ភ្នំពេញៈ គម្រោងការលើកកម្ពស់ការអនុវត្តថាមពលនិរន្តរភាពក្នុងវិស័យវាយនភណ្ឌ (Switch Garment) ត្រូវបានប្រកាសភាពជាដៃគូជាមួយក្រសួង ២ របស់រដ្ឋាភិបាលកម្ពុជាក្នុងគោលបំណងដើម្បីបង្កើនការប្រកួតប្រជែងរបស់រោងចក្រកាត់ដេរកម្ពុជា និងកាត់បន្ថយផលប៉ះពាល់បរិស្ថានរបស់ឧស្សាហកម្មតាមរយៈការទទួលយកការអនុវត្តថាមពលប្រកបដោយនិរន្តរភាព និងសម្របសម្រួលការវិនិយោគលើបច្ចេកវិទ្យាថាមពលស្អាត។
កិច្ចព្រមព្រៀងភាពជាដៃគូនៃគម្រោងនេះត្រូវបានធ្វើឡើងបន្ទាប់ពីមានការចាប់ដៃសហការគ្នារវាងក្រសួងបរិស្ថាន ក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ និងវិទ្យាស្ថានអភិវឌ្ឍន៍បៃតងសកល (GGGI) ដែលត្រូវបានធ្វើឡើងកាលពីថ្ងៃទី ៦ ខែកញ្ញានេះ នៅខេត្តកែប។
កម្មវិធីនេះត្រូវបានអនុវត្តដោយ GGGI រួមជាមួយ Geres និងសមាគមរោងចក្រកាត់ដេរនៅកម្ពុជា (GMAC) ចាប់តាំងពីខែឧសភា ឆ្នាំ ២០២០ មកម្ល៉េះ។
លោកស្រី Shomi Kim តំណាងប្រចាំប្រទេសរបស់ GGGI Cambodia មានប្រសាសន៍ថា ភាពជាដៃគូនេះគឺជាបើកព្រឹត្តិការណ៍ដ៏សំខាន់មួយ នៃការចុះហត្ថលេខាលើកិច្ចព្រមព្រៀងគម្រោងជាមួយក្រសួងទាំង ២ ដែលបាននិងកំពុងដើរតួនាទីយ៉ាងសំខាន់ក្នុងការធ្វើឱ្យមានការរីកចម្រើនលើគម្រោង Switch Garment នៅក្នុងឧស្សាហកម្មចាប់តាំងពីការចាប់ផ្តើមគម្រោងក្នុងឆ្នាំ ២០២០ មកម្ល៉េះ។
លោកស្រី Shomi មានប្រសាសន៍ថា៖«ទោះបីជាមានការពន្យារពេលក៏ដោយ វាជារឿងសំខាន់ដែលយើងទាំងអស់គ្នានៅទីនេះរួមគ្នាជាមួយនឹងគោលបំណង និងគោលដៅដូចគ្នា ដើម្បីជំរុញនិរន្តរភាពក្នុងវិស័យកាត់ដេរ ដែលជាតួអង្គឧស្សាហកម្មដ៏សំខាន់នៅក្នុងប្រទេសកម្ពុជា”។
លោក លី តឹកហេង នាយកប្រតិបត្តិរបស់ GMAC មានប្រសាសន៍ថា នាពេលបច្ចុប្បន្ននេះ ម្ចាស់ម៉ាកយីហោអន្តរជាតិជាច្រើនផ្តោតសំខាន់លើបញ្ហានិរន្តរភាព ដោយជំរុញឱ្យរោងចក្រផលិតប្រើប្រាស់ថាមពលស្អាត។
លោកបានមានប្រសាសន៍ថា៖ «ម៉ាកអន្តរជាតិដែលទិញពីរោងចក្រកាត់ដេរនៅកម្ពុជា ផ្តោតយ៉ាងខ្លាំងទៅលើនិរន្តរភាព ដោយសារការយល់ដឹងអំពីបរិស្ថានរបស់អ្នកប្រើប្រាស់កើនឡើង ដូច្នេះដើម្បីរស់រានមានជីវិតពីការផ្លាស់ប្តូរ វិស័យនេះត្រូវតែតាមឱ្យទាន់និន្នាការដើម្បីរក្សាការប្រកួតប្រជែង»។
