ភ្នំពេញៈ លោកនាយករដ្ឋមន្ត្រី ហ៊ុន សែន បានបង្ហាញការគាំទ្រចំពោះការបង្កើតតំបន់សេដ្ឋកិច្ច ឬវិនិយោគបៃតងនៅក្នុងតំបន់អាស៊ាន ក្នុងគោលបំណងធ្វើការប្រែក្លាយតំបន់នេះឱ្យទៅជាមជ្ឈមណ្ឌលពាណិជ្ជកម្ម និងវិនិយោគប្រកបដោយភាពទាក់ទាញ ជាពិសេសការប្រើប្រាស់ថាមពលស្អាត និងបៃតង។
ការលើកឡើងនេះបានធ្វើឡើងកាលពីថ្ងៃទី ១២ ខែកញ្ញា ក្នុងឱកាសដែលលោកនាយករដ្ឋមន្ត្រីបានអញ្ជើញជាអធិបតីក្នុងពិធីបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ ២០២២ ក្រោមប្រធានបទ «ភាពជាដៃគូសម្រាប់អាស៊ានដែលមានភាពស្អិតល្មួត និងការឆ្លើយតបរហ័ស» ដែលរួមគ្នារៀបចំដោយវិទ្យាស្ថានយុទ្ធសាស្ត្រដើម្បីអាស៊ីប៉ាស៊ីហ្វិក ក្រុមប្រឹក្សាធុរកិច្ចអាស៊ាន សភាពាណិជ្ជកម្មកម្ពុជា និងវិទ្យាស្ថានចក្ខុវិស័យអាស៊ី (AVI)។
លោក ហ៊ុន សែន បានថ្លែងថា៖ «ក្នុងកិច្ចប្រជុំរដ្ឋមន្ដ្រីការបរ-ទេសអាស៊ានលើកទី៥៥ ដែលបានប្រព្រឹត្តទៅកាលពីពេលថ្មីៗនេះ ខ្ញុំបានស្នើបង្កើតឡើងនូវក្របខ័ណ្ឌកិច្ចព្រមព្រៀងបៃតងអាស៊ាន ដែលអាចអនុញ្ញាតឱ្យតំបន់របស់យើងធ្វើអន្តរកាលជាបណ្ដើរៗ ទៅជាសហគមន៍ដែលមានចីរភាព ប្រសិទ្ធភាពប្រើប្រាស់ធនធាន និងភាពធន់»។ លោកបានបន្ថែមថា៖ «ឈរលើស្មារតីនេះ ខ្ញុំសូមស្វាគមន៍នូវគំនិតផ្តួចផ្ដើមរបស់វិទ្យាស្ថានយុទ្ធសាស្ដ្រដើម្បីអាស៊ីប៉ាស៊ីហ្វិក និងវិទ្យាស្ថានចក្ខុវិស័យអាស៊ី ក្នុងការបង្កើតនូវតំបន់សេដ្ឋកិច្ច ឬវិនិយោគបៃតង»។
លោកបញ្ជាក់ថា ជាមួយនឹងការដាក់ឱ្យចូលជាធរមាននូវច្បាប់ស្ដីពីវិនិយោគថ្មី នាពេលថ្មីៗនេះ កម្ពុជាបានត្រៀមខ្លួនរួចជាស្រេចក្នុងការធ្វើជាម្ចាស់ផ្ទះសម្រាប់តំបន់សេដ្ឋកិច្ចបៃតងដំបូងគេបង្អស់។ លោកក៏បានគាំទ្រការបង្កើតឡើងនូវមូលនិធិអភិវឌ្ឍន៍សេដ្ឋកិច្ចកម្ពុជា ដែលនឹងចូលរួមចំណែកក្នុងបរិវត្តកម្មឌីជីថល និងការអភិវឌ្ឍបញ្ញាសិប្បនិម្មិត (AI) និងបំពាក់នូវជំនាញ និងឧបករណ៍ចាំបាច់ដល់កម្លាំងពលកម្មកម្ពុជា ក្នុងសម័យបដិវត្តន៍ឧស្សាហកម្មទី៤ នេះ។
លោកបានលើកឡើងថា៖«ដើម្បីសម្រេចបាននូវការងើបឡើងវិញនៃសេដ្ឋកិច្ចប្រកបដោយចីរភាព និងបរិយាប័ន្ន យើងត្រូវបន្តជំរុញការធ្វើសមាហរណកម្មសេដ្ឋកិច្ច និងការប្រែក្លាយតំបន់អាស៊ានឱ្យទៅជាមជ្ឈមណ្ឌលពាណិជ្ជកម្ម និងការវិនិយោគប្រកបដោយភាពទាក់ទាញ និងចីរភាព ជាពិសេសតាមរយៈការដោះស្រាយបញ្ហារបាំងពន្ធ និងមិនមែនពន្ធ និងការផ្តល់នូវការគាំទ្រឱ្យគ្នាទៅវិញទៅមកដើម្បីពន្លឿនការអនុវត្ត និងទាញយកប្រយោជន៍ឱ្យអស់លទ្ធភាពពី កិច្ចព្រមព្រៀងពាណិជ្ជកម្មសេរីនានា ជាពិសេសកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលជាកិច្ចព្រមព្រៀងពាណិជ្ជកម្មសេរីដ៏ធំបំផុតនៅក្នុងប្រវត្តិសាស្ដ្រសកលលោក។
