ចេញ​ដំណាំ​ពោត​នៅ​កម្ពុជា​ទៅកាន់​ប្រទេស​ចិន ដែលមានន័យ​ថា ដំណាំ​ពោត​នៅ​កម្ពុជា​បានបញ្ចប់​នីតិវិធី​ទាំងស្រុង​សម្រាប់​ការនាំចេញ និង​ត្រូវបាន​អនុញ្ញាតឱ្យ​នាំចេញ​ទៅកាន់​ប្រទេស​ចិន​។ នេះ​គឺជា​ផលិត​ផល​កសិកម្ម​ទី​២​ របស់​កម្ពុជា ដែល​ត្រូវបាន​អនុញ្ញាតឱ្យ​នាំ​ចេញទៅ​កាន់​ប្រទេស​ចិន​ ក្នុង​ឆ្នាំ​ ២០២២​ នេះ ដែលជា​កិច្ច​សហប្រតិបត្តិ​ការជាក់ស្តែង​រវាង​ចិន និង​កម្ពុជា​ ​ទំហំ​បាន​បង្កើន​សមិទ្ធ​ផល​ថ្មីៗ​បន្ថែមទៀត​។​

​លោក វេ​ង សាខុន រដ្ឋមន្ត្រីក្រសួង​កសិកម្ម រុក្ខាប្រមាញ់ និង​នេសាទ បាន​ប្រាប់​ ភ្នំពេញ ​ប៉ុស្តិ៍​ថា កន្លងមក HN OUTSOURCES TRADING AND TECHNOLOGY ជា​ក្រុមហ៊ុន​តែ​ ១​ គត់ បានមក​ចុះបញ្ជី​ជាមួយ​អគ្គនាយកដ្ឋាន​កសិកម្ម ដើម្បី​អាច​នាំចេញ​ផលិតផល​ពោត​ជា​ផ្លូវការ​ទៅកាន់​ប្រទេស​ចិន​។

​លោក​បាន​បន្ថែមថា តាមពិតទៅ​កម្ពុជា​បានបញ្ចប់​ការចរចា​តាំងពី​ឆ្នាំ ​២០១៤ មកម្ល៉េះ ចំពោះ​ការនាំចេញ​ពោត​ទៅកាន់​ប្រទេស​ចិន​នេះ ប៉ុន្តែ​មានការ​យឺតយ៉ាវ​ពី​ខាង​ក្រុមហ៊ុន​មក​ចុះបញ្ជី​តែប៉ុណ្ណោះ ពោលគឺ​មិនសូវមាន​ក្រុមហ៊ុន​ស្ម័គ្រចិត្ត​មក​ចុះបញ្ជី​។​

​ចំពោះ​ពេលវេលា​ដែល​កម្ពុជា​អាច​នាំចេញ​ពោត​ទៅកាន់​ប្រទេស​ចិន ​នៅពេលណា​នោះ ត្រូវបាន​លោក​រដ្ឋមន្ត្រី​បញ្ជាក់​យ៉ាង​ដូច្នេះ​ថា​៖ «​អ្វីដែល​សំខាន់​នោះ គឺ​ការសម្រេចចិត្ត​របស់​ក្រុមហ៊ុនថា ​តើ​ការនាំចេញ​បាន​ចំណេញ​ ឬ​អត់​តែ ប៉ុណ្ណោះ​។ ក្រុមហ៊ុន​ឯកជន​អាច​នៅមាន​រារែក នៅពេល​ការចំណាយ​លើ​ថ្លៃ​ដឹក​ជញ្ជូន​នៅ​ថ្លៃ និង​ការចំណាយ​ផ្សេងៗ​អស់​ច្រើន ដូចនេះ​អាស្រ័យទៅលើ​លទ្ធភាព​របស់​ក្រុមហ៊ុន​ដែរ​»​។​

