.jpg)
កសិដ្ឋានចិញ្ចឹមជ្រូកមួយនៅក្នុងខេត្តកំពង់ឆ្នាំង។ ហេង ជីវ័ន
ស្របពេលដែលការចិញ្ចឹមជ្រូកក្នុងស្រុកមានការកើនឡើងធ្វើឱ្យការផ្គត់ផ្គង់លើទីផ្សារលើសតម្រូវការ និងតម្លៃមានការធ្លាក់ចុះ និងធ្វើឱ្យប៉ះពាល់ដល់ប្រាក់ចំណូលរបស់កសិករអ្នកចិញ្ចឹម ដោយបានចំណាយទៅលើការទិញចំណី និងការថែទាំនានា។
លោក សួង វាសនា កសិករចិញ្ចឹមជ្រូក នៅស្រុករលាប្អៀរ ខេត្តកំពង់ឆ្នាំង បានប្រាប់សារព័ត៌មាន CPA នៅថ្ងៃទី ៦ កញ្ញាថា បច្ចុប្បន្នលោកចិញ្ចឹមជ្រូកជិត ១០០ ក្បាល ប៉ុន្តែការចិញ្ចឹមជ្រូកនេះ កំពុងជួបបញ្ហាទីផ្សារជាខ្លាំង ដោយសារជ្រូកលក់បានថោក ក្នុង ១ គីឡូក្រាមនៅសល់ត្រឹម ៩ ០០០ រៀលប៉ុណ្ណោះ ខណៈកន្លងមកមានតម្លៃ ១២ ០០០ រៀល។
លោកថ្លែងដូច្នេះថា៖ «ទីផ្សារជ្រូកថោក ចិញ្ចឹមខាត អត់មានចំណេញអីផង ចិញ្ចឹមទល់ដើមបាត់ហើយ កសិករខ្លះលក់បាន ៩ ៥០០ រៀល កសិករខ្លះទៀតលក់បាន ៩០០០ រៀល ដោយសារចាល់ ជ្រូកលក់អត់ចេញផង។ មានអ្នកខ្លះរអ៊ូរកទីផ្សារមិនបានផង សម្រុកចិញ្ចឹមលក់ពេលភ្ជុំខ្លាំងពេក ដូច្នេះកកស្ទះជ្រូក»។
កសិកររូបនេះបញ្ជាក់ថា តម្លៃត្រឹម ៩ ០០០ រៀលក្នុង ១ គីឡូក្រាម មិនអាចឱ្យកសិករទទួលបានប្រាក់ចំណេញពីមុខរបរចិញ្ចឹមជ្រូកនេះទេ ព្រោះសព្វថ្ងៃវត្ថុធាតុដើម ឡើងថ្លៃទាំងអស់ ដូចជា អគ្គិសនី កម្លាំងពលកម្ម និងចំណីសត្វ ជាដើម។
លោកបន្ត៖ «នៅថ្នាំ នៅវ៉ាក់សាំង តម្លៃត្រឹមហ្នឹងកសិករបង្ខំចាប់លក់ហ្នឹង ទាំងគ្មានឈ្មួញចាប់លក់ផង។ រដូវនេះ កាលពីឆ្នាំមុន ដូចជាមិនធ្លាក់តម្លៃដល់ថ្នាក់ហ្នឹងទេ ឆ្នាំមុនធ្លាក់តិចតួចមែន យើងមានឈ្មួញមកចាប់ច្រើន តែជាឆ្នាំនេះ បែរជាលំបាកជាងឆ្នាំមុន។ មួលហេតុគ្មានអ្នកចាប់ ដោយសារតែជ្រូកសម្បូរគ្រប់ទីកន្លែង ដូច្នេះឈ្មួញតែងតែបន្ទាបតម្លៃឱ្យថោក»
បើតាមលោក សួង វាសនា ទោះបីជាជ្រូករស់មានតម្លៃថោកក៏ដោយ ប៉ុន្តែតម្លៃសាច់ជ្រូកនៅតាមផ្សារមិនធ្លាក់ថ្លៃទេ ដែលអាជីវករអាចរកប្រាក់ចំណេញបានពី ៧០ ទៅ ៨០ ដុល្លារក្នុង ១ ក្បាល។ ដូច្នេះអ្នកដែលនៅតែជួបបញ្ហាជាងគេ គឺកសិករ និងអ្នកបរិភោគ។
