ភ្នំពេញៈ មន្ត្រីការទូតជាន់ខ្ពស់របស់កម្ពុជាអះអាងថា ទោះបីឆ្នាំ ២០២២ នៅតែជាឆ្នាំដែលជួបបញ្ហាប្រឈម សម្រាប់ប្រទេសទាំងអស់ក្នុងតំបន់ និងពិភពលោកជុំវិញការអូសបន្លាយការរីករាលដាលជំងឺកូវីដ ១៩ ការកើនឡើងបញ្ហាភូមិសាស្ត្រនយោបាយ និងការកើនឡើងនៃតម្លៃប្រេង និងអាហារពិភពលោកក្តី ក៏គេសង្កេតឃើញថាមានសញ្ញាវិជ្ជមានមួយចំនួន ដោយសារមានការងើបឡើងវិញវិស័យមួយចំនួន។
ថ្លែងក្នុងសិក្ខាសាលាស្តីពីការទូតសេដ្ឋកិច្ច «ការវិនិយោគ ពាណិជ្ជកម្ម និងបរិស្ថានទេសចរណ៍នៅកម្ពុជា» សម្រាប់ដំណើរទស្សនកិច្ចសិក្សាលើកទី ២ របស់ប្រមុខស្ថាប័នការទូត និងក្រុមគ្រួសារ ដែលមានការចូលរួមពីឯកអគ្គរាជទូតមកពីប្រទេសចំនួន ១៩ តំណាងឱ្យប្រជាជនចំនួន ១,៥ ពាន់លាននាក់ទៅកាន់ខេត្តសៀមរាប និងបន្ទាយមានជ័យ នៅថ្ងៃទី ២ ខែកញ្ញា ឆ្នាំ ២០២២ លោក ញឹម ខេមរា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ (MFAIC ) បាននិយាយថា មានបញ្ហាសេសសល់ជាច្រើន សម្រាប់ឆ្នាំនេះ ដែលចាំបាច់ត្រូវមានកិច្ចសហប្រតិបត្តិការល្អពីប្រទេស ១ ទៅប្រទេស ១ ដើម្បីជម្នះបញ្ហាប្រឈមទាំងនេះ។
លោកថ្លែងថា៖ «ឆ្នាំ ២០២២ ជាឆ្នាំដ៏លំបាកមួយទៀត សម្រាប់យើង ដែលសម្គាល់ដោយភាពមិនប្រាកដប្រជា ការកើនឡើងនៃភូមិសាស្ត្រនយោបាយ ការកើនឡើងតម្លៃប្រេង ថាមពល និងកង្វះអាហារ ការរឹតបន្តឹងការធ្វើដំណើរដ៏យូរ ដោយសារជំងឺរាតត្បាតកូវីដ ១៩ និងការប្រែប្រួលថ្មីរបស់វា និងបញ្ហាជាច្រើនទៀត។ ទោះជាយ៉ាងណា យើងក៏បានឃើញសញ្ញាណនៃការសះស្បើយយ៉ាងឆាប់រហ័សនៅក្នុងតំបន់ជាច្រើននៃពិភពលោក ជាពិសេសនៅក្នុងតំបន់របស់យើង និងជាការពិតណាស់គឺក្នុងប្រទេសកម្ពុជា។ ខ្ញុំពិតជារីករាយដែលបន្ទាប់ពីរយៈពេលជាង ២ ឆ្នាំមកនេះ ដែលឥឡូវនេះយើងអាចរៀបចំព្រឹត្តិការណ៍នានាដោយផ្ទាល់បាន រួមទាំងព្រឹត្តិការណ៍នេះនៅក្នុងខេត្តសៀមរាប-អង្គរ»។
លោកបន្តថា កាលពីដើមខែមករា ឆ្នាំមុន ដោយប្រឈមមុខនឹងបញ្ហាប្រឈមខ្លាំង MFAIC បានដាក់ចេញនូវយុទ្ធសាស្ត្រការទូតសេដ្ឋកិច្ចឆ្នាំ ២០២១-២០២៣ ដើម្បីលើកកម្ពស់បន្ថែមទៀតនូវពាណិជ្ជកម្មអន្តរជាតិ ការវិនិយោគផ្ទាល់ពីបរទេស ទេសចរណ៍ និងវប្បធម៌ និងអត្តសញ្ញាណកម្ពុជា។
