.jpg)
Onion T1 ឈប់រង់ចាំភ្ញៀវក្នុងរាជធានីភ្នំពេញ។ ហេង ជីវ័ន
ភ្នំពេញៈ រយៈពេលជិត ៩ ខែ នៃការចាប់ផ្តើមដាក់លក់ជាផ្លូវការនូវត្រីចក្រយានយន្តអគ្គិសនីដំឡើងក្នុងស្រុក Onion T1 ក្រុមហ៊ុន Onion Mobility Co., Ltd អាចបញ្ចេញលក់បានប្រមាណ ៥០០ គ្រឿងរួចមកហើយ ខណៈក្រុមហ៊ុនបានចាត់ទុកជាជោគជ័យមួយរបស់ក្រុមហ៊ុនក្នុងការជួយកាត់បន្ថយការចំណាយរបស់អ្នកប្រើប្រាស់ ព្រមទាំងចូលរួមកាត់បន្ថយការបំពុលបរិស្ថានទៀតផង។
Onion Mobility Co., Ltd គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន MVL ដែលមានមូលដ្ឋាននៅប្រទេសកូរ៉េខាងត្បូង ដោយក្រុមហ៊ុនបានបញ្ចេញទុនដំបូងប្រមាណ ២០ លានដុល្លារក្នុងឆ្នាំ ២០១៩ លើការសាងសង់រោងចក្រដំឡើងត្រីចក្រយានយន្តអគ្គិសនី មានទីតាំងនៅក្នុងស្រុកកៀនស្វាយ ខេត្តកណ្តាលដែលរោងចក្រនេះមានសមត្ថភាពដំឡើង Onion T1 បាន ១៥ គ្រឿងក្នុង ១ ថ្ងៃ ឬលើសពីនេះនៅក្នុងករណីមានតម្រូវការទីផ្សារកើនឡើង។
ប្រធានផ្នែករដ្ឋបាល និងធនធានមនុស្សក្រុមហ៊ុន Onion Mobility Co.,Ltd លោក ម៉េត សុផា បានប្រាប់ភ្នំពេញប៉ុស្តិ៍នៅថ្ងៃទី ៨ ខែកញ្ញា ថា បន្ទាប់ពីប្រកាសដាក់លក់កាលពីដើមឆ្នាំ ២០២២ មានអតិថិជនច្រើនបានចាប់អារម្មណ៍ចំពោះផលិតផលរបស់ក្រុមហ៊ុន ព្រោះវាជាផលិតផលមានគុណភាពខ្ពស់ និងការចំណាយតិចលើថាមពល (ប្តូរអាគុយ)។ មកដល់ពេលនេះក្រុមហ៊ុនបញ្ចេញលក់ Onion T1 បានប្រមាណជាង ៥០០ គ្រឿងហើយ។
លោកថ្លែងថា៖ «ក្រៅពីមានភាពធំទូលាយ និងគុណភាពល្អការចំណាយលើថាមពលក៏ទាបខ្លាំងដែរបើធៀបនឹងត្រីចក្រយានយន្តដែលប្រើប្រាស់ប្រេងឥន្ធនៈ ឬហ្គាស ដោយការប្តូរអាគុយម្តង Onion T1 អាចចំណាយប្រមាណ ១ ម៉ឺនរៀល និងអាចធ្វើដំណើរបានចម្ងាយ ១២០ គីឡូម៉ែត្រ»។
បើតាមលោក សុ ក្រៅពីរោងចក្រដំឡើងត្រីចក្រយានយន្តអគ្គិសនី Onion Mobility Co., Ltd ក៏បានសាងសង់ និងដាក់ឱ្យប្រើប្រាស់ស្ថានីយបញ្ចូលថាមពលជាង ១០ ទីតាំងហើយក្នុងរាជធានីភ្នំពេញ។ បើតាមផែនការនៅចុងឆ្នាំ ២០២២ ឬដើមឆ្នាំ ២០២៣ ក្រុមហ៊ុននឹងសង់ស្ថានីយប្តូរអាគុយរបស់ខ្លួនតាមបណ្តាខេត្តមួយចំនួនដូចជា សៀមរាប ព្រះសីហនុ និងខេត្តបាត់ដំបង ជាដើម។
បើតាមលោក សុផា ក្រៅពី OnionT1 ក្រុមហ៊ុនក៏មានផែនការបង្កើនចង្វាក់ផលិតកម្ម ដើម្បីដំឡើងម៉ូតូ និងរថយន្តអគ្គិសនីផងដែរ។ សម្រាប់ទស្សនវិស័យនាពេលអនាគតក្រុមហ៊ុននឹងពង្រីកការចែកចាយទៅប្រទេសជិតខាង និងក្នុងតំបន់។
អ្នកប្រកបរបររត់ត្រីចក្រយានយន្ត Onion T1 លោក ចក់ សំបូរ បានប្រាប់ថា លោកទើបប្តូរពីការប្រើប្រាស់ត្រីចក្រយានយន្តប្រើហ្គាស (កង់បីឥណ្ឌា) មកប្រើ Onion T1 ប្រហែល ៤ ខែមុន ដោយសារការចំណាយទៅថាមពលរបស់ Onion T1 តិចជាង។ ម្យ៉ាងទៀតការទិញ នេះក៏ក្រុមហ៊ុនតម្រូវឱ្យលោកបង់ប្រាក់រំលស់ក្នុងកម្រិតអាចទទួលយកបានដែរ។
លោក សំបូរ បាននិយាយថា៖ «ការប្រើប្រាស់កង់បីអគ្គិសនីនេះ ចំណាយតិចជាងមុនច្រើន ហើយកន្លែងជិះក៏ធំជាងកង់បីឥណ្ឌាដែរ។ ពេលខ្ញុំប្រើកង់បីឥណ្ឌា នៅពេលហ្គាសឡើងថ្លៃ និងមិនសូវមានភ្ញៀវជិះ គឺខ្ញុំមិនមានលុយសល់ទេ ហើយពេលខ្លះគ្មានលុយបង់ប្រចាំខែ (បង់-រំលស់) ឱ្យក្រុមហ៊ុនទៀតផង។
បច្ចុប្បន្នក្រៅពីក្រុមហ៊ុនបុត្រសម្ព័ន្ធ Onion Mobility Co., Ltd ក្រុមហ៊ុនមេ MVL ដែលមានមូលដ្ឋាននៅក្នុងប្រទេសកូរ៉េ ក៏មានក្រុមហ៊ុនបុត្រសម្ព័ន្ធ ១ ទៀតឈ្មោះ MVL TADA (Cambodia)Co.,Ltd ដែលកំពុងមានប្រតិបត្តិការដំណើរការផលិតផលផ្នែកសេវាកម្ម TADA App ផងដែរ៕