លោក ទិន ពន្លក រដ្ឋលេខាធិការក្រសួងបរិស្ថានបានមានប្រសាសន៍ថា តម្លៃអគ្គិសនីនៅកម្ពុជានៅមានតម្លៃខ្ពស់ជាងប្រទេសផ្សេងនៅក្នុងតំបន់ ដូចនេះ ទំនោរថ្មីនៃគិតគូរស៊ីជម្រៅសម្រាប់ការអនុវត្តប្រសិទ្ធភាពថាមពលនឹងជួយកាត់បន្ថយការចំណាយថ្លៃអគ្គិសនីនិងបង្កើនផលចំណេញ។
លោកបានថ្លែងថា៖ «ជាការពិតណាស់ វិស័យឧស្សាហកម្មកាត់ដេរសម្លៀកបំពាក់បាននិងកំពុងដើរតួនាទីយ៉ាងសំខាន់ក្នុងការទ្រទ្រង់សេដ្ឋកិច្ចកម្ពុជា ហើយប្រសិនបើគិតជាតួលេខ វិស័យនេះបានរួមចំណែកជាង ១៥% នៃផលិតផលក្នុងស្រុកសរុប (GDP) និងប្រមាណជា ៨០% នៃការនាំចេញសរុបប្រចាំឆ្នាំ។ ហេតុដូចនេះ ការផ្តួចផ្តើមសម្រាប់ការរីកចម្រើនផ្នែកសេដ្ឋកិច្ច និងការទប់ស្កាត់ផលប៉ះពាល់អវិជ្ជមានចំពោះបរិស្ថាន និងសង្គម គឺជាកាតព្វកិច្ចដែលយើងត្រូវតែចូលរួមពន្លឿនប្រកបដោយភាពទទួលខុសត្រូវនិងការត្រៀមខ្លួនទុកជាមុនជានិច្ច»។
បើយោងតាមលោក ពន្លក គោលដៅនៃការចូលរួមចំណែករបស់ជាតិ (Cambodia’s NDC) នៅកម្ពុជា គឺធ្វើយ៉ាងណាធានាថា ឧស្ម័នផ្ទះកញ្ចក់ ២១.៣% ឬស្មើនឹង ៣៨.១ MtCo2e ក្នុងវិស័យថាមពល និង ៩.១% ឬស្មើនឹង ៥.៩ MtCo2e ក្នុងវិស័យឧស្សាហកម្មនឹងត្រូវបានកាត់បន្ថយមកត្រឹមអប្បបរមា។ ក្នុងរយៈពេល ៤ ឆ្នាំ នៃគម្រោងទាំងមូល កម្ពុជាអាចបន្ថយការបញ្ចេញឧស្ម័នផ្ទះកញ្ចក់បាន ១៧៥ KtCO2e ស្របពេលដែលតម្លៃថាមពលត្រូវបានកាត់បន្ថយប្រមាណ ២០% សម្រាប់វិស័យកាត់ដេរនៅកម្ពុជា និងបន្តបង្កើនការងារបៃតង និងបង្កើនគុណភាពខ្យល់ក្នុងបរិយាកាសផងដែរ។
លោកបានគូសបញ្ជាក់៖ «ខ្ញុំជឿជាក់ថា កម្មវិធីកិច្ចព្រមព្រៀងគម្រោងនេះនឹងចូលរួមយ៉ាងសកម្មក្នុងការពិនិត្យលើវឌ្ឍនភាពគម្រោង រៀបចំផែនការសម្រាប់ជំហានបន្ទាប់សម្រាប់ការកែលម្អគោលនយោបាយបទប្បញត្តិ និងវិធានការពង្រឹងការអនុវត្ត ដើម្បីសម្រេចនូវការប្តេជ្ញាចិត្តរួមក្នុងរយៈពេល ២ ឆ្នាំបន្ទាប់របស់គម្រោង»៕