ភ្នំពេញៈ កម្ពុជា-ថៃ បានឯកភាពគ្នាលក្ខណៈទ្រង់ទ្រាយធំលើផែនការសកម្មភាព និងកិច្ចសហប្រតិបត្តិការជាង១០ចំណុច ដើម្បីសំដៅបង្កើនកិច្ចសហប្រតិបត្តិការលើវិស័យទេសចរណ៍រវាងប្រទេសទាំង ២ ឱ្យកាន់តែខ្លាំងបន្ថែមទៀត ពិសេសក្នុង និងក្រោយដំណាក់កាលការឆ្លងរាលដាលជំងឺកូវីដ១៩ ខណៈទេសចរថៃចូល មកកម្សាន្តនៅកម្ពុជាក្នុងឆមាសទី១ កន្លងមកមានចំនួនជាង ១៣ម៉ឺននាក់។
ទិន្នន័យផ្លូវការក្រសួងទេសចរណ៍ ឱ្យដឹងថា ក្នុងឆមាសទី១ ឆ្នាំ២០២២ ប្រទេសកម្ពុជា បានទទួលភ្ញៀវទេសចរអន្តរជាតិសរុប ៥០៦ ៧៦២នាក់ កើនឡើង ៣៩៤,១ភាគរយបើធៀបឆ្នាំ២០២១។ សម្រាប់ភ្ញៀវជនជាតិថៃ ចូលមកកម្ពុជា មានចំនួន ១៣៤ ៤៣២នាក់ កើនឡើង ១៥៧,១ភាគរយធៀបរយៈពេលដូចគ្នាឆ្នាំ២០២១ ដែលចំនួននេះ គឺស្មើនឹង ២៦,៥ភាគរយនៃចំនួនភ្ញៀវបរទេសទាំងអស់ចូលមកកម្ពុជា។
ចំណុចសំខាន់ៗនៃផែនការសកម្មភាព និងកិច្ចសហប្រតិបត្តិការជាង ១០ចំណុច ដែលកម្ពុជា-ថៃ ទើបបានឯកភាពគ្នានេះ ត្រូវបានធ្វើឡើងក្នុងកិច្ចប្រជុំក្រុមការងារទេសចរណ៍កម្ពុជា-ថៃ លើកទី៦ ស្តីពីកិច្ចសហប្រតិបត្តិការទេ្វភាគីទេសចរណ៍កម្ពុជា-ថៃ នៅខេត្តកោះកុង កាលពីថ្ងៃទី២ ខែកញ្ញា ឆ្នាំ២០២២ ដោយមានការចូលរួមពីលោក ថុក សុខុម អនុរដ្ឋលេខាធិការក្រសួងទេសចរណ៍ និងលោក Mongkon Wimonrat អគ្គលេខាធិការរងនៃក្រសួងទេសចរណ៍ និងកីឡាថៃ។
ចំណុចទាំងនោះរួមមាន ភាគីទាំង២នឹងជំរុញរៀបចំឱ្យបានឆាប់នូវកញ្ចប់ទស្សនកិច្ចទេសចរណ៍រួមនៃបណ្ដាខេត្តព្រំដែននៃប្រទេសទាំង២ (Cross-Border Joint Tourism Packages), ការជំរុញលើកទឹកចិត្តឱ្យមានជើងហោះហើរត្រង់នៅគ្រប់គោលដៅទេសចរណ៍រវាងប្រទេសទាំង២, ការបន្តជំរុញទេសចរណ៍បើកបរដោយខ្លួនឯង ទេសចរណ៍ម្ហូបអាហារ ទេសចរណ៍សុខភាព ទេសចរណ៍ពុទ្ធសាសនា ទេសចរណ៍តាមនាវាសមុទ្រ, ការរួមគ្នាធ្វើការជាមួយគ្នាឱ្យកាន់តែជិតស្និទ្ធ ដោយមានការចូលរួមពីវិស័យឯកជន (ការរៀបចំបង្កើត និងផ្តល់ជូននូវកញ្ចប់ផលិតផលទេសចរណ៍រួម ក្រោមក្របខ័ណ្ឌនៃការផ្សព្វផ្សាយ «ព្រះរាជាណាចក្រ២ គោលដៅ១», ការរៀបចំឱ្យមាននាវាកម្សាន្តតាមសមុទ្រ, និងការជំរុញឱ្យមានទស្សនកិច្ចអ្នកជំនាញទេសចរណ៍រវាងប្រទេសទាំង២។
