ក្រុមហ៊ុនព្រូដិនសល ដែលជាក្រុមហ៊ុនធានារ៉ាប់រងឈានមុខគេនៅកម្ពុជា បានប្រកាសដាក់ឱ្យដំណើរការជាផ្លូវការ ម៉ាស៊ីនលក់ផលិតផលធានារ៉ាប់រងនៅថ្ងៃនេះ ដើម្បីធ្វើឱ្យការជាវផលិតផលធានារ៉ាប់រងកាន់តែមានភាពងាយស្រួលជូនដល់អតិថិជនរបស់ខ្លួន។ ម៉ាស៊ីនទាំងនេះនឹងត្រូវបានដាក់ឱ្យប្រើប្រាស់នៅជាង ៥០ កន្លែងទូទាំងប្រទេសកម្ពុជា នាឆ្នាំ ២០២២។ លើសពីនេះ ក្រុមហ៊ុននឹងបន្តដាក់ម៉ាស៊ីននេះឱ្យដំណើរការនៅតាមទីកន្លែងជាច្រើនទៀតទូទាំងប្រទេសនាពេលខាងមុខនេះ។
ការលុបចោលនូវឧបសគ្គក្នុងការជាវផលិតផលធានារ៉ាប់រង
អត្រានៃការប្រើប្រាស់ធានារ៉ាប់រងអាយុជីវិត គឺមានចំនួនតិចជាង ១% [ក្នុងឆ្នាំ ២០២១] នៅកម្ពុជា ឯការចំណាយលុយផ្ទាល់ខ្លួនទៅលើផ្នែកវេជ្ជសាស្ត្រវិញ មានចំនួនប្រមាណជាង ១,២ ពាន់លានដុល្លារអាមេរិក [ក្នុងឆ្នាំ ២០១៩]។ ជាមួយនឹងចក្ខុវិស័យក្នុង ការធ្វើឱ្យគ្រប់គ្នាទទួលបានជីវិតមួយដែលល្អប្រសើរបំផុត ក្រុមហ៊ុន ព្រូដិនសល បានពង្រីកពហុបណ្ដាញចែកចាយតាមប្រព័ន្ធឌីជីថលរបស់ខ្លួន ដើម្បីធ្វើឱ្យគ្រប់គ្នាអាចមានលទ្ធភាពទទួលបាន ការថែទាំសុខភាពដែលមានតម្លៃសមរម្យ និងអាចចូលរួមលើកកម្ពស់បរិយាប័ន្នផ្នែកហិរញ្ញវត្ថុផងដែរ។
«ក្នុងនាមជាក្រុមហ៊ុនធានារ៉ាប់រងឈានមុខគេលើផ្នែកផលិតផលធានារ៉ាប់រងឌីជីថលនៅកម្ពុជា ពួកយើងចង់ការពារអ្នកគ្រប់គ្នាពីការប្រឈមលើការគំរាមកំហែងផ្នែកសុខភាព និងសុខុមាលភាព ព្រមទាំងជួយគាំទ្រអ្នកគ្រប់គ្នាដើម្បីសម្រេចគោលដៅជីវិតរៀងៗខ្លួន។ ពួកយើងក៏បានបង្កើតផលិតផលតាមបែបឌីជីថលជាច្រើន ដែលអាចឱ្យអតិថិជនដែលជាវផលិតផលធានារ៉ាប់រងលើកដំបូងអាចទទួលបានការការពារដែលមានតម្លៃសមរម្យ ប្រកបដោយភាពងាយស្រួលតាមរយៈទូរស័ព្ទរបស់ពួកគេ។
លោក Sanjay Chakrabarty អគ្គនាយកប្រតិបត្តិនៃក្រុមហ៊ុនព្រូដិនសលកម្ពុជា បានមានប្រសាសន៍ថា៖ «ដោយសារមិនមែនប្រជាជនកម្ពុជាគ្រប់រូបសុទ្ធតែអាចមានលទ្ធភាពប្រើប្រាស់អ៊ិនធឺណិតដែលមានស្ថិរភាព និងល្បឿនខ្ពស់នោះទេ ដូច្នេះឥឡូវនេះពួកយើងជំរុញការគិតរបស់យើងបន្ថែមទៀត ដើម្បីនាំមកនូវដំណោះស្រាយក្នុងការការពារផ្តល់ជូនទៅដល់ក្នុងសហគមន៍មូលដ្ឋាន តាមរយៈម៉ាស៊ីនលក់ផលិតផលធានារ៉ាប់រងរបស់យើង»។
