.jpg)
វិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី
តម្លៃហាងឆេងមាសបានបន្ដធ្លាក់ចុះជាបន្ដបន្ទាប់ចាប់តាំងពីខែសីហា ពីតម្លៃ ១ ៨០៨ ដល់ ១ ៦៨៨ ដុល្លារ (ក្នុង ១ អោនស៍) ដោយសារឥទ្ធិពលតម្លៃប្រាក់ដុល្លារ ដែលទទួលបានការគាំទ្រពីការដំឡើងអត្រាការប្រាក់របស់សហរដ្ឋអាមេរិក។ ងាកមកមើលសេដ្ឋកិច្ចអាមេរិកវិញ គឺនៅតែបន្ដបង្កើតការងារ ជាមួយការស្រុះស្រួលគ្នាជាមួយធនាគារកណ្តាល ក្នុងការប្រយុទ្ធប្រឆាំងនឹងអតិផរណា ដោយការដំឡើងអត្រាការប្រាក់លឿនជាងដៃគូរបស់ខ្លួន។
សន្ទស្សន៍ប្រាក់ដុល្លារបានកើនឡើងប្រហែល ១៥% សម្រាប់ឆ្នាំនេះ និងបានឈានដល់កម្រិតខ្ពស់រយៈពេល ២ ទសវត្សរ៍ក្នុងកម្រិត ១១០,៥៥ កាលពីថ្ងៃអង្គារ។ បច្ចុប្បន្ន អត្រាការប្រាក់ដុល្លារសហរដ្ឋអាមេរិក គឺ ២,៥%។ សម្រាប់ប្រធាន-ធនាគារកណ្តាលសហរដ្ឋអាមេរិក លោក Jerome Powell ធ្លាប់បានលើកឡើងនៅក្នុងសន្និសីទ Jackson Hole ថា ធនាគារកណ្ដាលសហរដ្ឋអាមេរិកនឹងបន្តគោលនយោបាយដំឡើងអាត្រាការប្រាក់បន្ថែមទៀតសម្រាប់រូបិយប័ណ្ណរបស់ខ្លួន។ កិច្ចប្រជុំក្នុងការសម្រេចដំឡើងអត្រាការប្រាក់បន្ទាប់ គឺនៅថ្ងៃទី ២១ ខែ កញ្ញា ឆ្នាំ ២០២២ ខាងមុខនេះ។
តាមការវិភាគរបស់លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរីធី លោកបានយល់ឃើញថា ធនាគារកណ្ដាលសហរដ្ឋអាមេរិកនឹងដំឡើងអត្រាការប្រាក់ពី ០,៥០ ទៅ ០,៧៥ បន្ថែមទៀត ហើយវានឹងធ្វើឱ្យតម្លៃមាសមានការប្រែប្រួលខ្លាំង និងអាចធ្លាក់ចុះបន្ថែមទៀតពីតម្លៃបច្ចុប្បន្ន ១ ៦៩៦ ទៅ ១ ៦៥៦ ដុល្លារ។ បើធៀបទៅនឹងសេដ្ឋកិច្ចសកល តម្លៃមាសនឹងមានការងើបឡើងវិញ បន្ទាប់ពីធនាគារកណ្ដាលសហរដ្ឋអាមេរិកដំឡើងអត្រាការប្រាក់រួច។ ដូច្នេះ វិនិយោគិនគួររង់ចាំយូរបន្ដិចទៀត ដើម្បីទិញមាសនៅតម្លៃនៅចន្លោះពី ១ ៦៦០ ទៅ ១ ៦៥៦ ដុល្លារ៕