បន្ថែមពីលើនេះ ភាគីទាំង ២ ក៏បានឯកភាពលើចំណុចសំខាន់ផ្សេងៗទៀតដូចជា ភាគីថៃគាំទ្រឱ្យមានការបណ្ដុះបណ្ដាលជំនាញទេសចរណ៍បន្ថែមដល់អ្នកបម្រើការងារនៅកម្ពុជា, ការសហការរៀបចំវេទិកាវិនិយោគក្នុងវិស័យទេសចរណ៍នៃប្រទេសទាំង២, ភាគីថៃគាំទ្រនូវគំនិតផ្ដួចផ្ដើមកម្ពុជាជំរុញឱ្យព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជា, ថៃនឹងចែករំលែកបទពិសោធលើការរៀបចំគណនីទេសចរណ៍រណប (Tourism Satellite Accounts) ដល់មន្ត្រីជំនាញទេសចរណ៍, និងភាគីថៃបានទទួលពិចារណាលើសំណើរបស់កម្ពុជាលើគំនិតផ្ដួចផ្ដើមបង្កើតឱ្យមានលេខាធិការដ្ឋានទេសចរណ៍អេកម៉ិក (ACMECS Tourism Secretariat) ដើម្បីជំរុញកិច្ចសហប្រតិបត្តិការទេសចរណ៍ក្នុងក្របខ័ណ្ឌអនុតំបន់នេះ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានប្រាប់ភ្នំពេញប៉ុស្តិ៍នៅថ្ងៃទី៤ ខែកញ្ញាថា ការឯកភាពគ្នារបស់ប្រទេសទាំង ២ នឹងរួមចំណែកយ៉ាងច្រើនក្នុងការជួយធ្វើឱ្យវិស័យទេសចរណ៍កម្ពុជាមានដំណើរការល្អឡើងវិញបន្ទាប់ពីស្ងប់ស្ងាត់ជាង ២ឆ្នាំដោយសារវិបត្តិការឆ្លងរាលដាលជំងឺកូវីដ១៩។ ចំណងកិច្ចសហប្រតិបត្តិការនេះនឹងមិនត្រឹមតែជួយសម្រាប់វិស័យទេសចរណ៍កម្ពុជាប៉ុណ្ណោះទេ ប៉ុន្តែក៏នឹងបង្កភាពងាយស្រួលដល់ប្រជាជនប្រទេសទាំង២ ក្នុងការផ្លាស់ប្តូរពាណិជ្ជកម្ម និងធ្វើដំណើរទៅពិនិត្យសុខភាពជាដើម។
លោកបានថ្លែងថា៖«ប្រទេសថៃ គឺជាច្រកទេសចរណ៍ដ៏សំខាន់មួយរបស់កម្ពុជា ព្រោះក្រៅពីភ្ញៀវជនជាតិថៃ ប្រទេសនេះក៏ដើរតួនាទីជួយតភ្ជាប់កម្ពុជាទៅកាន់គោលដៅទេសចរណ៍ច្រើនផងដែរ ដោយសារប្រទេសថៃមានជើងហោះហើរជាច្រើនទៅគោលដៅនានាលើពិភពលោក»។
បើតាមលោក ស៊ីណាន ក្រៅពីប្រទេសថៃ ប្រទេសវៀតណាមក៏ជាផ្នែកមួយដ៏សំខាន់ដែលកម្ពុជាត្រូវតែយកចិត្តទុកដាក់ឱ្យបានខ្លាំង ព្រោះប្រទេសជិតខាងរបស់កម្ពុជាទាំង ២ សុទ្ធតែទទួលបានភ្ញៀវទេសចរច្រើន និងមានព្រំដែនជាប់ជាមួយកម្ពុជា ទាំងផ្លូវគោក ទឹក និងអាកាស។
ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន នៃក្រសួងទេសចរណ៍កម្ពុជា លោក ទ្រីវ ឈីវ បាននិយាយថា ទោះបីស្ថិតក្រោមបរិបទនៃការរីករាលដាលជំងឺកូវីដ១៩ ក៏កម្ពុជា-ថៃ តែងតែធ្វើការចែករំលែកព័ត៌មាន និងបទពិសោធក្នុងការចូលរួមទប់ស្កាត់ការរីករាលដាលនៃជំងឺកូវីដ១៩ ក៏ដូចជាចែករំលែកបទពិសោធលើដំណោះស្រាយចំពោះផលប៉ះពាល់ពីវិបត្តិកូវីដ១៩ ដល់វិស័យទេសចរណ៍។
បើតាមលោក ទ្រី ឈីវ ភាគីទាំង២កម្ពុជា-ថៃ ក៏នឹងជួបពិភាក្សាបន្តទៀតនាឱកាសកិច្ចប្រជុំគណៈកម្មាធិការទេសចរណ៍អាស៊ាននៅខេត្តសៀមរាបក្នុងសប្ដាហ៍ខាងមុខ ក៏ដូចជាកិច្ចប្រជុំថ្នាក់ឧត្តមមន្ត្រី និងថ្នាក់រដ្ឋមន្ត្រីអេកម៉ិក ដែលគ្រោងធ្វើឡើងនាថ្ងៃទី១-៥ ខែវិច្ឆិកា ឆ្នាំ២០២២ នៅខេត្តសៀមរាប ផងដែរ៕
