.jpg)
រោងចក្រដំឡើងរថយន្ត Toyota ដែលគ្រោងនឹងបង្កើតនៅក្នុងតំបន់សេដ្ឋកិច្ចពិសេសភ្នំពេញ។ ហុង មិនា
ភ្នំពេញៈ រដ្ឋាភិបាលកម្ពុជាបានអនុម័តជាផ្លូវការឱ្យក្រុមហ៊ុន Toyota Tsusho Manufacturing (Cambodia) Co.,Ltd ចំពោះគម្រោងបង្កើតរោងចក្រផ្គុំ និងដំឡើងរថយន្ត ដែលមានទុនវិនិយោគចំនួនជាង ៣៦ លានដុល្លារ ខណៈនេះជាក្រុមហ៊ុនដំឡើងរថយន្តទី ២ នៅកម្ពុជាបន្ទាប់ពីក្រុមហ៊ុន Ford ដែលបានដំណើរការកាលពីខែមិថុនាកន្លងមក។
ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ៨ កញ្ញា បានឱ្យដឹងថា តាមសំណើសុំវិនិយោគរបស់ក្រុមហ៊ុន CDC បានសម្រេចចេញវិញ្ញាបនបត្រ ចុះបញ្ជីឱ្យក្រុមហ៊ុន Toyota Tsusho Manufacturing (Cambodia) Co., Ltd. លើគម្រោងបង្កើតរោងចក្រផ្គុំ និងដំឡើងរថយន្តតូយ៉ូតាមានទីតាំងក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ មានទុនវិនិយោគ ៣៦,៧ លានដុល្លារ និងអាចបង្កើតការងារបាន ១៥០ នាក់។
អ្នកជំនាញសេដ្ឋកិច្ចនៃរាជបណ្ឌិត្យ- សភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ៨ ខែកញ្ញាថា កត្តាភូមិសាស្រ្ត ស្ថិរភាពនយោបាយ ភាពសម្បូរបែបកម្លាំងពលកម្មជំនាញ កំណើនសេដ្ឋកិច្ចរឹងមាំ និងច្បាប់វិនិយោគដែលមានលក្ខណៈអំណោយផលកំពុងក្លាយជាមូលដ្ឋានគ្រឹះដ៏សំខាន់ក្នុងការទាក់ទាញក្រុមហ៊ុនលំដាប់អន្តរជាតិធំៗឱ្យចូលមកវិនិយោគផ្ទាល់នៅកម្ពុជា។
លោកបន្តថា ដោយសារក្រុមហ៊ុន Toyota មានវត្តមាននៅក្នុងប្រទេសកម្ពុជាជាយូរមកហើយ ដូច្នេះមុននឹងសម្រេចវិនិយោគ គឺក្រុមហ៊ុនប្រាកដជាបានសិក្សាលម្អិតលើឱកាស និងបញ្ហាប្រឈមដែលអាចកើតមានរួចអស់ហើយ។
លោកនិយាយថា៖«នេះជាគម្រោងវិនិយោគដែលមានលក្ខណៈរឹងមាំ និងមាននិរន្តរភាពយូរអង្វែងសម្រាប់ចូលរួមទ្រទ្រង់ដល់កំណើនសេដ្ឋកិច្ចកម្ពុជាបើធៀបនឹងគម្រោងវិនិយោគដែលជាប្រភេទឧស្សាហកម្មធុនស្រាល(ពិសេសវាយនភណ្ឌ)។ ការចូលមកវិនិយោគរបស់ក្រុមហ៊ុនមានកេរ្តិ៍ឈ្មោះល្បីរាប់សិបឆ្នាំនេះ វាជាចំណុចចាប់-ផ្តើមដ៏ល្អសម្រាប់ទាក់ទាញក្រុមហ៊ុនលំដាប់ពិភពលោកជាច្រើនទៀតឱ្យចូលមកវិនិយោគផ្ទាល់នៅកម្ពុជា»។
លោកបន្ថែមទៀតថា ក្រៅពីបំពេញតម្រូវការក្នុងស្រុក និងបង្កើតការងារសម្រាប់ប្រជាជនក្នុងស្រុក ការចូលមកវិនិយោគផ្ទាល់បែបនេះក៏នឹងជួយធ្វើឱ្យតម្រូវការប្រើប្រាស់ផលិតផលផលិតនៅកម្ពុជាផ្សេងៗ មានកាន់តែច្រើន។ មួយវិញទៀតការនាំចេញគ្រឿងផ្គុំទៅឱ្យរោងចក្រនៅក្រៅប្រទេសក៏នឹងមានចំនួនកាន់តែច្រើនផងដែរ។