ការធ្វើឱ្យគ្រប់គ្នានៅទូទាំងប្រទេសអាចទទួលបានការធានារ៉ាប់រង
ជាមួយនឹងការតភ្ជាប់អ៊ិនធឺណិត និងការផ្គត់ផ្គង់ថាមពលដោយខ្លួនឯង ម៉ាស៊ីនលក់ផលិតផលធានារ៉ាប់រងអាចដាក់បម្រើអតិថិជននៅតាមគ្រប់ទីតាំងក្នុងប្រទេសកម្ពុជា។ ការបង្កើតថ្មីនេះអាចឱ្យអតិថិជនជាវផលិតផលធានារ៉ាប់រងប្រកបដោយភាពងាយស្រួលក្នុងតម្លៃចាប់ផ្ដើមតិចជាង ១០ ដុល្លារប៉ុណ្ណោះ ក្នុង ១ ឆ្នាំ ដែលសូម្បីតែអតិថិជនដែលនៅទីតាំង ឬសាខាធនាគារដែលមិនមានអ៊ិនធឺណិតក៏ដោយក៏អាចជាវបានដែរ។
ការរចនាដោយផ្តោតលើបទពិសោធអ្នកប្រើប្រាស់ជាចម្បងដែលត្រូវបានបង្កើតឡើងសម្រាប់ម៉ាស៊ីនលក់ផលិតផលធានារ៉ាប់រងនេះ គឺសម្រាប់អតិថិជនដែលតម្រូវឱ្យមានភាពងាយស្រួលជាងមុន ដូចជាការបង្ហាញទំហំអក្សរឱ្យបានធំងាយស្រួលអាន សម្រាប់អ្នកប្រើប្រាស់វ័យចំណាស់ជាដើម។
នៅចុងបញ្ចប់នៃដំណើរការនៃការទិញអតិថិជននឹងទទួលបានវិក្កយបត្រលើការទិញរបស់ពួកគេ ពីម៉ាស៊ីនបោះពុម្ពដែលតភ្ជាប់ទៅនឹងម៉ាស៊ីនលក់ផលិតផលធានារ៉ាប់រងជាស្រេច ដែលនេះជាជំហានដ៏សំខាន់មួយសម្រាប់អ្នកទិញជាលើកដំបូង។
នៅពេលដែលការស្នើរបណ្ណសន្យារ៉ាប់រងទទួលបានជោគជ័យ អតិថិជនអាចគ្រប់គ្រង និងដាក់សំណើរទាមទារសំណងភ្លាមៗ តាមរយៈកម្មវិធី Pulse ដែលជាកម្មវិធីទូរស័ព្ទដែលមានរួមបញ្ចូលការថែទាំសុខភាព និង ហិរញ្ញវត្ថុ។ អតិថិជនអាចធ្វើតាមព័ត៌មានដែលបានបង្ហាញលើអេក្រង់ម៉ាស៊ីនលក់ផលិតផលធានារ៉ាប់រង ដើម្បីទាញយកនិងចុះឈ្មោះប្រើប្រាស់កម្មវិធី Pulse។
លោក Sanjay បានបន្ថែមថា៖ «បន្ទាប់ពីការចាប់ផ្តើមបើកដំណើរការម៉ាស៊ីនលក់ផលិតផលធានារ៉ាប់រងទាំងនេះ នៅជាច្រើនកន្លែង យើងនឹងធ្វើការយ៉ាងជិតស្និទ្ធជាមួយអតិថិជនរបស់យើង ដើម្បីកែលម្អបទពិសោធន៍របស់អតិថិជនជាបន្តបន្ទាប់ មុនពេលដាក់ឱ្យដំណើរការនៅទូទាំងប្រទេស»។
ពិធីសម្ពោធជាផ្លូវការនៅថ្ងៃនេះ ម៉ាស៊ីនលក់ផលិតផលធានារ៉ាប់រងត្រូវបានដាក់ឱ្យដំណើរការនៅសាខាព្រូដិនសល ក្នុងរាជធានីភ្នំពេញ សៀមរាប បាត់ដំបង និងក្រចេះ។ ដើម្បីជ្រាបបន្ថែមអំពីពត៌មាន ម៉ាស៊ីនលក់ផលិតផលធានារ៉ាប់រង សូមចូលទៅកាន់សាខាព្រូដិនសលដែលនៅជិតលោកអ្នកបំផុត៕