លោកបញ្ជាក់ថា៖ «ផែនការសកម្មភាពសំខាន់មួយដែលក្រុមសម្របសម្រួលការទូតសេដ្ឋកិច្ច (EDCG) ផ្តោតជាសំខាន់គឺការរៀបចំវេទិកាផ្គូផ្គងពាណិជ្ជកម្ម និងទស្សនកិច្ចសិក្សានៅកម្ពុជា ដោយសង្ឃឹមថានឹងអាចឱ្យអ្នកការទូត ពាណិជ្ជករ វិនិយោគិន និងអ្នកពាក់ព័ន្ធទទួលបានទស្សនវិស័យកាន់តែល្អប្រសើរឡើង។ ស្ថានការណ៍នៅកម្ពុជានឹងបង្ហាញពីឱកាសថ្មី សម្រាប់កិច្ចសហប្រតិបត្តិការដែលមានផលប្រយោជន៍ទៅវិញទៅមក»។
លោក Waldemar Dubaniowski ឯកអគ្គរដ្ឋទូតប៉ូឡូញប្រចាំប្រទេសថៃបានសាទរចំពោះវឌ្ឍនភាពនៃការអភិវឌ្ឍរបស់កម្ពុជា និងបានកោតសរសើរចំពោះការធ្វើដំណើរដែលបានដឹកនាំអ្នកចូលរួម តាមរយៈគុណសម្បត្តិ និងសមិទ្ធផលដ៏មានសក្តានុពលនៃខេត្តបន្ទាយមានជ័យ និងខេត្តសៀមរាបជាមួយគោលនយោបាយថ្មីៗរបស់រដ្ឋាភិបាលកម្ពុជា។
លោក អ៊ុក សោភ័ណ្ឌ ឯកអគ្គរាជទូតកម្ពុជាប្រចាំប្រទេសថៃបាននិយាយថា ជាមួយដំណើរទស្សនកិច្ចសិក្សានេះ ពិភពលោកនឹងស្គាល់កម្ពុជាកាន់តែច្រើនឡើង។
លោកថ្លែងថា៖ «ឯកអគ្គរដ្ឋទូតនៃប្រទេសនីមួយៗនឹងរាយការណ៍ពីការចងចាំដ៏ល្អដែលពួកគេមាន សម្រាប់ខេត្តទាំង ២ ដែលពួកគាត់បានមកទស្សនកិច្ចទៅរដ្ឋាភិបាល និងប្រជាជនរបស់ពួកគេ ព្រមទាំងចែករំលែកជាមួយអ្នកតាមដានរបស់ពួកគេនៅលើប្រព័ន្ធផ្សព្វផ្សាយនានា។ នៅពេលណាពួកគេបង្ហោះរូបភាពស្អាតៗពីប្រាសាទអង្គរ ការណ៍នេះនឹងជួយជំរុញទឹកចិត្តអ្នកគាំទ្ររបស់ពួកគេឱ្យមកទស្សនាប្រទេសកម្ពុជា ដើម្បីស្វែងយល់ពីការពិត»។
លោកបញ្ជាក់ថា៖ «ខ្ញុំក៏មានសុទិដ្ឋិនិយមថា យុទ្ធនាការផ្សព្វផ្សាយរួមគ្នារវាងកម្ពុជា និងថៃ «ព្រះរាជាណាចក្រ ២ គោលដៅតែ ១» នឹងជំរុញឱ្យមានភាពកាន់តែសកម្មនៃវិស័យទេសចរណ៍ និងការតភ្ជាប់រវាងប្រជាជនរបស់យើង និងពិភពលោកទាំងមូល។
បើតាមក្រសួងទេសចរណ៍រយៈពេល ៧ ខែនៃឆ្នាំ ២០២២ កម្ពុជាទទួលបានភ្ញៀវទេសចរអន្តរជាតិជាង ៧៤ ម៉ឺននាក់ កើន ៥៦០ ភាគរយបើធៀបនឹងរយៈពេលដូចគ្នាឆ្នាំ ២០២១។ ក្នុងនោះខេត្តសៀមរាបទទួលបានភ្ញៀវក្នុងស្រុកជាង ១,២ លាននាក់ កើន ៨៩០ ភាគរយ ដោយក្នុងនោះភ្ញៀវទេសចរក្នុងស្រុក ១,១ លាននាក់កើនឡើង ៧៩៩ ភាគរយ និងភ្ញៀវបរទេសក្នុងស្រុកជាង ៨ ម៉ឺននាក់ កើនឡើង ១ ៣៥២ ភាគរយ៕