​លោក​បាន​បន្តថា កន្លងទៅ ផលិតផល​​ពោត​របស់​កម្ពុជា មិនទាន់​បញ្ហា​ចោទ​នៅឡើយ​ទេ បើទោះបី​កម្ពុជា​មិនបាន​នាំចេញ​ពោត​ទៅកាន់​ប្រទេស​ចិន​ ក៏ដោយ ដោយសារ​កម្ពុ​ជាមាន​ទី​ផ្សារ​ស្រាប់ ចំពោះ​ផលិតផល​ពោត​នេះ​ដោយបាន​នាំចេញ​ពោត​ទៅកាន់​ប្រទេស​ចិន ​(​តៃ​-​វ៉ាន់​), កូរ៉េ​, ថៃ​, វៀតណាម និង​បង់​ក្លា​ដែ​ស​ផងដែរ នៅក្នុង​បរិមាណ​ជាង ២០​ ម៉ឺន​តោន និង​មួយចំនួន​សម្រាប់​បម្រើកា​រ​ផលិត​ចំណី​សត្វ​នៅក្នុង​ស្រុក ខណៈដែល​កម្ពុជា​អាច​ផលិត​ពោត​ចំនួន​ជាង​ ១​ លាន​ តោន ក្នុង​ ១​ ឆ្នាំ​។​

​លោក ឈឹង យ៉េ ម្ចាស់​សៃ​ឡូ​ទិញ​លក់​កសិផល ដែលមាន​ទីតាំង​ស្ថិតនៅ​ក្នុងភូមិ​ភ្នំ​ស្ពង់ ឃុំ​សាលា​ក្រៅ ស្រុក​សាលា​ក្រៅ ខេត្ត​ប៉ៃលិនបាន​និយាយថា ការអនុញ្ញាតឱ្យ​នាំគ្រាប់ពោត​ចេញទៅ​ប្រទេស​ចិន ​នេះ គឺជា​ការបើក​ច្រក​កាន់​តែ​ទូលាយ សម្រាប់​ផលិតផល​កសិកម្ម​កម្ពុជា ខណៈដែល​បច្ចុប្បន្ន ពោត​ដែល​សៃ​ឡូ​របស់លោក​បាន​ទិញ​ពី​កសិករ​ភាគច្រើន​លក់​ឱ្យ​ក្រុមហ៊ុន​ផលិត​ចំណី​​សត្វ​ស៊ី​ភី និង​មួយចំនួន​តូច​ទៀត​នាំចេញ​ទៅកាន់​ប្រទេស​ថៃ​។​

​លោក​បាន​បន្ថែមថា ក្រុមហ៊ុន​ផលិត​ចំណី​សត្វ​ក្នុងស្រុក ទិញ​តែ​ពោត​ដែល មានគុណ​ភាព និង​ស​ម្ងួ​ត​បានល្អ ខណៈ​ពោត​ដែល​នាំ​ចេញទៅ​ប្រទេស​ថៃ​ជា​ពោត​មានគុណ​ភាព​អន់​ជាង​នេះ​បន្តិច​។​

​លោក​បាន​បញ្ជាក់ថា​៖ «​ប៉ុន្មាន​ឆ្នាំ​ចុងក្រោយ​នេះ ទីផ្សារ និង​តម្លៃ​ពោត មិនមាន​បញ្ហា​អ្វី​ទេ គ្រាន់តែ​ថា តម្លៃ​ឆ្នាំនេះ​មិនសូវ​បាន​ថ្លៃ​ដូច​ឆ្នាំមុន ហើយ​ការចំណាយ​ថ្លៃដើម​លើ​ជី​ថ្នាំ​កសិកម្ម និង​ឥន្ធនៈ​អស់​ច្រើនជាង​មុន​។ ​មាន​ទីផ្សារ​កាន់តែច្រើន កាន់តែ​ល្អ យើង​មាន​ជម្រើស​ច្រើន និង​ផលិតផល​យើង​អាច​លក់បាន​ថ្លៃ​ជាង​មុន​ដែរ​»​។​

​តាម​របាយការណ៍​ពី​ក្រសួងកសិកម្ម​បានបង្ហាញ​ថា នៅក្នុង​រយៈពេល​ ៧ ​ខែ ឆ្នាំ ​២០២២ ​នេះ កម្ពុជា​បាន​នាំចេញ​គ្រាប់ពោត ទៅ​ក្រៅប្រទេស​បាន​ចំនួន​ជាង ​១៣ ​ម៉ឺន​តោន ថយចុះ​ ៨,៥​ ភាគរយ បើ​ធៀប​នឹង​ឆ្នាំ ​២០២១​។ ក្នុង នោះ​ចេញទៅ​វៀតណាម ជាង ៨,៥​ ម៉ឺន​តោន​, ថៃ ជាង ​៤,៧ ​ម៉ឺន​តោន​, កោះ​​តៃវ៉ាន់​ជាង ​៨៤៦ ​តោន និង​កូរ៉េខាងត្បូង​ជាង ​១២ ​តោន​៕