.jpg)
ធនាគារជាតិនៃកម្ពុជា។ រូបថត ភ្នំពេញ ប៉ុស្តិ៍
យ៉ាងហោចណាស់មានគ្រឹះស្ថានចំនួន ៨ បានចូលរួមដេញថ្លៃប្រកបដោយជោគជ័យនៃការបោះផ្សាយមូលបត្ររដ្ឋលើកទី១ ដែលមានធនាគារជាតិនៃកម្ពុជាជាអ្នកបោះផ្សាយដើម្បីកៀរគរមូលនិធិប្រមាណ ១០០ ពាន់លានរៀល ឬប្រហាក់ប្រហែល ២៥ លានដុល្លារ។
យោងតាមសេចក្តីជូនដំណឹងស្តីពីលទ្ធផលនៃការដេញថ្លៃមូលបត្រលើកទី១ ដែលបានធ្វើឡើងកាលពីថ្ងៃទី ៧ ខែកញ្ញានេះ គ្រឹះស្ថានចូលរួមចំនួន៨ ជាមួយបរិមាណចូលរួមដេញថ្លៃសរុប ៤១ ៨០០ ឯកតា និងអត្រាចំណូលដេញថ្លៃឈ្នះ ២,២ ភាគរយ។
លោក ហុង សុហួរ អគ្គនាយកក្រុមហ៊ុនមូលបត្រ CSX បានប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែកញ្ញាថា ការបោះផ្សាយនេះគឺជាការធ្វើតេស្តទីផ្សារមួយដោយរាជរដ្ឋាភិបាល ដើម្បីដឹងអំពីតម្រូវការក៏ដូចជាការរំពឹងទុករបស់ទីផ្សារពាក់ព័ន្ធទៅនឹងមូលបត្ររដ្ឋ។ ជាមួយគ្នានេះដែរ ការបោះផ្សាយមូលបត្ររដ្ឋនេះ វិយោគិននៅក្នុងទីផ្សារមូលធនក៏កាន់តែមានជម្រើសជាច្រើនក្នុងការវិនិយោគរបស់ខ្លួនក្រៅតែអំពីការវិនិយោគលើមូលបត្រកម្មសិទ្ធិ មូលបត្របំណុលឯកជន ហើយឥឡូវនេះមានមូលបត្ររដ្ឋទៀតផងដែរ។
លោកបានថ្លែងថា៖ «សម្រាប់លទ្ធផលដែលយើងបានឃើញនេះ មិនមែនមានន័យថាអត់មានតម្រូវការនោះទេ ខ្ញុំគិតថាអាចមានតម្រូវការច្រើនជាងនេះ ដោយសារខ្ញុំគិតថា វិនិយោគិនមួយចំនួនគាត់គិតថាដោយសារតែមូលបត្រមានរយៈពេល ១ ឆ្នាំអាចថាខ្លីពេក ឬអាចយល់ឃើញថាអត្រាកូប៉ុង ២ ភាគរយនេះ គឺទាបពេក។ ដូច្នេះវិស័យឯកជនមានជម្រើសរបស់ខ្លួន ហើយរដ្ឋាភិបាលក៏មានជម្រើសរបស់ខ្លួនដែរ»។
លោកបានថ្លែងបញ្ជាក់ទៀតថា៖ «ខ្ញុំយល់ឃើញថា ការបោះផ្សាយមូលបត្ររដ្ឋនេះ គឺក្នុងគោលបំណងធ្វើការអភិវឌ្ឍទីផ្សារមូលបត្រ ដូច្នេះទោះបីជាការបោះផ្សាយក្នុងទំហំណាក៏ជាការស្វាគមន៍ដែរ។ ដូច្នេះយើងអាចដឹងថារដ្ឋាភិបាលអាចមានប្រភពទុនផ្សេងទៀតដែលអាចទទួលបានក្នុងកម្រិតការប្រាក់ថោក។ ម្យ៉ាងទៀត គម្រោងរបស់រាជរដ្ឋាភិបាលក្នុងការកៀរគរទុន ៣០០ លានដុល្លារ គឺជាទឹកប្រាក់អតិបរមាដែលរាជរដ្ឋាភិបាលទទួលបានការអនុញ្ញាតពីរដ្ឋសភាក្នុងការកៀរគរទុនពីទីផ្សារមូលបត្រ»។
ក្នុងសន្និសីទជាតិស្តីពីទីផ្សារមូលបត្រកម្ពុជាកាលពីថ្ងៃទី ១៦ ខែឧសភាកន្លងមក លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការបោះផ្សាយមូលបត្ររដ្ឋនេះ នឹងអាចធ្វើឱ្យរដ្ឋប្រមូលមូលនិធិសម្រាប់ការអភិវឌ្ឍសេដ្ឋកិច្ច។
លោកបញ្ជាក់ថា៖ «មូលបត្របំណុលរដ្ឋាភិបាលត្រូវបានគេរំពឹងថា នឹងមានប្រជាប្រិយភាពនៅលើទីផ្សារមូលបត្រកម្ពុជា (CSX) និងផ្តល់នូវទិន្នន័យគោលសម្រាប់ការជួញដូរមូលបត្រសាជីវកម្ម និងការវិភាគហិរញ្ញវត្ថុ ដូចដែលបានអនុវត្តនៅក្នុងប្រទេសដែលមានវិស័យមូលបត្រដែលកំពុងរីកចម្រើន»។
យោងតាមសេចក្តីជូនដំណឹងរបស់ NBC ចុះថ្ងៃទី ៥ ខែកញ្ញានេះ បានបញ្ជាក់ថា ធនាគារជាតិនៃកម្ពុជាសូមជម្រាបជូនដំណឹងដល់គ្រឹះស្ថានធនាគារ និងហិរញ្ញវត្ថុជ្រាបថា ការដេញថ្លៃមូលបត្ររដ្ឋលើកទី១ នឹងប្រព្រឹត្តទៅនៅថ្ងៃពុធ ទី ៧ ខែកញ្ញា នេះតាមរយៈប្លាតហ្វមរបស់ធនាគារជាតិនៃកម្ពុជា (NBCP) ចាប់ពីម៉ោង ៨ ព្រឹក ដល់ម៉ោង ២ រសៀល។ សម្រាប់មូលបត្ររដ្ឋនេះ មានតម្លៃចារឹកចំនួន ១ លានរៀល (២៥០ ដុល្លារ) ក្នុង ១ បណ្ណ ហើយវិនិយោគិនដែលទិញមូលបត្រនេះនឹងទទួលបានអត្រាការប្រាក់ ២ ភាគរយថេរក្នុង ១ ឆ្នាំ ដែលនឹងទូទាត់ឱ្យក្នុងរយៈពេល ៦ ខែម្តង៕