លោកថ្លែងដូច្នេះថា៖ «ចំណីថ្លៃ ជ្រូកលើជ្រុញថ្លៃ ហេតុអ្វីជ្រូករស់មិនថ្លៃ?។ កសិករភាគច្រើននៅខេត្តកំពង់ឆ្នាំងនេះ គាត់មានកង្វល់ច្រើនទាក់ទងនឹងការចិញ្ចឹម ប្រសិនជាក្រសួងពាក់ព័ន្ធនៅតែបណ្តែតបណ្តោយ តម្លៃជ្រូកនៅតែប៉ុណ្ណឹងទៀត កសិករនឹងបោះបង់ការចិញ្ចឹម»។
លោកបញ្ជាក់ថា តម្លៃសមរម្យដែលកសិករអាចទទួលយកបាន គឺតម្លៃ ៣ ដុល្លារក្នុង ១ គីឡូក្រាម ព្រោះពួកគាត់ត្រូវចិញ្ចឹមមើលថែឱ្យចំណីជ្រូករាល់ថ្ងៃ ទម្រាំបានចាប់លក់រយៈពេល ៤ ខែ ត្រូវការចិញ្ចឹមយ៉ាងយកចិត្តទុកដាក់ និងចំណាយថវិកាច្រើនណាស់។
កន្លងមកលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យអ្នកចិញ្ចឹមជ្រូកងាកមកប្រើប្រាស់ថាមពលពន្លឺព្រះអាទិត្យ និងថាមពលអគ្គិសនីដែលបំប្លែងពីលាមកជ្រូកមកប្រើប្រាស់ ដើម្បីកាត់បន្ថយថ្លៃដើមផលិត និងរក្សាបានភាពប្រកួតប្រជែងតម្លៃនៅលើទីផ្សារ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានលើកឡើងថា មូលហេតុដែលនាំឱ្យជ្រូករស់ធ្លាក់ថ្លៃបែបនេះ ដោយសារអំឡុងពេល៤ខែមុន កសិករបានសម្រុកទិញកូនជ្រូកពីរៀតណាមយកមកចិញ្ចឹមច្រើន ដែលធ្វើឱ្យលើសពីតម្រូវការ។
លោកថ្លែងដូច្នេះថា៖ «បញ្ហាធ្លាក់ថ្លៃនេះ គឺគ្មានអ្នកណាអាចជួយរួចទេ ព្រោះកសិករគិតតែនាំចូលកូនជ្រូកពីវៀតណាមដែលមានតម្លៃថោក យកមកចិញ្ចឹម។ ចិញ្ចឹមច្រើនលើសលប់ពីតម្រូវការទីផ្សារ ដល់ពេលជ្រូកធំ ដណ្តើមគ្នាចាប់លក់ៗ មិនចេញ ដល់ពេលអ៊ីចឹងទៅឈ្មួញទិញគេឱ្យតម្លៃថោក»។
លោកបន្តថា ចំណែកបញ្ហាទាក់ទងនឹងតម្លៃជ្រូកនៅលើជ្រុញនៅតែថ្លៃ មានតែក្រសួងពាណិជ្ជកម្មប៉ុណ្ណោះដែលអាចបកស្រាយបាន។លោកថា អាជីវករនៅតែបន្តលក់សាច់ជ្រូកតម្លៃ២៣០០០រៀល ទៅ ២៤ ០០០ រៀល ទោះបីជាសមាគមកំណត់ឱ្យលក់ត្រឹម ២ ម៉ឺនរៀលក្នុង ១ គីឡូក្រាមក៏ដោយ។
គិតត្រឹមខែមិថុនា ឆ្នាំ ២០២២ កម្ពុជាមានសមត្ថភាពផ្គត់ផ្គង់ត្រីសាច់ កើនឡើងដល់ ៩២ភាគរយ ខណៈការផ្គត់ផ្គង់សាច់ជ្រូកអាចដំណើរការបាន ១០០ ភាគរយបានជាង ៩ ខែហើយ។ នេះបើការបញ្ជាក់របស់លោក វេង សាខុន៕