Toyota Tsusho Manufacturing (Cambodia) Co., Ltd នឹងក្លាយជាក្រុមហ៊ុនដំឡើងរថយន្តលំដាប់អន្តរជាតិមួយទៀតបន្ទាប់ពីក្រុមហ៊ុន RMA Cambodia ដែលបានបើកដំណើរការរោងចក្រដំឡើងរថយន្ត Ford នៅក្នុងស្រុកក្រគរ ខេត្តពោធិ៍សាត់ ក្រោមទុនវិនិយោគ ២១ លានដុល្លារ។ រោងចក្ររបស់ RMA Cambodia មានសមត្ថភាពអាចដំឡើងរថយន្តបានប្រមាណ ៩ ០០០ គ្រឿងក្នុង ១ ឆ្នាំ។
ក្នុងពិធីបើកសម្ពោធរោងចក្រដំឡើងរថយន្ត Ford កាលពីថ្ងៃទី ១៦ ខែមិថុនា លោក ហ៊ុន ម៉ាណែត អគ្គមេ-បញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកបានឱ្យដឹងថា Ford Motor Company ជាក្រុមហ៊ុនដ៏ធំរបស់អាមេរិក ដែលផ្តល់ទំនុកចិត្តជ្រើសរើសកម្ពុជា ជាទីតាំងវិនិយោគក្នុងវិស័យឧស្សាហកម្មដំឡើងរថយន្តដើម្បីចែកចាយនៅលើទីផ្សារក្នុងស្រុកប្រកបដោយសក្តានុពលដោយយោងលើស្ថានភាពនៃការរីកចម្រើនរបស់ប្រទេសកម្ពុជា និងកំណើនជីវភាពរបស់ប្រជាពលរដ្ឋ។
លោកបានបញ្ជាក់ថា៖«ការបង្កើតរោងចក្រដំឡើងរថយន្ត Ford ក្នុងទឹកដីខេត្តពោធិ៍សាត់ គឺជាមោទនភាពមួយសម្រាប់អ្នកមូលដ្ឋាននៅទីនេះ ក៏ដូចជាប្រជាជននៅទូទាំងប្រទេសក្នុងការទទួលស្វាគមន៍វត្តមានរបស់ឧស្សាហកម្មធុនធ្ងន់ដ៏ទំនើបមួយនេះ»។
យោងតាម CDC ក្នុងពេលជាមួយគ្នានេះ ក្រៅពីគម្រោងរបស់ Toyota Tsusho Manufacturing (Cambodia) Co., Ltd. ក្រុមប្រឹក្សាអភិវឌ្ឍន៍កម្ពុជា ក៏បានអនុម័តគម្រោងវិនិយោគចំនួន ៤ ផ្សេងទៀតដែលក្នុងនោះ ៣ ស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ រាជធានីភ្នំពេញ គឺគម្រោងបង្កើតរោងចក្រផលិតប្រអប់ និងគ្រឿងផ្គុំផ្សេងៗធ្វើពីលោហៈ របស់ក្រុមហ៊ុន WCFO (Cambodia) Co., Ltd មានទុនវិនិយោគ ៣,៨ លានដុល្លារ បង្កើតការងារ ១៥០ នាក់, គម្រោងបង្កើតរោងចក្រកាត់ដេរសម្លៀកបំពាក់របស់ Thirty Three Apparels (Cambodia) Co., Ltd មានទុនវិនិយោគ ២,១ លានដុល្លារ បង្កើតការងារបាន ៤៥០ នាក់, និងគម្រោងបង្កើតរោងចក្រផលិតគ្រឿងបន្ទាប់បន្សំសម្រាប់ឧបករណ៍បញ្ជូនទិន្នន័យធ្វើពីប្លាស្ទិក របស់ WCFO ASAMA Co., Ltd. មានទុនវិនិយោគ ៨០៥ ពាន់ដុល្លារ បង្កើតការងារបាន ១០០ នាក់។ ដោយឡែក ១ ទៀតជាគម្រោងបង្កើតរោងចក្រកាត់ដេរសម្លៀកបំពាក់របស់ A & M Clothing Co., Ltd នៅតំបន់សេដ្ឋកិច្ចពិសេសក្រុងព្រះសីហនុ មានទុនវិនិយោគ ១ លានដុល្លារ បង្កើតការងារ ១០០ នាក់៕
វីដេអូ៖