លោក ថោង ម៉េងដាវីដ អ្នកស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ីបានប្រាប់ ភ្នំពេញ ប៉ុស្តិ៍កាលពីថ្ងៃទី១២ ខែកញ្ញាថា ជាមួយនឹងផែនការបង្កើតតំបន់សេដ្ឋកិច្ច ឬវិនិយោគបៃតង នឹងក្លាយជាគំនិតផ្តួចផ្តើមដ៏សំខាន់មួយសម្រាប់ប្រទេសកម្ពុជា និងតំបន់ ខណៈពិភពលោកកំពុងផ្លាស់ប្តូរទៅប្រើប្រាស់ថាមពលស្អាត និងបៃតង ដែលពឹងផ្អែកកាន់តែតិចលើឥន្ធនៈហ្វូស៊ីល។
លោកបានថ្លែងថា៖ «ការលើកកម្ពស់ការអភិវឌ្ឍបៃតងក្នុងតំបន់ និងដើម្បីជំរុញអ្នកគិតវ័យក្មេងក្នុងតំបន់ និងអ្នកបង្កើតគោលនយោបាយដែលមានជំនាញផ្នែកសេដ្ឋកិច្ច ហិរញ្ញវត្ថុ អាកាសធាតុ បច្ចេកវិទ្យា និងវិស័យឧស្សាហកម្ម ដើម្បីអភិវឌ្ឍគំរូអាជីវកម្មប្រកបដោយចីរភាព និងបរិយាប័ន្ន ដើម្បីទាក់ទាញវិនិយោគិនកាន់តែច្រើន។ ចាប់ពីពេលនេះទៅ ការបង្រួមគម្លាតអភិវឌ្ឍន៍ក្នុងអាស៊ាន នឹងបង្កើនភាពធន់ក្នុងតំបន់ និងជំរុញការអភិវឌ្ឍសេដ្ឋកិច្ចក្នុងតំបន់ និងពិភពលោក»។
លោកបញ្ជាក់ថា៖ «ការបង្កើតច្បាប់វិនិយោគថ្មីរបស់កម្ពុជានាពេលថ្មីៗនេះ នឹងពង្រឹងភាពជឿជាក់របស់កម្ពុជាបន្ថែមទៀត ដើម្បីក្លាយជាមជ្ឈមណ្ឌលវិនិយោគក្នុងតំបន់ថ្មីមួយ ដែលអាចផ្តល់ជូនវិនិយោគិនក្នុងតំបន់ និងពិភពលោកនូវបរិយាកាសធុរកិច្ចប្រកបដោយតម្លាភាព មិត្តភាព និងគួរឱ្យទុកចិត្ត»។
លោកបន្តថា គំនិតផ្តួចផ្តើមបង្កើតមូលនិធិអភិវឌ្ឍន៍សេដ្ឋកិច្ចរបស់កម្ពុជា នឹងធ្វើឱ្យមានភាពងាយស្រួលក្នុងការផ្តល់មូលនិធិដល់ក្រុមហ៊ុនផ្ដល់យោបល់ក្នុងស្រុក ដើម្បីធ្វើការស្រាវជ្រាវ និងផ្សព្វផ្សាយលទ្ធផលស្រាវជ្រាវ/អនុសាសន៍គោលនយោបាយ ដែលអនុញ្ញាតឱ្យកម្ពុជាបង្កើតគោលនយោបាយអភិវឌ្ឍន៍ប្រកបដោយចីរភាពកាន់តែខ្លាំង។
ទន្ទឹមនឹងនេះ លោកនាយករដ្ឋមន្ដ្រីក៏បានប្រកាសបើកជាផ្លូវការនូវក្លិបសេដ្ឋកិច្ចអាស៊ាន។ ក្លិបនេះ នឹងដើរតួនាទីយ៉ាងសំខាន់នៅក្នុងការលើកកម្ពស់សមាហរណកម្មសេដ្ឋកិច្ចអាស៊ានឱ្យកាន់តែជិតស្និទ្ធ តាមរយៈការចូលរួមតាមដាន វាយតម្លៃ និងផ្ដល់អនុសាសន៍ឯករាជ្យ និងប្រកបដោយវិជ្ជាជីវៈ លើការអនុវត្តកិច្ចព្រមព្រៀងទាំងឡាយ ដែលថ្នាក់ដឹកនាំអាស៊ានបានសម្រេច ជាពិសេសលើកិច្ចព្រមព្រៀងពាណិជ្ជកម្មសេរី កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងកិច្ចព្រមព្រៀងដទៃទៀតពាក់ព័ន្ធនឹងសសរស្ដម្ភសេដ្ឋកិច្ច៕